Read Makhuwa-Shirima Levitiku 20 Bible Online

Levitiku 20 - Makhuwa-Shirima bible

Levitiku 20

¹Yave aamweerela Moisesi:

²“Mwaleele aYixrayeli: ‘Khula muYixrayeli hoye hoye namarwa onkhala oYixrayeli mwa yoowo aneera amwinnyerere mmoha a anamwanaawe wa Molekhi, iiviweke. Muloko wa mweelaponi omvonyeke maluku.

³Miyo kinoothatuwa Mwiittana a mulopwana owo ni kinoommalamaliha mmulokonimwawe, niwoko oowinnyerera anamwanaawe Molekhi, avalihaka Nipuronaka Nootteela* ni aramusaka Nsinanaka Nootteela.

⁴Vano muloko waahipwattha mulopwana owo aamwinnyereraka mmoha wa anamwanaawe wa Molekhi ohinamuthorihela okhwa,

⁵Miyo kinoothatuwa Mwiittana a mulopwana owo ni emusaawe ni kinoommalamaliha mmulokonimwawe owo ni ootheene animutthara ntoko mapuuta a Molekhi.

⁶Miyo kinoothatuwa Mwiittana a mulopwana yoowo onaahera ihako hoye hoye onuuluma ni anamakhwa. Yoole ompaka hiiho onoothatuwa puuta ni Miyo kinoommalamaliha mmulokonimwawe.

⁷Mwiitteelihe ni mukhaleke ootteela, niwoko Miyo ti Yave Mulukwaanyu.

⁸Mwiiwelele ikanosaka ni mutthare. Miyo ti Yave kinootteelihani.

⁹Mukina aneera aalaphe atithawe hoye hoye amayawe, iiviweke. Woowaalapha atithawe hoye hoye amayawe, oophwanela okhwa.

¹⁰Mulopwana araruwa ni mwaara a mukina — mwaara a mukhwaawe — ooweeli awosa yiiviweke.

¹¹Mulopwana aakonano amwaaraya atithawe, owo ohaaveiha atithawe. Mulopwana ni muthiyana owo yiiviweke, niwoko aaphwanela okhwa.

¹²Mulopwana amukonano mwaara a mwanawe mulopwana, ooweeli awo yiiviweke. Yeeyo apankaaya ti yoonanaraxa; awosa aaphwanela okhwa.

¹³Asilopwana yakonihana ntoko onkonaneliwaawe muthiyana, ooweeli aapaka yeeyo eri ya mwiikho. Awosa yiiviweke; aaphwanela okhwa.

¹⁴Mulopwana amwaatteya mwaana ni amayawe, ti yoonanara. Owo vamoha ni yaawosa ehisiweke weera sihikhaletho sootakhala variyariwanyu.

¹⁵Mulopwana amukonano mwaamunama, owo iiviweke ni ontthuneya nyuwosa omwiivatho mwaamunama.

¹⁶Muthiyana amwaattamela mwaamunama weera amukoneno, mmwiive muthiyana nitho mwaamunama; awosa yiiviweke niwoko aaphwanela okhwa.

¹⁷Mulopwana amuthela murokoriye, mwaana muthiyana a atithawe hoye hoye amayawe ni amukonano, ti ya mwiikho. Awosa emalamalihiweke vamaithoni wa mulokwaaya. Owo oomveiha murokoriye ni onoohaawa mwa sootakhalasawe.

¹⁸Mulopwana amukonano muthiyana mweehuhuni ya mpingwaawe, ooweeli awosa aakhalano nthowa na ohoonelamo oyeeheya wa ephomaawe; tivawo ooweeli emalamalihiweke mmulokonimwaya.

¹⁹Muhimukoneno munnaya amayinyu hoye hoye murokoraya atithinyu, niwoko eyo enooveiha emusi xaxaxa; ooweeli nyuwosa munoohaawa mwa sootakhalasanyu.

²⁰Mulopwana aakonano amwaaraya atatawe, ohaaveiha atatawe. Awosa anoohaawa mwa sootakhalasaya ni animookhwa ehiyanre.

²¹Mulopwana amuthela mwaara a munneiye, ti etthu yoohitteela; owo oomuveiha munniye. Awosa kheeyarasa.

²²Mwiiwelele ikanosaka ni malamulowaaka ootheene ni mutthare weera elapo kinooronghaakani ehoorapheyeni.

²³Muhitthare ikhovelelo sa miloko seiyo kineeraaka koomole ohoolowanyu. Woopaka itthusene seiyo sa mwiikho, koothanya miloko iyo.

²⁴Vaheera kaaweerelani: “Munookuxa elapwaaya; kinimoovahani ntoko yoohiyeriwa; elapo yoosareya mukaka ni oravo.” Miyo ti Yave Mulukwaanyu koothanlaleni eriyari ya miloko.

²⁵Tivawo ontthuneyaaya weera nyuwo mwaakawanyihe axinama ootteela ni oohitteela ni ipalame sootteela ni soohitteela. Muhiivalihe ni axinama hoye hoye ipalame, naari yakhalaru yoopattuxiwa eniipurula ni ennyongolowa mwa seiyo kookawanyihenraakani niwoko na ohitteelawaya.

²⁶Nyuwosa mukhaleke ootteela wa Miyo, niwoko Miyo, Yave, ti Ootteela ni kohoomwaramwaxani eriyari ya miloko weera mukhale mulokwaaka.

²⁷Alopwana hoye hoye athiyana variyariwanyu anaahera ihako hoye hoye anuuluma ni anamakhwa, yiiviweke. Awosa evonyiweke maluku — awosa aaphwanela okhwa.’”