Read Makhuwa-Shirima Yesaya 66 Bible Online

Yesaya 66 - Makhuwa-Shirima bible

Yesaya 66

¹Yave oneera ha: “Erimu ti ehicaaka ya emwene ni elapo ya vathi ti ntthatto na inaawosaka. Moota heeni wa empa muneeraanyu mukitekele? Nipuro na wiitthuuwawaka nri woowi?

²Vekhaikhai, Ntatanaka noopaka itthu sootheene iya ni hiiho sookhala,” onghima Yave. Mutthu Miyo kinimuttittimihaaka ti ola: yoole ori oowiiyeviha ni a munepa woosareya omoova Muluku ni onthukumela woowiiwa maswaaka.

³Vaheera yoole omveleela emombe ori ntoko mutthu yoowo ommwiiva mutthu ni yoole oniiva eputtiputthi ori ntoko mulopwana ompiritula exiko ya mwaaxaana a mwalapwa. Yoole ompaka yooveleela ya etrigu ori ntoko mulopwana onoonihera ephome ya ekhumba ni yoole onghisa erubani* yoowuupuwelela ori ntoko mulopwana onlapa muluku mukina woolokottha. Awosa aathanla iphirosaya ni minepasaya singhakalalela mitekosaya sa mwiikho.

⁴Tivawo kineeraka kaahasuletho, kaaruuhelaka yeeyo anoovaxaaya. Niwoko Miyo kaawiitthana, mene khaawo aakhunle; Miyo kaahuuluma, mene khaawo iiwale. Awosa aapaka soonanara vamaithoniwaka ni aathanla yeeyo ehinkisiveliha Miyo.”

⁵Mwiiwe masu a Yave, nyuwosa munthukumela woowiiwa maswaawe: “Axunninyu anoothanyani ni anookhoottani niwoko na Nsinanaka yaaheera: ‘Yave avuwihiweke weera noone ohakalalawanyu!’ Wa soothesene, awosa eneera yuulihiheye muru.

⁶Mwiiwe onyakulihana musidadeni; mwiiwe oruma onrweela Mpaani mwa Yave. Ti oruma wa Yave aalivaka amwiittana sootheene seiyo amphwanelaaya.

⁷Owo ahinaaye okurukuttuwa weera ayare, onooyara; ohinaaye omutepela ovoreya, onoomukhalano mwaana mulopwana.

⁸Taani otonke wiiwa ntoko hiiha? Taani oonne hiiha? Khoongwereya muloko oyariwa nihuku nimoha paahi. Hata hiiho, ehuhu emoharu oSiyoni ompaceraaya okurukuttuwa, onimwaayara anamwanaaya.”

⁹Yave oneera: “Miyo nkinruuha ehuhu ya oyara kihipakihaka weera oyariwe.” Muluku oneera: “Miyo nkinooceeliha oyariwa wa muloko owo.

¹⁰Muhakalale vamoha ni oYerusaleemu ni muhakalale niwoko na yoowo, ootheene nyuwosa munimusivela yoowo; muhakalalaxe vamoha ni oYerusaleemu ootheene nyuwosa mwaamulalamikela yoowo.

¹¹Vano nyuwo munimwaamwa mpaka ovona mmapeleni mookurunuxeya. Munimwaamwa nnenesene ni munoohakalalela waattawaya.”

¹²Vano Yave oneera ha: “Kinoomvaha yoowo murettele ntoko mooloko ni mihakhu sa miloko ntoko wuupa wa okumburula. Munimwaamwa mwaakandiweene ni otutheliwa vaciroroniwaya.

¹³Hiiho ntoko maayi onimpepesaawe mwaniye, hiihotho kinimoopepesani ni munoopepesiwa mwaha wa oYerusaleemu.”

¹⁴Nyuwosa moonakaru yeeyo, murimaanyu onoohakalala ni munoottuva ntoko malaxi; Yave onimwaasuweliha moonowaawe arumeiyaawe, vaheera isarasawe animooniheriwa amwiittanaawe.

¹⁵Moone, Yave ongwa ni mooro ni ikaarosawe sa ikavalu* siri ntoko eyuupuru. Onooruuhela vathi onyoonyiwawawe ni isara ni ohiihawawe ni malumi a mooro.

¹⁶Vano Yave onookwanihera waathoriha atthu ootheene ni mooro ni ekatanaawe; ancipale animwiiviwa ni ntatanawe.

¹⁷Yaale aniitteeliha weera evolowe munttimbeni, emuttharaka musaserdoti* ori eriyaraaya, ankhuura ekuluwe, makhule ni itthu sikina sa mwiikho — awosa ootheene anooriheya,” onghima Yave.

¹⁸“Niwoko na mitekosaya ni soovaanyasaya kinimoorwa othukumanyiha miloko ni ipuumba sootheene sa elapo ya vathi ni seiyo sinimoowa, sooneke ovuwawaka.

¹⁹Miyo kinookhaliha eneneero variyariwaya ni kinimwaarumihela akina akina ahalahanle wa miloko — wa oTaresisi, wa aLibiya, wa aLidiya (oosuwanyeyaxa ntoko alipa oolatha nyuupa), wa oTubali, wa oGresiya, ni wa icirumba sa ottaiwene, mwa seiyo sihiiwale sa epilaaka hata sihoonne ovuwawaka. Awosa anoolaleiya ovuwawaka variyari wa miloko.

²⁰Ni awosa animwaaruuhatho axunninyu ootheene okhuma miloko sootheene mpaka wa mwaakowaaka wootteela, oYerusaleemu, ntoko yooveleela wa Yave. Awosa animoowa ni ikavalu*, ikaaro sa ikavalu* ni ikaaro sikina, ni abuuru ni ikamelu*,” onghima Yave. “Awosa anooruuhiwa ntoko aYixrayeli anruuhaaya sooveleelasaya sa etrigu wa Empa ya Yave ni ikaruma sootteeliheriwa.

²¹Ni Miyo kinimwaathanla akina a yaawo weera ekhale asaserdoti* ni aLeevi,” onghima Yave.

²²“Mooteene yoowo erimu ni elapo enyowani kineeraaka kipattuxe empwahereraaya wa mahuku ootheene,” onghima Yave, “hiihotho nsinananyu ni ekhapiraanyu enoopwaherera.

²³Khula mweeri munyowani ni khula eSaabadu omutthu wootheene onimoowa weera okokhorele ohoolowaka,” onghima Yave.

²⁴“Vano awosa anookhuma, animoona mittembo sa yaale yaakivaannye; nyuungusaya khasirwa sikhwa hata moorowaaya khoocipha ni seiyo sinookhala sa mwiikho wa omutthu wootheene.”