Read Makhuwa-Shirima Yesaya 5 Bible Online

Yesaya 5 - Makhuwa-Shirima bible

Yesaya 5

¹Kinoomwiipela oosiveleyaaka mwaha wa emattaawe ya iwuuva*: Oosiveleyaaka aakhalano ematta ya iwuuva* mukerekhere nttumuxa na ethaadyira.

²Owo aapatthula, anavenxa maluku ootheene, anaphatteya iwuuva* sooreerelaxa. Aateka etoore* ya namalipelela, anatekatho nipuro sinaameliwa iwuuva*. Vano aaweherera ohepha iwuuva* sooreeraxa, vaheera ematta yaaruwenre soonyuunya paahi.

³“Vano, nyuwo amaki a oYerusaleemu ni asilopwana a oYuda, muthorihe variyari wa Miyo ni emattaaka ya iwuuva*.

⁴Kaahipakele eheenitho yeela kaahaapankaaka? Vano siimenleni soonyuunya kaaweherereene sooreera?

⁵Vano kinimoothaliherani yeeyo kineeraaka kipakele emattaaka ya iwuuva*: Kinookurumula mukuswaaya weera eyo ethatuwe moocihamo; kinoophwata exiraaya weera enyikalasiwe.

⁶Kinootatuxa nthala; khaniseekeliwa naari khoolimmwamo; onimunnuwamo rupulula ni nyiiwa. Kinoolamulela mahutte weera ehirupihelemo epula.”

⁷Ematta ya iwuuva* ya Yave a ikuru sootheene ti ekhapira ya Yixrayeli ni asilopwana a oYuda ti nttimbe Owo aasivelaawe. Owo aaweherera ekhaikhai, mene oona oyeehiwa wa ephome; aasaasa wookoleleya, mene iiwale sookhuwela sa ohasula.

⁸Ii! Munoohaawa nyuwo munkhalano impa soowaatta, nyuwosa munaandyeerera mapuro mpaka ohiphwanyaneya nipuro na mukina ni nyuwosa asineenaanyu munkhala ntoko muneene a sootheene.

⁹Yave a ikuru sootheene aakeerela: “Vekhaikhai, impa sincipale sinoothaamiwa; impasene sooreera ni sitokotoko khasikhaliwa.

¹⁰Ematta ya mikwara muloko enooruwera iliitru* miloko miili ni piili sa eviinyu paahi ni ikiilu* macira meeli ni miloko miili sa mmiso sinooruwera ikiilu* miloko miili ni piili sa etrigu paahi.”

¹¹Ii! Munoohaawa nyuwosa mumpeherera ovenya weera muhapaliwe, nyuwosa mumpwaherera owura mpaka ohiyu.

¹²Ofestaniwaya ankhalano amakita, atthakare, akarakaxa, ampetta ni eviinyu. Vaheera khaampwattha miteko sa Yave, ehittittimihaka soopaka sa matataawe.

¹³Tivawo mulokwaaka onroihiwaaya wootthukiwani niwoko na ohiiwexexawaya; maneethaaya animookhwa etala ni ancipalaaya anoovolaxiwa ntthona.

¹⁴Tivawo okhwa onaandyeereraaya ohaawelawaya ohulaka eyanowaaya. Mmwaanomwaya anoolakaseelamo maneethaaya ni ancipalaaya vamoha ni atakhalaaya ni anamawuraaya.

¹⁵Hiiho mutthu onoonyokiwa ni omutthu onooyevihiwa; oowiixoona anookurunuxiwa.

¹⁶Vaheera Yave a ikuru sootheene onoovuwihiwa mweekhaikhaiyinimwawe ni Muluku Ootteela onimwiixoonihera Ootteela moororomeleyanimwawe.

¹⁷Vano ikhondoolo nsiceeke mwemmo ntoko moocamwaya; iputtiputthi nsiceeke mmathalani mwa anamapuha.

¹⁸Ii! Anoohaawa yaale ampurula sootthekasaya ni mikhoyi sa olokottha ni soonanarasaya ni efiiyu ya ekaaro eneettihiwa ni emombe;

¹⁹yaale aneera: “Muluku aakuvihe ovara mutekwaawe weera hiyo noone; ekwanihereye yoovaanela ya Ootteela a oYixrayeli weera nisuwele.”

²⁰Ii! Anoohaawa yaale aneerela yoonanara yooreera ni yooreera yoonanara, yaale aneerela epiphi waara ni waara epiphi, yoowaawa yoocoocowa ni yoocoocowa yoowaawa.

²¹Ii! Anoohaawa yaale anuupuwela weera ari asuweli, yaale aniixeerela anamiruku.

²²Ii! Anoohaawa yaale ari asimwaneene owura eviinyu ni anamawera ophuka soowura;

²³yaale anaakhela makhwankwa emukuttelelaka nanthowa, vaheera ankhootta ekhaikhai wa oohinthowa.

²⁴Tivawo, mooteene yoowo malumi a mooro anghisaaya makayawaya ni munyepu woowuuma onghisiwaaya mmalumini a mooro, hiihotho mikwankhwaarisaya sinimuntta ni ithutusaya sinoovavihiwa ntoko ntthupi, niwoko awosa aakhootta Nlamulo na Yave ni aaramusa masu a Ootteela a aYixrayeli.

²⁵Mwaha wa sootheene iya isara sa Yave soopattela mulokwaawe; Owo ootheteya ntatanawe weera avulalihe. Nyaako sootetereya ni mittembosaya siri ntoko ikokhola mmiseweni. Hata hiiho isarasawe khasimmala; ntatanawe nri etheteeliwo.

²⁶Owo oneemexa eneneero wa miloko sa ottai; ongwoopela muturi yaale a ekotenle elapo. Moone, angwa vale woowaakuveyaxa!

²⁷Khawoworu a yaale onkhulumuwa hata ontuthunya; khawoworu a yaale onuuseela naari onkona; khawoworu onimmolomondola laambaawe hata ontaphula miramba sa ikwakwaattasawe.

²⁸Nyuupasaya siri soowiitha ni nyuura sootheene siri sootupa; mapita a ikavalusaya* ari oolipa ntoko maluku ni mareko a ikaarosaya ntoko eyuupuru.

²⁹Murikaaya onlikana ni wa mwatto; anoopa murika ntoko amwatto oovara; antturuma evanreene yaatthunaaya, enapurula ahikhalaka oowaakihera.

³⁰Nihuku nenenenno awosa anootturumela oYuda ntoko oruma wa ephareiya. Mukina aweha elapo ya oYixrayeli, onimoona epiphi ni othanana; mpaka waara wa othana onimwiilihiwa ni mahutte.