Read Makhuwa-Shirima Yesaya 65 Bible Online

Yesaya 65 - Makhuwa-Shirima bible

Yesaya 65

¹“Kohiixoonihera wa yaale yahaakikoha; koophwanyiwa ni yaale yahaakaasa. Kaaheerela muloko wahiitthana Nsinanaka: ‘Kiri va, kiri va.’

²Mahuku ootheene kootheteela matata muloko woottiyamaaru, mwa yoowo oneetta mphironi yoonanara ni onaasa soowuupuwelasaya paahi.

³Ti muloko onkitannya woohihiyerera woohiipithiheya opakaka sooveleela munttimbeni ni ohisaka erubani* valtaarini* a indyerwa.

⁴Ti muloko onkilaathi variyari wa mahiye ovirihaka ohiyuwaaya mmakhukuni; onkhuura ekuluwe ni mukarikhonimwaya nookhalamo nrupantakanse na inama soohitteela.

⁵Muloko owo oneera: ‘Mukhaleke ottai, muhikaattamele, niwoko miyo kootepa ootteela wa nyuwo!’ Atthu ntoko awo ari mwiixi onunkha mphulanimwaka, mooro omvarela nihuku nootheene.

⁶Moone, ti yoolempwa vamaithoniwaka: nkirwa kimaala, mene kinimoohokoloxerani ikuhu sookwanela ni soomalela niwoko na

⁷sootthekasanyu nitho soottheka sa makholowaanyu,” onghima Yave. “Yeenre awosa epakela sooveleela mmanyaakoni ni ekiveihera mmattumuxani, Miyo kinimwaanyesereriha nlivo mwa soopakasaya sa khalayi.”

⁸Yave oneera ha: “Wooneyaka weera ekhuce ya iwuuva* yookhalano maahi oocoocowa, kheemvuruliwa niwoko yookhalano yoowura yooreera, hiihotho kinoopaka mwaha wa arumeiyaaka, nkirwa kaaphwata ootheene.

⁹Kinimwaaruuha akina a ekhapira ya Yakobe ni ya Yuda weera ekuxe nyaakosaka; mulokwaaka woothanliwa onimwaakhela ntoko yoohiyeriwa ni arumeiyaaka anookhalawo.

¹⁰Wa mulokwaaka onkaasa Miyo, oXaroni onoothatuwa woociha ikhondoolo ni nreyareya na Akori nipuro noowiitthuuwa imombe.

¹¹Vaheera wa nyuwo munimuhiya Yave ni munttiwala mwaakowaaka wootteela, nyuwo munimurehererela meesa muluku a eparakha ni munsariha ikoomixi sa iviinyu sootakanseriwa wa muluku a oreeriwa,

¹²Miyo kinimoophwatasani ni ekatana ni ootheene nyuwo munimuurama weera muhitiwe. Niwoko koowiitthanani, mene khamukaakhunleru; kohuuluma, mene khamukiiwale. Moopaka soonanara vamaithoniwaka ni moothanla yeeyo ehinkisiveliha.”

¹³Tivawo, Yave onlamula sootheene oneeraawe ha: “Arumeiyaaka animooca, mene nyuwosa munoovoliwa etala; arumeiyaaka anoowura, mene nyuwosa munoovoliwa ntthona; arumeiyaaka anoohakalala, mene nyuwosa munimuulihiheya muru.

¹⁴Arumeiyaaka animwiipa ni murima woohakalalaxa, mene nyuwosa munookhuwela ni murima woothananaxa mwiinlaka ni munepa wooriipiwa.

¹⁵Munimwaahiyera oothanliwaaka nsinananyu ntoko nlapho; Yave onlamula sootheene onoowiivasani, mene onimwaavaha arumeiyaawe nsina nikina.

¹⁶Yoole ontthuna nreeliho wa elapo ela, amvekeleke Muluku a ekhaikhai; yoole onlipela mweelaponi, apakeke yeeyo mwa Muluku a ekhaikhai. Vano sookacamiha sivinre sinoottiwaliwa ni sinoovitheya vamaithoniwaka.”

¹⁷“Moone, kinoopattuxa irimu ni ilapo sinyowani. Itthu sa khalayi khasuupuweleliwa hata khasikhalatho mmuupuweloni.

¹⁸Wa soothesene, muhakalalelaxe mwa yeeyo kineeraaka kipattuxe, niwoko kinoopattuxa oYerusaleemu ntoko nipuro na ohakalalaxa ni amakaaya animwaahakalaliha akina.

¹⁹Kinoohakalalela oYerusaleemu ni amakaaya anookisiveliha. Okhuwela wa wiinla ni olalamika khawiiwiwamotho.

²⁰Mwemmo khakhalamo mwaana anaakhale mahuku vakhaani a okumaawe naari namuuluvala anaahikwanihere iyaakha sa okumaawe; anaakhwe muyaakhani ncira anooneliweke ntoko mmiravo; ni yoowo anaahikwanihe iyaakha ncira anaalikeleliwe ntoko oolaphiwa.

²¹Awosa anooteka impa, ekhalekemo; anoophatteya imatta sa iwuuva* ni animooca soowiimasaya.

²²Awosa kheerwatho eteka impa weera yaakamele akina hata kheephatteya weera ece akina. Vano mahuku a mulokwaaka anoolikana ntoko nyiri; oothanliwaaka anoohakalalela yoowiima ya miteko sa matataaya.

²³Awosa kheevara muteko wa siiyo, hata khayaayara anamwane weera ethananiheye. Vano awosa anookhala muloko wooreelihiwa ni Yave, awosa vamoha ni ikhapirasaya.

²⁴Awosa ehinaaye wiitthana, Miyo kinoowaakhula; awosa nlelo yuulumaka, kinoowiiwelela.

²⁵Mwiici ni eputtiputthi enimooca vamoha, ni mwatto onimooca malaxi ntoko emombe elopwana, vaheera ntthupi nnikhale yooca ya enowa. Iyo khasinanariha hata ophwata vamwaakowaaka wootteela wootheene,” onghima Yave.