Read Makhuwa-Shirima Yesaya 6 Bible Online

Yesaya 6 - Makhuwa-Shirima bible

Yesaya 6

¹Vayaakhani aakhwiiyaawe mwene Uziya, miyo kaamoona Yave akilaantheene vahiceni ya emwene — osulusulu ni oovuwihiweene, ni maleembe a mukaandyowaawe yaasarasara Mpaani mwa Muluku.

²Vasuluwawe yaakhala aserafi* — khula serafi* aarino mapupha mathannamosa; meeli yaakhuneela ekhove; meeli makinaawo yaakhuneela inaawo ni meeli makinaawotho yaamvavano.

³Awosa yaamukhuwelelana, yeeraka: “Ootteela, ootteela, ootteela ti Yave a ikuru sootheene; elapo yootheene yoosareya ovuwawawe.”

⁴Wa oruma wa maswaaya, isereemu sa masele saattikinyeya ni Empa ya Muluku yaasareya mwiixi.

⁵Kaakhuwela: “Maayi miyo! Miyo kooriheya! Niwoko kiri mutthu a eyano yoohitteela ni kinkhala variyari wa muloko wa iyano soohitteela, ni vano maithwaaka aamoona Mwene, Yave a ikuru sootheene!”

⁶Vano mmoha a aserafi* aavava mpaka kaaraakawo, akunxeene nikhala na mooro, mwa nenne aavenxalaawe valtaarini* apampeene.

⁷Aatavano eyanowaaka, anakeerela: “Moone, nna nootava eyanowaanyu; nthowananyu noovenxiwa ni sootthekasanyu sooleveleliwa.”

⁸Vano kaahiiwa nsu na Yave, akohaka: “Kimurume taani? Taani anaarowe wa Hiyo?” Vanonto miyo keenre: “Miyo va. Mukirumihe.”

⁹Owo aakeerela: “Murowe ni mwaleele muloko owo: ‘wiiwa munimwiiwa, mene khamwiiwexexa; woona munimoona, mene khamusuwela.’

¹⁰Muumihe mirima sa muloko owo; mwaattiyanihe maaruwaaya ni mwaawale maithwaaya. Mwaahipaka yeeyo, owo onimoona ni maithowaaya, onimwiiwa ni maaruwaaya ni onimwiiwexexa ni mirimasaya, ni vano onoorukunuwa ni onoolamihiwa.”

¹¹Vano miyo kaamukoha: “Ii! Yave, mpaka yaakhani?” Ni Owo aakaakhula: “Mpaka isidade sineeraaya siheleye nthala woohimakiwamo, mpaka impa othaamiwa ni imatta oheleya nthala woomalela,

¹²mpaka Yave aneeraawe aarumihele ootheene ottai ni elapo ohala meekhaaya ttewu.

¹³Hata mpatta wanaamuloko ohalaka mweelaponi, awotho anoophwatiwa. Vaheera ntoko mwiri wa ekaravalyu* onuuhiwaaya onahala nikottoru, hiiho mmiso wootteela onuukhale nikotto noohala oYixrayeli.”