Read Makhuwa-Shirima Levitiku 16 Bible Online

Levitiku 16 - Makhuwa-Shirima bible

Levitiku 16

¹Yave aahuuluma ni Moisesi vahoolo wa okhwa wa anamwane asilopwana eeli a Aharoni niwoko na waattamela ohoolo wa Yave.

²Yave aamweerela Moisesi: “Mwamuleele munninyu Aharoni weera ahivoloweke yakhalaru ehuhu ontthunaawe vaNipuroni Nootteelaxa*, wiithela eluttu ohoolo wa ekhuneelelo ya vArkani* a Wiiraana weera ahikhwe, niwoko Miyo kinimwiixoonihera munihutteni vasulu wa ekhuneelelo eyo ya varkani* a Wiiraana.

³Vano Aharoni avolowe nipuro nenenenno moota ola: amukuxe mwaamombe ntoko yooveleelela yoottheka ni napunci ntoko yooveleela yoohisa.

⁴Owo awareke mukaandyo wa eliinyu* wootteeliheriwa ni kaputtula campuwa a nliinya nootteettheya; owo iitthukeleke laambatho a nliinya nootteettheya ni atthukeke ecireemba ya eliinyu*. Ikuwosene seiyo ti sootteela — tivawo arapeke ahinaaye owara.

⁵Owo aakheleke wa aYixrayeli ipuri ilopwana piili ntoko yooveleelela yoottheka ni napunci ntoko yooveleela yoohisa.

⁶Aharoni amwiiveke mwaamombe ntoko yooveleelela sootthekasawe iirehererelaka owo ni emusaawe wiiwanana ni Yave.

⁷Vahoolowaya akuxe ipuri piili, oonihereke vamaithoni wa Yave vamulako wa Eheema ya Muthukumano*.

⁸Owo ampakeke mwaathanle wa ipuri piili — emoha wa Yave ni ekina eneera yoomoleliwe munikareni.

⁹Aharoni aruuhe epuri yoothanleliwa Yave ni iiveke ntoko yooveleelela yoottheka.

¹⁰Vaheera epuri ekina eyo ethanleliwe woomoleliwa munikareni yooniheriweke ekumeene vamaithoni wa Yave weera ereherereliweno wiiwanana ni Yave woowoomoleliwa munikareni ntoko epuri enkuxa nthowa.

¹¹Aharoni amuruuheke mwaamombe ntoko yooveleelela sootthekasawe weera iirehererele yoowo ni emusaawe wiiwanana ni Yave ni owo amwiiveke ntoko yooveleelela yootthekaawe.

¹²Owo akuxeke enghiseriwa erubani* yoosareya makhala a valtaarini* ari ohoolo wa Yave ni erubani* matata meeli ephepeene yoowunkhelaxa ni arongheke wiithela eluttu.

¹³Owo ahiseke erubani* vamaithoni wa Yave ni mwiixi wa erubani* onookuttelela ekhuneelelo eri vasulu itthaabwa sa Wiiraana weera ahikhwe.

¹⁴Owo akuxe ephome vakhaani ya mwaamombe ni amisereke ni ekatha mpatta wa ohoolo wa ekhuneelelo; vahoolowaya amisereke ni ekatha ephomeene yeeyo imaara ithannapiili ohoolo wa ekhuneelelo.

¹⁵Woottharelana amwiiveke napunci oomveleelela yoottheka eerelaka muloko ni arongheke ephome wiithela eluttu; apakeleke ephome eyo mooteene yoowo opankaawe ni ya mwaamombe: amisereke ekhuneelelo ni ohoolowaya.

¹⁶Moota hiiho onoorehererela Nipuro Nootteela* wiiwanana ni Yave niwoko na ohitteela ni ovaanya wa aYixrayeli — sakhalaru sootthekasaya sootheene. Owo apakeleketho Eheema ya Muthukumano* eri eriyaraaya moohitteelanimwaya.

¹⁷Ahikhaleru mukina aneera avolowe Muheemani ya Muthukumano* okhuma ehuhuweene yeeyo Aharoni aneeraawe avolowe weera arehererele wiiwanana ni Yave Nipuro Nootteela* mpaka okhumawawe amalihaleene wiirehererela owo, emusaawe ni muloko wootheene wiiwanana ni Yave.

¹⁸Vano owo aroweke valtaarini* ari vamaithoni wa Yave, ni vawo areherereleke wiiwanana ni Yave. Owo akuxe ephome vakhaani ya mwaamombe ni ya napunci, ahingeke mmanyakani ootheene a altaari*.

¹⁹Owo amisereke ephome vakhaani ni ekatha imaara ithannapiili weera aarapihe ni aatteelihe yaawo mwa ohitteela wa aYixrayeli.

²⁰Aharoni aamalihaka orehererela wiiwanana ni Yave Nipuro Nootteelaxa*, Eheema ya Muthukumano* ni altaari*, owo amurongheke ohoolo napunci mukumi.

²¹Owo iikaathereke matataawe oomeeli mmuru mwa napunci mukumi, alapeke sootakhala sootheene ni ovaanya wootheene wa aYixrayeli — sootthekasaya sootheene — ni iikaathiki seiyo mmuru mwa napunci. Vahoolowaya amurumiheleke napunci munikareni awehawehiwaka ni mulopwana othanleliwe yeeyo.

²²Napunci onoorowano soottheka sootheene sa aYixrayeli vanipuroni na meekhaawe; ni mulopwana owo onoomutaphulela munikareni.

²³Vahoolowaya Aharoni avoloweke Muheemani ya Muthukumano*, aruleke ikuwo sa eliinyu* aawarenlaawe weera avolowe vaNipuroni Nootteelaxa*, ni ahiyekemo.

²⁴Owo arapeke vaNipuroni Nootteela*, awareke ikuwosawe sa khula nihuku. Vanonto akhumeke, iipakeleke yooveleela yoohisa ni yooveleela yoohisa wa muloko, iirehererelaka owo ni muloko wiiwanana ni Yave.

²⁵Owo ahisereketho valtaarini* makhura a yooveleelela soottheka.

²⁶Mulopwana yoowo aneera amutaphulele napunci munikareni, akattheke soowarasawe ni arapeke; vahoolowaya avoloweke okonenle muloko.

²⁷Emombe ni napunci wa sooveleelela soottheka, mwa seiyo ephomaaya eruuhiwe vaNipuroni Nootteelaxa* weera erehererele wiiwanana ni Yave, eroihiweke okhwipi wa okonelingwe; ixapalasaya, ethai ni marupwaaya sihisiweke.

²⁸Mulopwana aneera ahise seiyo akatthe ikuwosawe, arapeke ni vahoolowaya avoloweke okonelingwe.

²⁹Ekanowaanyu yoohimala ti ela: vanihukuni nanaamuloko na mweeri wanaathannamiili mwiiyevihe ni muhivareru muteko — akhalaka muYixrayeli xaxaxa hoye hoye namarwa onkhala variyariwanyu,

³⁰niwoko vanihukuni nenenenno munooreherereliwa wiiwanana ni Yave weera mutteelihiwe. Vano munookhala ootteelihiwa mwa sootthekasanyu vamaithoni wa Yave.

³¹Ti eSaabadu ya wiitthuuwa ni mwiiyevihe; ti ekano yoohimala.

³²Musaserdoti* oothanliwa ni oottikittheliwa weera aarandele atithawe ntoko mutokweene a asaserdoti*, areherereleke wiiwanana ni Yave. Owo aware ikuwo sa eliinyu* sootteela,

³³areherereleke wiiwanana Nipuro Nootteelaxa*, Eheema ya Muthukumano*, altaari*, asaserdoti* ni atthu ootheene a muloko.

³⁴Ekanowaanyu yoohimala ti ela: orehererela wiiwanana ni Yave opakiweke emaara emoha vayaakhani wa soottheka sootheene sa aYixrayeli.” Ni sootheene saapakiwa ntoko Yave aamulamulenlaawe Moisesi.