Read Makhuwa-Shirima Yesaya 52 Bible Online

Yesaya 52 - Makhuwa-Shirima bible

Yesaya 52

¹Ii! oSiyoni, mvenye, mvenye, mwiiwarihe ikuru. Ii! oYerusaleemu, esidade yootteela, ngware mikaandyosanyu soovuwaxa. Oohiineliwa ni oohitteela kheevolowatho mmilakoni.

²Mutathele ottai ntthupinanyu, Ii! oYerusaleemu, mvenye ni mukilaathi vahiceni ya emwene. Ii! Mwaana muthiyana a oSiyoni, mwiitapuxe onyooro ori muxikomwanyu.

³Vano Yave oneera ha: “Nyuwo murimwaasa othumihiwa ni munimoopoliwa woohikhala musurukhu.”

⁴Vanonto Yave onlamula sootheene oneera ha: “Khalayi mulokwaaka waarowa wExipitu weera wamakewo, mene mweehuhuni yeela awAsiriya ti anamahooxaaya.”

⁵Yave onghima: “Ni vano, kirinoni va? Mulokwaaka orimwaasa okuxiwa ni yaawo anlamula anootthebwa,” onghima Yave. “Ni ehuhu yootheene Nsinanaka noolaphiwa.

⁶Tivawo mulokwaaka oneeraaya osuwele Nsinanaka; vanihukuni nenenenno owo onoosuwela weera ti Miyo kaahimme yeeyo. Aani ti Yoomi.”

⁷Moota onreeraaya woona sirweelaka mmanyaakoni inaawo sa yaale anruuhela mutthenga wooreera, anlaleiya murettele, anruuhela ihaali sooreeraxa, anghima ovuluxiwa yeerelaka oSiyoni: “Mulukwaanyu onlamula!”

⁸Mwiiwe! Anamalipelelaanyu ankhuwela; awosa ankhuwela vamoha ni ohakalala. Yave aahokoleelaka oSiyoni, awosa anoomoona ni maithowaaya.

⁹Mpacere wiipa vamoha ni ohakalala, nyuwosa milepe sa oYerusaleemu, niwoko Yave oopepesa mulokwaawe, Owo ohoopola oYerusaleemu.

¹⁰Yave onimoonihera moonowaawe wootteela vamaithoni wa miloko sootheene ni ekotenle elapo yootheene enimoona ovuluxa wa Mulukwaahu.

¹¹Mususe, mususe! Mvenye va! Muhitaveru etthu yoohitteela! Muhiyeke ni mukhaleke ootteela, nyuwosa munteexa ikaruma sa Yave.

¹²Vaheera khamumpwaha woowaakuveya hata khamumvenya ni otthawa niwoko Yave onimoohoolelani ni Muluku a oYixrayeli onookhala ottuliwanyu.

¹³Moone, murumeiyaaka onimweetta ni miruku; owo onimunnuwihiwa, onoottittimihiwa ni onoovuwihiwa.

¹⁴Ekhalelowaawe yaavirikanyihiwa moota wooweera aatikinsa ahinasuwanyeya omutthu; khaalikana ntoko mutthu. Mooteene yoowo yaaraaya ancipale yaamututhungwe woomoona yoowo,

¹⁵hiihotho miloko sincipale sinootikhina ni mamwene animuumiwa owanoni niwoko na yoowo. Vano yeeyo awosa yahaaleeliwaaya, animoona ni yeeyo yahiiwalaaya animwiiwexexa.