Read Makhuwa-Shirima Yesaya 50 Bible Online

Yesaya 50 - Makhuwa-Shirima bible

Yesaya 50

¹Yave oneera ha: “Eri woowi ekaratta ya omwalana ya amayinyu Miyo kaawoomolenlaaka? Mwa yeeyo, wa namakoongoriha taani koothumihaakani nyuwo? Muthumihiwe niwoko na sootthekasanyu; amayinyu yoomoleliwe niwoko na soonanarasanyu.

²Miyo kaarwaaka, kihimphwanyenreni mutthu? Miyo kiitthanaaka, kahaakhuleliweni? Apaale moonowaaka wookhuveyaxa ohiweraka owoopolani? Apaale nkinono ikuru sowoovuluxani? Kinuumiha ephareiya ni nsu na ohiiha paahi, kintatuxa nyooloko nikare; ihopasaya sinuntta niwoko na ohikhalano maahi ni sinkhwa ntthona.

³Kiniilihiha erimu ni kinkhuneelano esaakho yoolalamika.”

⁴Yave onlamula sootheene ookivaha nlumi nooxuttihiwa weera kisuwele masu anaakhavihera ookhulumuwa. Owo onkivenxa khula oxeexelo, onghula maaruwaaka weera yiiwe ntoko mukina onxuttihiwaawe.

⁵Yave onlamula sootheene oohula maaruwaaka ni nkaattingyemaaru, nkaasunse.

⁶Kaawinnyerera ettulaaka yaale yaakimana, ekhovaaka yaale yaarosola irerusaka; nkaahulunxe ekhovaaka mootthebwiwani ni moosenyeliwani.

⁷Eenre Yave onlamula sootheene akikhavihera, nkuulihiheya muru. Tivawo miyo kiraaka oolipeene ntoko mwala woolipa ni kinsuwela weera nkikhala oohipwaneya.

⁸Yoole onkaakiha ori vakhiviru. Taani anaawere okoothera? Nrowe, nikumane. Namootheeraaka taani? Owo akoothereke!

⁹Ti Yave onlamula sootheene onkikhavihera. Taani anaakithorihe? Awosa ootheene anoothaala ntoko ekuwo; atthumpwiha animwaakhuura.

¹⁰Taani a nyuwo ommoova Yave ni oniiwelela masu a murumeiyaawe? Yoole oneetta mpiphini ahikhalanaka waara aroromeleke mwa Nsina na Yave ni mwa Mulukwaawe.

¹¹Vano, ootheene nyuwo mumpattiha mooro, mwiiwarihakano mithuko sivarelaka, murowe, mweette ngwaarani mwa moorowaanyu ni mwa mithukusanyu mupattinghaanyu. Yeeyo muneeraanyu mwaakhele mmatatanimwaka ti ela: munimwiixaatalela oohooxeyeene.