Read Makhuwa-Shirima Yesaya 64 Bible Online

Yesaya 64 - Makhuwa-Shirima bible

Yesaya 64

¹Ii! Waari weera Nyuwo mwaahula erimu munakhuruwa! Nyaako saano sitetereiyeene ohoolowanyu!

²Ntoko mooro onghisaaya imparumparu ni omviluwihaaya maahi, mukhuruwe ni mwaasuwelihe amwiittanaanyu Nsinananyu weera miloko sithukumele ohoolowanyu.

³Vano mwaapankaanyu itthu sootikhinihaxa hiyo nahaawehereraahu, mwaakhuruwa ni nyaako saatetereya ohoolowanyu.

⁴Okhuma khalayi khawowo iiwale hata naaru niiwexenxe naari niitho naamoonne Muluku mukina muhikhanle Nyuwo munaavarela muteko yaale anoororomelani.

⁵Nyuwo munaakhavihera yaale ampaka yooreera ni murima woohakalala, yaale anuupuwelela iphirosanyu. Vaheera hiyo naapwahereraahu mwa sootthekasahu, mwaaninyoonyeriwa. Vano nnivuluxiwe hai?

⁶Hiyo ootheene naathatuwa ntoko oohitteela ni mitekosahu soororomeleya sootheene siri ntoko mattapwatta oonanara; ootheene hiyo ninnyaala ntoko makukhu, ni ntoko epheyo sootthekasahu sinnivavihera ottai.

⁷Khawoworu oniitthana Nsinananyu hata onghaawela woovarexexani Nyuwo. Vano moonihuluwa munihiyaka mooriheyani niwoko na sootthekasahu.

⁸Wa soothesene, Nyuwo, Yave, ti Atithihu; Hiyo nri oloko, Nyuwo Namoopa; hiyo ootheene nri muteko wa matataanyu.

⁹Ii! Yave, muhininyoonyeraxiwe; muhuupuwelelaxe sootthekasahu wa mahuku ootheene. Ii! Nimvekela weera muniwehe, niwoko hiyo ootheene nri mulokwaanyu.

¹⁰Isidadesanyu sootteela soothatuwa nikare; mpaka oSiyoni ti nikare, oYerusaleemu esidade yoothaamiwa.

¹¹Empaanyu Yootteela ni yoovuwaxa, yoovuwihaayanimo makholowaahu yoophwatiwa ni mooro ni sootheene saari sootthuneyaxasahu sooheleya nthala.

¹²Vahoolo wa sootheene iye, Yave nlelo khamurwa mpaka etthu? Munoopwaherera emaalelo, munittaruxaka opwaha ikhomo?