Read Makhuwa-Shirima Yesaya 51 Bible Online

Yesaya 51 - Makhuwa-Shirima bible

Yesaya 51

¹Mukiiwe nyuwosa muntthara yoororomeleya ni mummwaasa Yave: Mungwehe mwala mwa yoowo mwaathikiliwaanyuwo ni ompwexiwa maluku mwaathimpwaanyuwo;

²Mungwehe Abrahaamu, atithinyu ni Sara ooyanreni. Miyo kaamwiitthanaaka, aari meekhaawe ni kaamureeliha, kimutatuxaka atthu ancipale.

³Vekhaikhai Yave onoopepesa oSiyoni ni onoomorela ikharari mathalaaya ootheene; Owo onootatuxa nikarenaya ntoko wEdeni, elapwaaya yoowuumaxa ntoko nttimbe na Yave. Ohakalalaxa onoophwanyiwa oSiyoni, otthapela ni oruma wa wiipa.

⁴Mukiiwe, atthwaaka, mukiiwe mulokwaaka: Nlamulo nnookhuma mwa Miyo; ekhaikhaiyaaka enoothatuwa waara wa miloko.

⁵Ekhaikhaiyaaka enimoowa woowaakuveya; ovuluxawaka ori mphironi ni moonowaaka onooruuhela ekhaikhai miloko. Icirumba sinookiweha siwehereraka moonowaaka.

⁶Ngwehe wiirimu ni moone elapo ya vathi; erimu enoolakaseya ntoko mwiixi ni elapo enoothaala ntoko ekuwo ni amakaaya animookhwa ntoko ikulihi. Vaheera ovuluxawaka onoopwaherera wa mahuku ootheene ni ororomeleyawaka khoorwaru wooceela.

⁷Mukiiwe nyuwosa munsuwela yeeyo eri ya ekhaikhai, nyuwosa munkhalano nlamulonaka mmurimanimwanyu. Muhoove ohiiha wa atthu hata woopopihiwa ni oruwanawaya.

⁸Vano tthumpwiha onimwaakhuura ntoko ekuwo; muungu onimwaanyaanya ntoko exapala ya ekhondoolo. Vaheera ororomeleyawaka onoopwaherera wa mahuku ootheene ni ovuluxawaka ikhapira ikhapirasene.

⁹Ii! Moono wa Yave, mvenye! mvenye! mwiiwarihe ni ikuru, mvenye ntoko mmahukuni avinre ntoko mweehuhuni ya ikhapira sa khalayi. Ti nyuwo mwaamunyaannye Rahabi a mphareiya ni mwaathoronle enowa yoowoopihaxa ya mphareiyani.

¹⁰Ti Nyuwo muuminghe ephareiya, maahi a moowiixeraxa, mwaapanke musewe moowiixera mwa ephareiya weera oowoopoliwa elapuwe.

¹¹Oowoopoliwa a Yave anoohokolowa. Anoovolowa oSiyoni ni wiipa; ohakalala woohimala onookhala icireembasaya. Ohakalalaxa onimwaaphwanya ni ohitteela ni ohihimera onimwaatthawa.

¹²“Miyo, aani ti Yoomi kinoopepesani. Heeni mungwoovaanyu atthu ankhwa, anamwane a atthu ari malaxi paahi?

¹³Munimuttiwalelani Yave Mpattuxaanyu, mwa Yoole okunge erimu ni opanke mathipelo a elapo? Heeni munkhalaanyu ngwoovani mahuku ootheene niwoko na isara sa anamahasula antthunaxa ophwata? Vano siri woowi isara sa anamahasula?

¹⁴Anamatthukiwaanyu ootheene anootaphuliwa woowaakuveya; awosa kheekhwela mukaliposo hata kheethoiwa yooca.

¹⁵Vanonto Miyo ti Yave Mulukwaanyu kintannya ephareiya moota wooweera mitekuteku sirume — Yave a ikuru sootheene ti Nsinanaka.

¹⁶Koohela maswaaka vayanoniwanyu ni kohoothokororani mmunttuusini mwa matataaka — Miyo kinkunga erimu kihelaka mathipelo a elapo ni kineerela oSiyoni: ‘Nyuwo mulokwaaka.’ ”

¹⁷Mvenye! Mvenye. Mweemeleke, oYerusaleemu, nyuwo ngwunre mmatatani mwa Yave ekoomixi ya isarasawe, nyuwo mminre mpaka nttonyo nookisera ekoomixi yaaveveleihale atthu.

¹⁸Wa anamwane asilopwana ootheene aayanraawe khaariworu oomuhoolela; wa anamwane asilopwana owunnuwihalaawe, khaariworu oomvarela ntata.

¹⁹Sinoomorelani irisa sooheleleleya: mathala ni ophwata, etala ni ekatana. Taani anoomoreleni ikharari? Taani anoopepeseni?

²⁰Anamwaniinyu asilopwana aakomoka, yiixaatalelaka mmiseweni ntoko etthove yoophariwa munraakhoni. Awosa aasareya isara sa Yave ni ohiiha wa Mulukwaanyu.

²¹Tivawo, mwiiwe yeeyo, nyuwo oohasuwa, oohapaliwa muhiwunre.

²²Yave onlamula sootheene, Mulukwaanyu onaakiha mulokwaawe, oneera ha: “Moone, koovenxa mmatatanimwanyu ekoomixi yooveveleihani, khamurwa ngwuratho ekoomixeene yeeyo ya isarasaka.

²³Kinimwiikaathi mmatatani mwa anamahasulaanyu yaaweerelani: ‘Muurame weera noovireeni ni nyuwo mwaahaatalela makhataanyu ntoko etthaya ni musewe omviriwa.’”