Read Makhuwa-Shirima Levitiku 18 Bible Online

Levitiku 18 - Makhuwa-Shirima bible

Levitiku 18

¹Yave aamweerela Moisesi:

²“Mwaaleele aYixrayeli ha: ‘Miyo ti Yave Mulukwaanyu.

³Muhipake yeeyo ampakaaya awExipitu mwaakhalaanyu ni muhipake yeeyo empakiwa mweelaponi mwa oKanaani mwa weiwo kineeraaka koorongheni. Muhitthare mweettelowaaya.

⁴Mweetteleke soolamulelasaka, mwiiwelelaka ikanosaka ni muttharihe. Miyo ti Yave Mulukwaanyu.

⁵Mutthareke ikanosaka ni malamulowaaka. Vano yoowo aneera iiwelele onookhalela yaawo. Miyo ti Yave.

⁶Ahikhaleru anaamukhuveele mmusaawe weera amukoneno. Miyo ti Yave.

⁷Muhaaveihe atithinyu mwaakonanaka amayinyu. Awo ti amayinyu — muhaakoneno.

⁸Muhaakoneno amwaara a atithinyu — hiiho munimwaaveiha atithinyu.

⁹Muhimukoneno murokorinyu; akhalaka mwaana a atithinyu naari a amayinyu; hata akhalaka xaxaxa hoye hoye a nipuro nikina.

¹⁰Muhimukoneno mwaana a mwaninyu mulopwana naari a mwaninyu muthiyana; hiiho munooveiheya.

¹¹Muhimukoneno mwaana muthiyana a mwaara a atithinyu; aayariweene ni atithinyu — owo ti murokorinyu.

¹²Muhimukoneno murokoraya atithinyu; ti emusi xaxaxa ya atithinyu.

¹³Muhimukoneno munnaya amayinyu — ti emusi xaxaxa ya amayinyu.

¹⁴Muhimuveihe munnaya atithinyu ngwaattamelaka amwaariye weera mwaakoneno; awo ti amayinu.

¹⁵Muhimukoneno mwaara a mwaninyu; ti mwaara a mwaninyu; muhimukoneno.

¹⁶Muhimukoneno mwaara a munninyu; eyo enoomveiha munninyu.

¹⁷Muhimukoneno muthiyana nitho mwanawe muthiyana. Muhimukoneno naari mwaana muthiyana a mwanawe mulopwana hata mwaana muthiyana a mwanawe muthiyana; awosa ti amusi xaxaxa. Eyo ti mwiikho.

¹⁸Muhimuthele naari muhimukoneno munna a mwaarinyu awo nlelo ereene ni okumi, mwaawanawanihaka.

¹⁹Muhimwaattamele muthiyana weera munkoneno mweehuhuni ya ohitteela wa waatalawawe.

²⁰Muhimukoneno mwaara a mukhwiinyu mwiiveihaka ni yoowo.

²¹Muhiwinnyerereru anamwaniinyu weera yiiviwe ntoko yoomveleelela Molekhi, niwoko khoontthuniheriwa oveiha Nsina na Mulukwaanyu. Miyo ti Yave.

²²Muhimukoneno mulopwana mukina ntoko ni muthiyana; eyo ti ya mwiikho.

²³Muhimukoneno mwaamunama mwiivalihakano. Muthiyana ahiixinnyerere wa mwaamunama weera amukoneno; khavapiliwo.

²⁴Muhiivalihe ni yakhalaru etthu ya seiyo, niwoko ti hiiho siivalinghaaya miloko kineeraaka koomole ohoolowanyu.

²⁵Mpakatho elapo yoovaliheya ni Miyo kaattaruxa sootakhalasaya ni elapo yaahaarapheya amakaaya.

²⁶Vaheera nyuwosa mwiiwelele malamulowaaka ni ikanosaka. aYixrayeli ni anamarwa ankhala variyariwanyu ehipakeru itthusene seiyo sa mwiikho.

²⁷Vano itthu sootheene seiyo saapakiwa ni yaale yaamanke mweelaponi nyuwo muhinaaye ni elapo yaavaliheya.

²⁸Nyuwosa mwavaliha elapo, eyo enimoorapheyani nyuwosa ntoko yaarapheyaaya yaawosa yaamankemo nyuwosa muhinaaye.

²⁹Ootheene yaale eneera epake itthu iyo sa mwiikho — awosa ootheene anoomalamalihiwa mmulokonimwaya.

³⁰Mwiiwelele ikanosaka ni muhitthareru sookhovelela sa mwiikho saapakiwa nyuwosa muhinaaye ni muhiivalihe ni seiyo. Miyo ti Yave Mulukwaanyu.’”