Read Makhuwa-Shirima Levitiku 10 Bible Online

Levitiku 10 - Makhuwa-Shirima bible

Levitiku 10

¹Nadabi ni Abihu, anamwane asilopwana a Aharoni, yaakuxa yaahiseriwa erubani*, mwa mwemmo yaapattinghaaya mooro, enahela erubani* ni yaapattiha mooro woohitthuniheriwa vamaithoni wa Yave, ehilamuleliwe.

²Vano Yave aarumiha mooro onaalaliha ni yaahookhwa vamaithoni wa Yave.

³Vanonto Moisesi aamweerela Aharoni: “Uulummaawe Yave ti ela: ‘Kinimwiixoonihera Ootteelaxa variyari wa yaala ankaattamela; Miyo kinoovuwihiwa vamaithoni wa muloko wootheene.’” Aharoni aari mwaasa omaala.

⁴Moisesi aamwiitthana Mixayeli ni Elezafana, mwaana mulopwana a atatawe Aharoni, anaweerela: “Nkarwani, mwaavenxe axisuluwiinyu mukhwipi wa okonelingwe, vaate wa mpatta wa ohoolo wa Nipuro Nootteela*.”

⁵Vano yaarowa, enaavarela mikaandyo, enaapurulela mpaka okhwipi wa okonelingwe, ntoko Moisesi aalamulenlaawe.

⁶Vanonto Moisesi aamweerela Aharoni ni anamwanaawe asilopwana Eleyazari ni Ithamari: “Muhimetthe mayihaanyu hata muhaahule soowarasanyu mwiinanelaka weera muhikhwe ni Yave ahinyoonyeriwe muloko wootheene. Vaheera imusisanyu, ipuumba sootheene sa aYixrayeli ewiinleleke yaale Yave aaphwantaawe ni mooro.

⁷Muhivenye vamulako wa Eheema ya Muthukumano* weera muhikhwe, niwoko makhura a ottikitthelano a Yave ari mwa nyuwo.” Vano yaapaka yeeyo Moisesi aahimmaawe.

⁸Vano Yave aamweerela Aharoni:

⁹“Nyuwo ni anamwaniinyu asilopwana muhiwure eviinyu naari soowura sikina sirino eferementu soohapala muhinaaye ovolowa Muheemani ya Muthukumano weera muhikhwe. Ela ti ekano yoohimala wa ikhapira sootheene.

¹⁰Muntthuneya okawanyiha yeeyo eri yootteela ni yeeyo eri yoohitteeliheriwa; yeeyo yootteela ni yoohitteela,

¹¹ni mwaaxuttihe aYixrayeli ikano sootheene Yave aavanghaawe mwa Moisesi.”

¹²Moisesi aamweerela Aharoni ni anamwane asilopwana yaahanle, Eleyazari ni Ithamari: “Mukuxe yooveleela ya irooro ehanle mwa yoomveleelela Yave erehereriwe vayikho, muceleke yoohikhalano eferementu mukerekhere valtaarini*, niwoko ti yootteelaxa.

¹³Muceleke vaNipuroni Nootteela*, niwoko ti mpattaanyu ni mpatta wa anamwaniinyu asilopwana wa sooveleeleliwa Yave sirehereriwe vayikho. Vano keenraaka malamuleliwo.

¹⁴Mene nyuwo, anamwaniinyu asilopwana ni asithiyana ekhuureke ihoce soowiinainiheriwa ni etakhwi yooveleeleliwa. Mukhuureke vanipuroni noothanliwa ntoko nootteela; iyo moovahiwa nyuwo ni amanwaniinyu ntoko mpattaanyu wa sooveleelela murettele sa aYixrayeli.

¹⁵Etakhwi yooveleeliwa ni ehoce yoowiinainiheriwa eruuhiweke vamoha ni mipatta sa makhura a sooveleela soorehereriwa vayikho weera siinainihiweke vamaithoni wa Yave. Ola onookhala mpatta wa khula nihuku wa nyuwo ni anamwaniinyu, ntoko Yave aalamulenlaawe.”

¹⁶Moisesi amwaasaasiyeene mipatta sootheene napunci a yooveleelela yoottheka ni asuwelakaru weera oohisiwa, aamunyoonyeriwa Eleyazari ni Ithamari, anamwane asilopwana yaahanle a Aharoni, anaakoha:

¹⁷“Muhikhuurenle heeni yooveleelela yoottheka vaNipuroni Nootteela*? Ti yooveleela yootteelaxa mvahiwaanyu weera mvenxe nthowa wa muloko murehererelaka wiiwanana ni Yave wa yoowo vamaithoniwawe.

¹⁸Yeenre ephome ya yooveleela eyo ehironghiwaka vaNipuroni Nootteela*, nyuwo mwaahikhuureleke vanipuroni nootteeliheriwa ntoko kilamulenlaaka.”

¹⁹Aharoni aamwaakhula Moisesi: “Olelo awosa aapakela sooveleelela soottheka ni soohisasaya vamaithoni wa Yave — hata hiiho etthu yoonanara ntoko ela yookikhumelela. Miyo kaakhuurale yooveleelela yoottheka olelo, vano khaamunsiveliha Yave?”

²⁰Vano Moisesi aahaakhulela masu ale.