Read Makhuwa-Shirima Yesaya 62 Bible Online

Yesaya 62 - Makhuwa-Shirima bible

Yesaya 62

¹Woosivelaniwaka oSiyoni, nkimaala; niwoko na oYerusaleemu nkiitthuuwa mpaka ororomeleyawaya oneeraaya waare ntoko ekamama ya oxa ni ovuluxiwawaya ntoko ovarela wa muthuko.

²Miloko sinimoona ororomeleyawanyu ni mamwene ootheene ovuwawanyu; munimwiitthaneliwa nsina nnyowani Yave aneeraawe ootteheeni.

³Munookhala ecireemba yoovuwa mmatatani mwa Yave, ediyadema* ya emwene vantatani na Mulukwaanyu.

⁴Awosa khayiitthaniwatho oothaamiwa naari elapwaanyu yoohiiwa. Mene munimwiitthaniwa Hefeziba ni elapwaanyu oBewula, niwoko Yave onimoohakalalelani ni elapwaanyu enootheleya.

⁵Mooteene yoowo mmiravo onthelanaawe ni yoowo omutthomenraawe, hiihotho anamwaniinyu asilopwana anoothelana ni nyuwo; mooteene yoowo namatthomera onimuhakalalelaawe omutthomenraawe, hiihotho Mulukwaanyu onimoohakalalelani.

⁶Ii! oYerusaleemu, kohaakhaliha anamalipelela vaxiriniwanyu; awosa khayiitthuuwaru ohiyu naari othana. Nyuwosa mummwiitthana Yave muhiitthuuwe,

⁷ni muhimutthunihere Yoowo wiitthuuwa mpaka Owo aneeraawe amutekihe Yerusaleemu mutatuxaka yeeyo ottottopela wa elapo ya vathi.

⁸Yave aalipela mwa ntatanawe noolopwana ni moonowaawe wooweraxa: Nkirwa kivaha etrigwaanyu ntoko yooca wa amwiittanaanyu ni anamarwa kheewuratho eviinyu enyowani mwa yeeyo yookhulumunleni.

⁹Vaheera yaawo anghepha yeeyo, animooca emuttottopelaka Yave ni yaawo anthukumanyiha iwuuva*, anoowura eviinyuwaaya mmapuwani mwa Empaaka.”

¹⁰Mvire, mvire vamulako! Murehererele muloko ephiro. Muhule, muhule musewe mutokotoko! Mvenxe maluku. Mweemexere eneneero wa miloko.

¹¹Yave oolaleera ekotenle elapo: “Munleele mwaana muthiyana a Siyoni: ‘Moone, Mvuluxaanyu onimoowa! Moone, ntthuvelonawe nri ni Yoowo, aani arwaaka ni nlivonawe.’”

¹²Awosa animwiitthaniwa muloko wootteela; oowoopoliwa ni Yave, ni nyuwo munimwiitthaniwa ootthuneya, Esidade Yoohithaamiwa.