Read Makhuwa-Shirima Yesaya 8 Bible Online

Yesaya 8 - Makhuwa-Shirima bible

Yesaya 8

¹Yave aakeerela: “Mukuxe nivali nooreerela ni mwalepemo moota woowiiweya: ‘Maher-Xabali-Haxi-Baze.’

²Miyo kinoomwiitthana musaserdoti* Uriya ni Zakariya, mwaana mulopwana a Yeberekiya ntoko anamoonaaka oororomeleyaxa.”

³Vano kaarowa wa mprofeeti muthiyana ni owo aarupala, anamuyara mwaana mulopwana. Vanonto Yave aakeerela: “Munttehe ‘Maher-Xabali-Haxi-Baze.’

⁴Mwaana ola ahinaaye osuwela weera ‘tiithi naari’ maayi, mwene a wAsiriya onookuxa mihakhu sa oDamasku ni soohuhula sa oSamariya.”

⁵Yave aakeerelatho:

⁶“Weenre muloko ola okhootta maahi a oXilowa ampiluwaxa ni omuhakalalelaka Rezini ni mwaana mulopwana a Remaliya,

⁷Yave onimwaaruuhela maahi oowuupaxa a Efratesi — mwene a wAsiriya ni ikurusawe sootheene. Mooloko owo onoosareya mmiroranimwaya moothemwene okhopela ni okhopela

⁸ni anoomwareela oYuda, emireihaka mpaka muxiko. Mapuphaaya ookungeyeene anookhuneela elapwaanyu yootheene, Emanuweli!”

⁹Ii! Nyuwosa miloko, mukhuweleleke ekhotto ni munoophwatasiwa! Mwiiwe nyuwosa ilapo sa ottai. Hata mwiirehererelaka okhottoni munoophwatiwa! Aani, naari mwiirehererelaka owana munoophwatiwa!

¹⁰Naari nyuwosa mpakaka miruku, iyo sinoopupurumiheya; naari mvaanelaka, khasiweettelani nnene, niwoko Muluku ori ni hiyo.

¹¹Yave aahuuluma ni miyo, akilipiheraka ni okooperera weera kihitthare ephiro ya muloko ola. Owo aakeerela:

¹²“Muhiitthanele ‘yoovaanelela’ sootheene seiyo muloko ola oniitthanaaya ‘yoovaanelela’; muhoove seiyo owo onoovaaya hata muhithukumele.

¹³Yave a ikuru sootheene ti Yoowo ontthuneya omoonela Ootteela; ti Yoowo ontthuneya omoova ni omuthukumela.

¹⁴Wa omwene miili wa oYixrayeli Owo onookhala Nipuro Nootteela*, mene onookhalatho Nluku Nookwattula ni Mwala oowuuwiha. Ni onookhala Ntapha ni Muraakho wa amaki a oYerusaleemu.

¹⁵Ancipale a yaale anookwakwathuwa; anoomora ni anookakatthanyiwa; anoopharihiwa munraakhoni evariweke.”

¹⁶Muthokorore nnenesene Nlamulo ni mulipihe soolamulasaka eriyari ya oohuseraaka.

¹⁷Kinooweherera mwa Yave, mwa Yoowo oniipithihera ekhovaawe ekhapira ya Yakobe. Mwa Yoowo kinoomuroromela.

¹⁸Miyo kiri va vamoha ni anamwane Yave okivanghaawe. Hiyo nri ineneero ni icaambulo oYixrayeli sinrweela mpatta wa Yave a ikuru sootheene, mwa Yoowo ommaka vamwaako Siyoni.

¹⁹Akhala mukina ongweerelani: “Mwaakohakohe yaale anaahera ihako ni anuuluma ni anamakhwa, yaapaapaka ni yuulumaka muxiirini,” vano khoontthuneya weera muloko omukoherere Mulukwaaya? Munaakohererela heeni anamakhwa ngweerelaka akumi?

²⁰Vano moone Nlamulo ni ikano sa Yave! Atthu yaahuuluma ntoko masu ala awosa khaanoonatho waara.

²¹Awosa oothananeene ni oovoliweene anooxoraxora mweelaponi. Yaavoliwaka etala, anoonyoonyiwa ni, yaawehaka osulu, anoomulapha mwenaaya ni Mulukwaaya.

²²Vahoolowaya anooweha vathi, yooneke othanana ni epiphi yoowoopiha paahi ni anoovonyeriwa mpiphini moohoonaniwa.