Read Makhuwa-Shirima Levitiku 2 Bible Online

Levitiku 2 - Makhuwa-Shirima bible

Levitiku 2

¹Yoole aneera amuruuhele Yave yooveleela ya irooro, yooveleelaawe ekhaleke ya ephepa yooreerela. Vasuluwaya owo amiineleke makhura ni iikaathiki erubani*,

²aaroiheleke asaserdoti*, anamwane asilopwana a Aharoni. Mmoha a yaawo anyottoleke ephepa yooreerela, makhura ni erubani* yootheene, ahisereke valtaarini* ntoko eyuupuxero. Ti yooveleela yoohisa, yooveleela erehereriwe vayikho, yooveleela yoowunkhelaxa enimusiveliha Yave.

³Singhala iyo sa sooveleela sa irooro ti sa Aharoni ni anamwanaawe; ti mpatta wootteelaxa wa sooveleela ompakeliwa Yave soorehereriwa vayikho.

⁴Nyuwo mwaruuha yooveleela ya irooro yoowooxiwa vayikho, eyo ekhaleke ya ephepa yooreerela: iboolu soopakiwa woohikhalano eferementu ni sooweetheeliwa makhura, hoye hoye ipaawu sikhaanene soohikhalano eferementu ni soottikittheliwa makhura.

⁵Yooveleelaanyu ya irooro yarehereriwa munooxeriwa, eyo ekhaleke ya ephepa yooreerela yooweetheeliwa makhura yoohikhalano eferementu.

⁶Muttikitthe ni mmiinele makhura; ti yooveleela ya irooro.

⁷Yooveleelaanyu ya irooro yaapeiwa mmwaapuni, eyo ekhaleke ya ephepa yooreerela ni makhura.

⁸Munruuhele Yave yooveleela ya irooro yoopakiwa ntoko ohimeriwaaya ni mmwinnyerereke musaserdoti*, mwa yoowo aneera aronghe valtaarini*.

⁹Owo avenxeke mpatta wa eyuupuxero ya yooveleela ya irooro ni ahisereke valtaarini*; ti yooveleela erehereriwe vayikho, yooveleela yoowunkhelaxa enimusiveliha Yave.

¹⁰Singhala iyo sa sooveleela sa irooro ti sa Aharoni ni anamwanaawe; ti mpatta wootteelaxa wa sooveleela ompakeliwa Yave soorehereriwa vayikho.

¹¹Khula yooveleela ya irooro yootheene muneeraanyu munrongheleke Yave ehiheliwe eferementu, niwoko khoontthuniheriwa ohisa eferementu naari oravo mwaampakelaka yooveleela Yave yoorehereriwa vayikho.

¹²Nyuwo munrongheleke yeeyo Yave ntoko yooveleela ya soowiima soopacera, mene muhiveleelele valtaarini* ntoko yooveleela yoowunkhelaxa.

¹³Muutuwanyere maakha sooveleelasanyu sootheene sa irooro. Muhihiye sooveleelasanyu sa irooro soohiheliwa maakha a wiiraana wa Mulukwaanyu; mwaandyeerere maakha sooveleelasanyu sootheene.

¹⁴Nyuwo mwamuruuhela Yave yooveleela ya irooro ntoko yooveleela ya soowiima soopacera, munruuhele inuku soottikitthiwa sa irooro inyowani soowaarikiwa.

¹⁵Mmiinelekewo makhura ni muheleke erubani*; ti yooveleela ya irooro.

¹⁶Musaserdoti* ahiseke mpatta wa eyuupuxero ya irooro soottikitthiwa ni makhura vamoha ni erubani* yootheene ntoko yoomveleelela Yave yoorehereriwa vayikho.