Read Makhuwa-Shirima Levitiku 14 Bible Online

Levitiku 14 - Makhuwa-Shirima bible

Levitiku 14

²“Ikano mwaha wa otteelihiwa wa namakokho ti iya: owo aronghiweke wa musaserdoti*

³ni musaserdoti* amuroiheke okerekhere wa okonelingwe, ni angwehaweheke namakokho. Mutthu owo olamihingwe makokho,

⁴musaserdoti* alamuleke weera siruuhiwe ipalame piili ikumi soowaakhuleleya, etthaabwa ya esidari*, ekuwo yooxeera ni ephandi ya hisopo* mwaha wa yoole aneera atteelihiwe.

⁵Vahoolowaya musaserdoti* alamuleke weera mmoha a ipalame yiiveliweke muyoopweni ni maahi a oluusi.

⁶Vano amukuxe mwaapalame mukumi vamoha ni etthaabwa ya esidari*, ekuwo yooxeera ni ephandi ya hisopo*, amuxuweyeke mphomeni mwa mwaapalame iiveliwe mmaahini a oluusi.

⁷Musaserdoti* ammisekeno namakokho aneera atteelihiwe mwa makokho imaara ithannapiili, ni amwiitthaneke ootteelihiwa. Vaholowaya amutaphulele mwaapalame ori ni okumi vanlakani.

⁸Mutthu aneera atteelihiwe akatthe soowarasawe, ametthe mayihi ni mapururu, arapeke ni vahoolowaya onookhala ootteela. Aamalihakaru opaka yeeyo, owo avoloweke okonelingwe, mene akhaleke okerekhere wa eheemaawe wa mahuku mathannameeli.

⁹Vanihukuni nanaathannameeli owo amettheke mayihaawe ootheene, irerusawe, makwikhwaawe ni mapururu ootheene. Owo akattheke ikuwosawe, arapeke ni onookhala ootteelihiwa.

¹⁰Vanihukuni nanaathannamararu aruuheke iputtiputthi ilopwana piili ni yoothiyana emoha ya eyaakha emoha ni soohirakala vamoha ni iliitru* ithannamosa ni nttikha sa ephepa ya etrigu yooreerela yooweetheeliwa makhura ntoko yooveleela ya irooro nitho nttikha na eliitru* emoha ya makhura.

¹¹Musaserdoti* ompakiha ootteelihiwa amoonihereke mutthu owo vamoha ni sooveleelasawe wa Yave vamulako wa Eheema ya Muthukumano*.

¹²Vano musaserdoti* akuxeke emoha ya iputtiputthi ilopwana, ni iiveke ntoko yooveleelela nthowa vamoha ni nttikha na eliitru* emoha ya makhura; owo iinainiheke ohoolo wa Yave ntoko yooveleela yoowiinainihiwa.

¹³Owo iiveleke eputtiputthi vaNipuroni Nootteela* siniiveliwaayawo sooveleelela soottheka ni soohisa. Hiiho ntoko simpakiwaaya sooveleelela soottheka, hiihotho sooveleelela nthowa ti sa musaserdoti*; ti sootteelaxa.

¹⁴Musaserdoti* ahingeke ephome ya yooveleelela nthowa okhipi wa naaru noolopwana na yoowo aneera atteelihiwe, vakathani etokweene ya ntatanawe noolopwana ni ya nnaawonawe noolopwana.

¹⁵Vahoolowaya musaserdoti* akuxeke makhuraawo ni amiineleke muntatanimwawe noothiyana,

¹⁶axuweyeke ekatha ya woolopwana mmakhurani ari muntatani noothiyana ni amisekeno imaara ithannapiili vamaithoni wa Yave.

¹⁷Woottharelana musaserdoti* aheletho makhura ahanle mmatatanimwawe okhipi wa naaru noolopwana na yoowo aneera atteelihiwe, vakathani etokweene ya ntatanawe noolopwana ni ya nnaawonawe noolopwana vasulu wa ephome ya yooveleelela nthowa.

¹⁸Makhura eneera ehale muntatanimwawe musaserdoti* amiineleke mmuru mwa yoowo aneera atteelihiwe, amurehererelaka wiiwanana ni Yave vamaithoni wa Yoowo.

¹⁹Vanonto musaserdoti* iiveke yooveleelela yoottheka ni amureherereleke wiiwanana ni Yave yoole aneera atteelihiwe moohitteelanimwawe. Vahoolowaya musaserdoti* iiveke yooveleela yoohisa,

²⁰ni aveleeleke valtaarini* vamoha ni yooveleela ya irooro ni hiiho onoomurehererela wiiwanana ni Yave namaveleela mwa yoowo anaatteele.

²¹Vaheera mukina akhala namahaawa ahiweraka oliva itthusene seiyo, akuxeke eputtiputthi elopwana emoha ntoko yooveleelela nthowa eniinainiheriwa weera amurehererele wiiwanana ni Yave, vamoha ni iliitru* piili sa ephepa yooreerela yooweetheeliwa makhura ntoko yooveleela ya irooro, nitho nttikha na eliitru* emoha ya makhura,

²²ni aximasiya meeli hoye hoye makhinda meeli ntoko ongwerelaawe — nimoha wa yooveleelela yoottheka ni nikina wa yooveleela yoohisa.

²³Vanihukuni nanaathannamararu owo amuruuheleke musaserdoti* wa otteelihiwawawe vamulako wa Eheema ya Muthukumano*, vamaithoni wa Yave.

²⁴Musaserdoti* akuxeke eputtiputthi wa yooveleelela nthowa vamoha ni nttikha na eliitru* ya makhura, ni iinainihereke ohoolo wa Yave ntoko yooveleela yoowiinainihiwa.

²⁵Musaserdoti* iiveke eputtiputthi wa yooveleelela nthowa, akuxeke ephome vakhaani ni ahingeke okhipi wa naaru noolopwana na yoowo aneera atteelihiwe, vakathani etokweene ya ntatanawe noolopwana ni ya nnaawonawe noolopwana.

²⁶Vahoolowaya musaserdoti* akuxeke makhura awo ni amiineleke muntatanimwawe noothiyana,

²⁷ni amisekeno makhura vakhaani a ntatanawe noothiyana ni nthoonyo noolopwana imaara ithannapiili vamaithoni wa Yave.

²⁸Owo ahingekeno makhura a muntatanimwawe mmapuronimwene mwemmo ohingaawe ephome ya yooveleelela nthowa — okhipi wa naaru noolopwana na yoowo aneera atteelihiwe, vakathani etokweene ya ntatanawe noolopwana ni ya nnaawonawe noolopwana.

²⁹Makhura eneera ehale muntatanimwawe musaserdoti* amiineleke mmuru mwa yoowo aneera atteelihiwe, amurehererelaka wiiwanana ni Yave vamaithoni wa Yoowo.

³⁰Woottharelana iiveke mwaansiya hoye hoye nikhinda nimoha ntoko ongwerelaawe oliva —

³¹nimoha wa yooveleelela yoottheka ni nikina wa yooveleela yoohisa vamoha ni yooveleela ya irooro. Moota hiiho musaserdoti* onoomurehererela wiiwanana ni Yave vamaithoni wa Yoowo mwaha wa yoowo aneera atteelihiwe.”

³²Iya ikano mwaha wa yaawo arino makokho ehikhalanaka maveleelelo a otteelihiwawaya.

³³Yave aamweerela Moisesi ni Aharoni:

³⁴“Mwaavolowaka mulaponi ya oKanaani Miyo kineeraaka koovaheeni ntoko yawinyu ni Miyo kiikaathera eretta yoowoopiha ya muxirini enamwareela mpaani mweelaponi eyo,

³⁵vano muneene a empa eyo aroweke wa musaserdoti* weera amweerele: ‘Kinoona ntoko nookhala muxirini nlepa na eretta yoowoopiha mpaanimwaka.’

³⁶Musaserdoti* alamuleke weera sikhumihiwe itthu sootheene siri mpaani, owo ahinaaye ovolowa weera sootheene sirimo sihithatuwe soohitteela. Vahoolowaya musaserdoti* avoloweke ni awehaweheke empa.

³⁷Owo awehawehe malepa a muxirini ni awo yarimbelela hoye hoye yaxeera ni yakhala ntoko aaphiya mpuwa,

³⁸musaserdoti* akhumeke mpaani ni ahiyeke ewaleliwo wa mahuku mathannameeli.

³⁹Vanihukuni nanaathannameeli musaserdoti* ahokoloweke weera awehawehe empa. Vano malepa yamwareela muxirini,

⁴⁰owo alamuleke weera indyerwa soovaliheya ni malepa sivenxiweke ni sivonyeriweke vanipuroni noohitteela okhwipi wa esidade.

⁴¹Owo alamuleke weera ixiri sootheene siwakiwe mpuwapuwa ni seiyo singwakiwa mukulukutthingwe sivonyeriweke vanipuroni noohitteela okhwipi wa esidade.

⁴²Vahoolowaya awo ehokoloxereke indyerwa sikina mmapuroni oopacera ni ekulukutthiweketho.

⁴³Malepa yakhumelelatho emwareelaka muxirini vahoolo wa ovenxiwa wa indyerwa ni okulukutthiwawaya,

⁴⁴musaserdoti* aroweke ni awehaweheke ni malepa yamwareela muxirini, ti eretta yoowoopiha ya muxirini; empa eyo ti yoohitteela.

⁴⁵Empa eyo ekurumuliweke — indyerwa, itthaabwa ni mookulukutthiwa moothemwene, ni sootheene iyo siriheliweke vanipuroni noohitteela okhwipi wa esidade.

⁴⁶Yoole aneera avolowe mpaani mmo ewalingweene, vano onookhala oohitteela mpaka oxekuwa.

⁴⁷Yoowo anaakonemo hoye hoye anaacemo akattheke ikuwosawe.

⁴⁸Vaheera musaserdoti* arwa ni awehaweha, anoona weera malepa khaamwareenletho ekulukutthiwakaru, owo iitthaneke empa eyo yootteela niwoko malepa aalakaseya.

⁴⁹Musaserdoti* akuxe ipalame piili, etthaabwa ya esidari*, ekuwo yooxeera ni ephandi ya hisopo* weera empa etteelihiwe.

⁵⁰Vahoolowaya owo amwiiveleke mwaapalame mmoha muyoopweni ereenemo maahi a oluusi.

⁵¹Woottharelana akuxeke etthaabwa ya esidari*, ephandi ya hisopo*, ekuwo yooxeera ni mwaapalame mukumi ni amuxuweyeke mphomeni mwaapalame iiviwe ni mmaahini a oluusi, ni vano amisekeno empa imaara ithannapiili.

⁵²Owo atteeliheke empa ni ephome ya mwaapalame, maahi a oluusi, mwaapalame mukumi, etthaabwa ya esidari*, ephandi ya hisopo* ni ekuwo yooxeera.

⁵³Vaholowaya amutaphuleleke mwaapalame mukumi vanlakani okhwipi wa esidade. Moota hiiho owo onoorehererela wiiwanana ni Yave wa empa, ni empa eyo enootteelihiwa.”

⁵⁴Iya ikano mwaha wa makokho, ovele,

⁵⁵malepa a eretta yoowoopiha ya mukuwoni hoye hoye muxirini,

⁵⁶soowiipa, ethuku naari nleepela noowaara

⁵⁷weera yooneye etthu yaareene yootteela hoye hoye yoohitteela. Iya ikano mwaha wa yakhalaru ekhalelo ya makokho ni malepa a eretta yoowoopiha.