Read Makhuwa-Shirima Yesaya 58 Bible Online

Yesaya 58 - Makhuwa-Shirima bible

Yesaya 58

¹“Mukhuwele ni nsu ntokotoko, muhihovelaka! Murumihe nsunanyu ntoko nipalapatta. Mulaleere mulokwaaka ovaanyawaya ni wa ekhapira ya Yakobe sootthekasaya.

²Vano khula nihuku awosa annikaasa; awosa antthunaxa osuwela iphirosaka ntoko waari muloko ompaka yeeyo eri yooreera ni ohihingye malamulo a Mulukwaaya. Awosa ankivekela soolakela sa ekhaikhai ni ankhala ntoko anamahaawela weera Muluku aakhuveele.

³Awosa ankoha: Hiyo naatthukaka heeni muhinoonelani? Hiyo niiyevihaka, muhimpwatthelani?” Wa soothesene, vanihukuni na otthukawanyu nyuwosa mumpaka yeeyo muntthunaanyu muhaapwatthelaka anamutekwaanyu ootheene.

⁴Emalihero ya otthukawanyu ti onyakulihana ni opuhera mmananaka ni icipakhira. Khamungwera otthuka ntoko mumpakaanyu olelo munaroromela weera nsunanyu nnimwiiwiwa wiirimu.

⁵Weeraka otthukawene ti weiwo kithanlalaaka — nihuku nimoha paahi weera mutthu iiyevihe? Weeraka otthuka ori wuuramiha muru ntoko ettheere ni wiixaatalela vasaakhoni ni ettuura paahi? Munuupuwela weera wu ti otthuka, nihuku noowaakhuleliwa ni Yave?

⁶Moota wa otthuka kintthunaaka wa nyuwosa ti ola: otaphula onyooro wa ohiroromeleya ni mikhoyi sa soolemelaxa; owoopola oohasuliwa ni ophwata moota wootheene wa yoolemelaxa.

⁷Otthuka wa ekhaikhai ti omukawela soocasanyu oovoliwa etala ni omvaha oohaawa nipuro noowiitthuuwa, aani waawariha oothaaleliwa mwaaphwannyaanyu ni ohimurera ettuli munninyu.

⁸Vano, waarawanyu onimooneya ntoko ekamaama ya oxa ni olamihiwawanyu onimoonihereya woowaakuveya. Ekhaikhaiyaanyu enoorowa ohoolowanyu ni ovuwa wa Yave onookhala yoowaakihaanyu ya ottuli.

⁹Hiiho nyuwosa munoomwiitthana, ni Yave onoowaakhulani; nyuwosa munookhuwelela ekhavihero ni Owo onooweerelani: “Kiri va.” Nyuwosa mwamalamaliha eriyaraanyu yoolemela yoohooxa, soowoothera ni masu oowootha,

¹⁰nyuwosa mwaavaha yooca oovoliwa, mweerera waahakalaliha oohaawa, vano waarawanyu onoomwaleela mpiphini ni ohiyuwaanyu onoothatuwa ntoko othana.

¹¹Yave onimoohoolelani mahuku ootheene; onoohakalaliha sohaawelasanyu mweelaponi moowuumelelihiwa ni nsuwa ni onoolipihera erutthwaanyu. Munookhala ntoko nttimbe noohelelaxiwa ni naattuuttu oohimala maahi.

¹²Mulokwaanyu onoorasela milepe sa khalayi, onootekatho mathipelo a iyaakha sincipale sivinre. Munimwiitthaniwa Namareherera a ixiri soopwexiwa ni Namareherera a misewe sirino impa.

¹³Nyuwosa mwawehaweha inaawosanyu weera muhinanarihe eSaabadu, mpakaka yeeyo muntthunaanyu vanihukuninaka nootteela, nyuwosa mwiitthana eSaabadu nihuku na ohakalala ni nihuku nootteela na Yave, nihuku noottittimiheyaxa ni nyuwosa mwattittimiha, muhittharaka iphirosanyu, muhipakaka seiyo muntthunaanyu paahi hata muhuulumaka masu oohorahora,

¹⁴vano munoophwanya ohakalalawanyu mwa Yave ni Miyo kinoopakiha weera mweette mweelaponi ya musulusulu ni mpake efesta ni yoohiyeriwa ya atithinyu Yakobe.” Onuuluma ti Yave.