Read Makhuwa-Shirima Yesaya 54 Bible Online

Yesaya 54 - Makhuwa-Shirima bible

Yesaya 54

¹“Ii! Muthiyana mwali eekupa, nyuwo muhitonke oyara, mwiipe! Mpacere wiipa ni mukhuwele ni ohakalala, nyuwo muhitonke ohaawa ovoreya wa oyara, niwoko anamwane a muthiyana oohiiwa ari ancipale oowaapwaha anamwane a muthiyana ootheliwa,” onghima Yave.

²“Munnuwihe nipuro na eheemaanyu, mukokhe nnenesene eluttu ya eheemaanyu; mwaandyeerere mikhoyisaya ni mulipihe ikhomosaya.

³Niwoko nyuwo munimwaandyeerera mipatta sootheene; ekhapiraanyu enookuxa miloko, eniitekiha mmasidadenimwaya moothaamiwa.

⁴Muhoove, khamuulihiheya muru. Muhoove wuulihihiwa muru, khamuyevihiwatho. Munoottiwala wuulihihiwa muru wa enamwanaanyu ni khamuupuwelelatho ohiiha wa onaamukhwelaanyu.

⁵Vano Mpattuxaanyu ori iyinyu — Yave a ikuru sootheene ti Nsinanawe — Ootteela a oYixrayeli ti Mvuluxaanyu. Owo oniitthaniwa Muluku a elapo ya vathi yootheene.

⁶Yave onimoohokoloxanitho ntoko mureene muthiyana oohiiwa ni oothanana mmunepani — muthiyana ootheliwa areene mukhaanene eereliwaka ohikhoolihiwa,” oneera Mulukwaanyu.

⁷“Miyo kohoohiyani wa ehuhu vakhaani, mene kinimoohokoleelani ni ikharari sitokotoko.

⁸Musarani ni mweehuhuni emoha kohoohuluwani, mene kinoowooniherani murima wooreera ni ikharari soohimala,” oneera Yave, Mvuluxaanyu.

⁹“Wa miyo eyo eri ntoko mahuku a Nowe miyo kaalipenlaaka weera maahi a Nowe khayaakhuneelatho elapo. Vano koolipela weera nkinoonyoonyeriwani hata nkinoohiyani.

¹⁰Naari nyaako sittikinyeyaka ni mattumuxa evenxiwaka, woosivelaniwaka woohimala khoottikinyeyaru naari wiiraanawaka wa murettele khoovenxiwa,” onghima Yave onoomorelani ikharari.

¹¹Ii! Esidade, yoohooxiwa ni ettheku ni yoohipepesiwa! Kinimooraselani ni maluku oowaaraxa ni mathipelowaanyu anookhala a maluku a safira*.

¹²Kinoopaka ixikudusanyu* sa rubi* ni maselaanyu a maluku oorikaxa ni ixirisanyu sa maluku oowaaraxa.

¹³Anamwaniinyu asilopwana ootheene anooxuttihiwa ni Yave ni murettele wa anamwaniinyu onuukhale mutokotoko.

¹⁴Munookhalihiwa moororomeleyani: onimoorakamelani ohasuliwa; khamurwa moova etthu. Woopopiha onoosuseeriheliwa ottaiwanyu; iwo khoowaattamelani.

¹⁵Akina yoowananani, khookhala mutekwaaka. Yaawo anoowananani, munimwaawina.

¹⁶Moone, ti Miyo kimpattunxe namahana omvekhulela makhala enapatta, ampakaka kapwitthi oolikaneene wa mutekwaawe. Ti Miyotho kimpattunxe namaphwata weera ananarihe.

¹⁷Khawoworu kapwitthi mpakeliwaanyu woonanarihani anaaweereeni etthu ni nyuwo munoomuvaanya khula anawoothereni. Eyo ti yoohiyeriwa wa arumeiyi a Yave, ni wu ti waakiha kimpakelaaka mwaha wa yaawo,” onghima Yave.