Read Makhuwa-Shirima Levitiku 13 Bible Online

Levitiku 13 - Makhuwa-Shirima bible

Levitiku 13

²“Mukina yamukhala yoowiipa, ethuku naari nleepela noowaaraxa muxapalanimwawe apaale nithoonyeraka makokho, owo arongheliweke musaserdoti* Aharoni hoye hoye wa mmoha a anamwanaawe ori musaserdoti*.

³Vano musaserdoti* awehaweheke nnenesene exapaleene yeeyo ni mapururu a vathukuni yatteela ni anoona weera wohiixera, vano ethuku eyo ti makokho. Musaserdoti* awehawengheene, amwiitthaneke okhala oohitteela.

⁴Nleepela muxapalanimwawe natteela nihiniixera, ni mapururu yaahitteelawo, musaserdoti* amulamuleke mutthu owo weera akhale meekhaawe wa mahuku mathannameeli.

⁵Munihukuni nanaathannameeli musaserdoti* amuwehaweheke ni oona weera nleepela khaniceendyeiye naari khanimwareenle erutthu yootheene, owo amulamuleke okhala meekhaawe wa mahuku mathanameelitho.

⁶Munihukuni nanaathannameeli musaserdoti* amuwehaweheketho ni ethuku yanyaala ehimwareenle erutthu yootheene, vano musaserdoti* amwiitthaneke ootteelihiwa — ti ethuku paahi. Mutthu owo akattheke ikuwosawe ni onookhala ootteelihiwa.

⁷Vaheera mutthu owo iixoonihenreene wa musaserdoti* weera iitthaniwe ootteelihiwa ethukwaawe yaamwareela mweerutthuni yootheene, owo iixoonihereketho wa musaserdoti*.

⁸Musaserdoti* amuwehaweheke ni oona weera ethuku yoomwareela mweerutthuni, musaserdoti* amwiitthaneke oohitteela; ethuku eyo ti makokho.

⁹Mukina oonelela eneneero ya makokho, owo aroihiweke wa musaserdoti*.

¹⁰Musaserdoti* amuwehaweheke ni oona weera yoomukhala yoowiipa yootteela, etatuxaka mapururu ootteela ni wakhala sututu,

¹¹ti makokho ni musaserdoti* amwiitthaneke oohitteela. Owo ahimulamule okhala meekhaawe niwoko ti oohitteela wa mahuku ootheene.

¹²Eretta yuulaana erutthu yootheene ni musaserdoti* anoona weera aamuttokoneela,

¹³vano musaserdoti* aamuwehaweheke ni oona weera eretta ele yohuulaana erutthu yootheene, musaserdoti* amwiitthaneke ootteela. Yeenre ekhalaka yootteela yootheene, owo ti ootteela.

¹⁴Vaheera yeerawo ethai sututu, owo onookhala oohitteela.

¹⁵Musaserdoti* oonaka ethai yeenre sututu, amwiitthaneke oohitteela. Ethai yeenre sututu ti yoohitteela; eyo ti makokho.

¹⁶Vano weenre sututu waceendyeya onatteela, owo ahokoleeleketho wa musaserdoti*.

¹⁷Musaserdoti* amuwehaweheke ni oona weera mpatta woovaliheya woothatuwa wootteela, musaserdoti* amwiitthane mutthu owo ootteela; owo onootteelihiwa.

¹⁸Akhala mukina orino namkoxo ovonle,

¹⁹ni vanipharimani wattukuttela hoye hoye waxeerawo, mutthu owo iixoonihereke wa musaserdoti*.

²⁰Vano musaserdoti* awehaweheke exapaleene yeeyo ni oona weera wohiixeraxa ni mapururu yatteelawo, vano musaserdoti* amwiitthaneke oohitteela. Ti eneneero ya makokho ettukuttelinghe nikhwatta.

²¹Vaheera musaserdoti* amuwehaweha ahinoona mapururu ootteela ni nipuro nno naahiixeraxa ni wavukuwawo, musaserdoti* amulamuleke mutthu owo weera akhale meekhaawe mahuku mathannameeli.

²²Mene nno nuulaana, musaserdoti* amwiitthaneke oohitteela; ti makokho.

²³Vaheera nleepela naahitepa naari naahuulaana, ti nipharima paahi na nikhwatta ni musaserdoti* amwiitthaneke ootteela.

²⁴Mukina aza, nnakhumelelawo nleepela nooxeera hoye hoye nootteela vanikhwattani yeenraayawo ethai sututu,

²⁵vano musaserdoti* awehaweheke nleepela ni oona weera mapururuwaaya aathatuwa ootteela ni nno nniixeraxa, ti makokho atannyereiye ni oza. Vano musaserdoti* amwiitthaneke oohitteela — ti makokho.

²⁶Vaheera musaserdoti* awehaweha nleepela ni aahoonawo mapururu ootteela ni waahiixeraxawo, onavukuwa, musaserdoti* amulamuleke mutthu owo weera akhale meekhaawe mahuku mathannameeli.

²⁷Munihukuni nanaathannameeli musaserdoti* angwehaweheke ni oona weera nleepela nohuulaana erutthu yootheene, musaserdoti* amwiitthaneke oohitteela; ti makokho.

²⁸Vaheera nleepela nno naahuulaana naari naahimwareela erutthu yootheene nnavukuwa, ti wiipa wa oza ni musaserdoti* amwiitthaneke ootteela. Ti nipharima na oza paahi.

²⁹Mulopwana hoye hoye muthiyana yamphwanya yoonanara ya mmuru hoye hoye vattwattwarani,

³⁰musaserdoti* awehaweheke nleepela ni oona weera nohiixeraxawo ni mapururu yakhala ancano ni ootteettheya, vano musaserdoti* amwiitthaneke oohitteela. Ti epuhera ni ovele, eyo tiiyo makokho a mmuru hoye hoye a ettwattwara.

³¹Vaheera musaserdoti* awehaweha eneneero ya ovele ni waahiixeraxa ni yaahikhalawo mapururu ooripa, vano musaserdoti* amulamuleke mutthu oovaliheya weera akhale meekhaawe mahuku mathannameeli.

³²Munihukuni nanaathannameeli musaserdoti* awehaweheke woovaliheya ni oona weera ovele khawuulaanne, ni yaahikhalawo mapururu ancano ni waahiixeraxawo,

³³mutthu owo ametthiweke ohiya woovaliheya ni musaserdoti* amulamuleke yoowo weera akhaletho meekhaawe mahuku mathannameeli.

³⁴Munihukuni nanaathannameeli, musaserdoti* awehaweheketho ni oona weera ovele khawuulaanne, ni waahiixeraxawo, musaserdoti* amwiitthaneke ootteela. Mutthu owo akattheke ikuwosawe ni onookhala ootteela.

³⁵Vaheera ovele wuulaana mweerutthuni iitthaningweene ootteela,

³⁶musaserdoti* awehaweheke ovele ni wuulaana mweerutthuni naari muxapalani, khoontthuneya musaserdoti* waasaasa mapururu ancano — mutthu owo ti oohitteela.

³⁷Vano, musaserdoti* oona weera khawuulaanne ni aamelelawo mapururu ooripa, ovele owo woomala. Owo ti ootteela ni musaserdoti* amwiitthaneke ootteela.

³⁸Mulopwana hoye hoye muthiyana akhalano maleepela ootteela mweerutthuni,

³⁹musaserdoti* awehaweheke ni maleepela yakhala ootteela ehinaara, ti eretta yoohoopiha yuulaanne; mutthu owo ti ootteela.

⁴⁰Mulopwana yammora mayihi, anahala ntariru, owo ti ootteela.

⁴¹Owo yammora mayihi vatthomelani, ti ntari — ti ootteela.

⁴²Vaheera akhaliwa nikhwatta nooxeera vayuuci hoye hoye waakohi vantariniwawe, ti makokho anuulaana vayuuci hoye hoye waakohi.

⁴³Musaserdoti* angwehaweheke ni oona weera nleepela na vayuuci hoye hoye waakohi nootteela nixeenreene ni ekhalelo ya makokho,

⁴⁴mutthu owo ti namakokho ni oohitteela. Musaserdoti* amwiitthaneke oohitteela niwoko na nleepela na mmurumwawe.

⁴⁵Yoowo aneera akhaliwe makokho sooneyakawo sakhalaru ineneero sa makokho, awareke ikuwo soothaala, eettakano mputu; owo akutteeleleke eyano akhuwelaka: “Ohitteela! Ohitteela!”

⁴⁶Owo nlelo areeneno makokho, onookhala oohitteela. Owo akhaleke meekhaawe okhwipi wa okonelingwe.

⁴⁷Yakhumelela eretta yoowoopiha ya mukuwoni, ekhalaka yootteettheya naari ya mapururu a ekhondoolo hoye hoye eliinyu*,

⁴⁸ekhalaka yootthaviwa hoye hoye yooxoriwa ya mapururu a ekhondoolo naari eliinyu*, hoye hoye yakhalaru exapala hoye hoye etthu yoopakiwano exapala:

⁴⁹vano wakhala weera nlepa na vakuwoni, vaxapalani, naari wa yootthaviwa hoye hoye yooxoriwa naari yakhalaru vaxapalani nri noorimbelela hoye hoye nooxeera, ti eretta yoowoopiha ya mukuwoni ni ooniheriweke musaserdoti*.

⁵⁰Musaserdoti* awehaweheke nlepa ni ikaathiki ekuweene yeeyo nipuronaya wa mahuku mathannameeli.

⁵¹Eviraleene mahuku mathannameeli, musaserdoti* awehaweheke yeeyo ni nlepa namwareela mukuwoni hoye hoye mukuwoni yootthaviwa hoye hoye yooxoriwa, naari vaxapalani, yakhalaru etthu emvareliwa muteko, ti eretta yoowoopiha ya mukuwoni — ekuweene yeeyo ti yoohitteela.

⁵²Owo ahiseke ekuwo eyo yootthaviwa hoye hoye yooxoriwa naari yakhalaru exapala eniikhaleno nlepa, niwoko ti eretta yoowoopiha ya mukuwoni — etthu eyo ehisiweke.

⁵³Vaheera musaserdoti* awehaweha nlepa naahimwareela mukuwoni naari mwa yootthaviwa hoye hoye yooxoriwa hoye hoye ya exapala,

⁵⁴owo alamuleke weera ekuwo yoovaliheya ekatthiweke. Vahoolowaya owo ikaathiki wawaya mahuku mathannameelitho.

⁵⁵Ekuwo yoovaliheya ekatthiweene, musaserdoti* awehaweheke ni oona weera nlepa khaniceendyeiye naari nihimwareelaxiye, ekuwo eyo ti yoohitteela. Muhise, muhipwatthaka mpatta heeni wa ekuwo nlepa nivalinghaaya.

⁵⁶Vano musaserdoti* awehaweha nlepa na ekuwo ekatthiweene ni oona weera noovukuwa, owo athikileke mpatta ovaliheiye wa ekuwo, exapala hoye hoye yootthaviwa naari yooxoriwa.

⁵⁷Vaheera nlepa nakhumelelatho mukuwoni hoye hoye wa yootthaviwa naari yooxoriwa hata vaxapalani, ti eretta yoowoopiha ya mukuwoni emmwareela, ni sootheene sivaliheiye sihisiweke.

⁵⁸Vano ekatthiweene ekuwo hoye hoye yootthaviwa naari yooxoriwa hata exapala ni nlepa nnamalamala, vano, ekatthiweketho ni enootteelihiwa.”

⁵⁹Iya ikano mwaha wa eretta yoowoopiha ya mukuwoni ya mapururu a ekhondoolo hoye hoye eliinyu*, yootthaviwa hoye hoye yooxoriwa naari ya exapala weera yiitthaniwe yootteela hoye hoye yoohitteela.