Read Makhuwa-Shirima Levitiku 22 Bible Online

Levitiku 22 - Makhuwa-Shirima bible

Levitiku 22

¹Yave aamweerela Moisesi:

²“Mwamuleele Aharoni ni anamwanaawe asilopwana weera ettittimihe sooveleela sootteela aYixrayeli ankitteeliheraaya esembaka oveiha Nsinanaka Nootteela. Miyo ti Yave.

³Mwawooperere: Wa ikhapira sootheene sa muhoolo, mukina a ekhapiraawe akhala oohitteela aakhuveelaka sooveleela sootteela aYixrayeli animutteeliheraaya Yave, mulopwana owo amalamalihiwe vamaithoniwaka. Miyo ti Yave.

⁴Ahikhaleru a ekhapira ya Aharoni orino makokho hoye hoye enimukhuma ephome, aneera ace yooveleela yootteela mpaka aneeraawe atteelihiwe. Owo onookhalatho oohitteela atava etthu yookhwa hoye hoye ni yamukhuma elopwana,

⁵naari atava yakhalaru yoopattuxiwa hata akhalaru mutthu aneera amutatuxe oohitteela ni wakhalaru moota wa ohitteela.

⁶Yoowo aneera atave itthusene seiyo onookhala oohitteela mpaka oxekuwa. Owo ahice yooveleela yootteela ahirampe.

⁷Wiilaleene, onookhala ootteela ni vahoolowaya aceeke yooveleela yootteela, niwoko ti yoocaawe.

⁸Owo ahimukhuuretho mwaamunama oovettuliwa hoye hoye oonyaanyiwa ni axinama a ntuphini athatuwaka hiiho oohitteela mwa seiyo. Miyo ti Yave.

⁹Asaserdoti* yiiweleleke ikanosaka weera ehikhalane nthowa ekhwaaka niwoko na oramusa seiyo. Miyo ti Yave kinaatteeliha.

¹⁰Aceeke paahi musaserdoti* ni emusaawe yooveleela yootteela; muletto a musaserdoti* hoye hoye namutekwaawe ahiceekeru.

¹¹Vaheera musaserdoti* athuma epottha hoye hoye epottha yaayareliwa vaatevawe, epottheene yeeyo eceeke yoocaawe.

¹²Mwaana muthiyana a musaserdoti* atheliwa ni mulopwana oohikhala musaserdoti*, vano awosa ehice yooveleela yootteela.

¹³Vaheera mwaana muthiyana a musaserdoti* akhala naamukhweli hoye hoye amwalana ahiyanre, anahokoleela vaate wa atithawe ntoko aakhalaawe mweehuhuni ya emwalaawe, owo aceeke yooca ya atithawe. Ahiceru mutthu mukina.

¹⁴Mukina aca woohilakela yooveleela yootteelihiwa, owo aliveleke yooveleela ya musaserdoti* ni aandyeereretho mpatta wanaathanu wa ociiyaawe.

¹⁵Asaserdoti* ehiveihe sooveleela sootteela aYixrayeli animuruuhelaaya Yave,

¹⁶yaatthuniheraka oca sooveleelasene seiyo, yaaruuhelaka nthowa ninnyesereriwa oreherera. Miyo ti Yave kinaatteeliha.”

¹⁷Yave aamweerelatho Moisesi:

¹⁸“Mwamuleele Aharoni, anamwanaawe asilopwana ni aYixrayeli ootheene: ‘Akhala mukina a nyuwosa, akhalaka muYixrayeli hoye hoye namarwa onkhala oYixrayeli, aruuha yoomveleelela Yave ntoko yoohisa, hata ekhalaka yooveleela yookwanihera nlipelo hoye hoye yooveleela ya otthunawawe paahi,

¹⁹vano mulopwana owo amuruuheke mwaamunama mulopwana oohirakala a imombe, ikhondoolo hoye hoye ipuri weera aakhuleliwe mwaha wa nyuwo.

²⁰Muhimuruuheru mwaamunama oorakala niwoko khamwaakhuleleliwa mwaha wa nyuwo.

²¹Mukina aamuruuhaka mwaamunana a emombe, hoye hoye a muhuwo wa ikhondoolo ntoko yooveleelela murettele wa Yave weera akwanihere nlipelo hoye hoye niwoko na otthunawawe, vano eyo ekhale yoohirakala ni yookwanela weera yaakhuleliwe.

²²Muhimupakele Yave yooveleela ya mwaamunana oohoona, oovulalihiwa naari oorakala, ookwituwa mwetto, hata oovoreyeya oosareya makhwatta a ithuku hoye hoye ookhuma marohi. Muhimwiikaathiru valtaarini* ntoko yoomveleelela Yave yoorehereriwa vayikho.

²³Wa soothesene ontthuniheriwa opaka yooveleela ya otthunawanyu ya emombe elopwana hoye hoye ekhondoolo yoorakala hoye hoye yootuthunya, mene eyo khayaakhuleliwa mwaakwaniheraka nlipelo.

²⁴Muhimupakele Yave yooveleela ya mwaamunama orino ikhete soorakala, soonyaanyeya, soophweeya hoye hoye soothikiliwa. Muhipake yeeyo mweelaponimwanyu,

²⁵hata muhiwaakhele axinama ntoko awo mwa anamarwa weera mwaavahe ntoko yaawo ntoko yooca wa Mulukwaanyu. Awosa khamwaakhuleleliwa niwoko ti oohikwanela ni oorakala.

²⁶Yave aamweerela Moisesi:

²⁷“Aayariwaka mwaamombe, eputtiputthi hoye hoye mwaapuri, owo akhaleke mahuku mathannameeli ni naangolo. Okhuma nihuku nanaathannamararu wookela ohoolo onimwaakhuleliwa ntoko yoomveleelela Yave yoorehereriwa vayikho.

²⁸Muhiive emombe, ekhondoolo, naari epuri ethiyana vamoha ni axaanaaya nihuku nimoha.

²⁹Mwaampakelaka Yave yooveleela ya otthapela, mpake yooveleeleene yeeyo moota wooweera mwaakhuleleliwe.

³⁰Eyo ekhuuriweke nihuku nenenenno; muhihiyeru mpaka waaxiiye. Miyo ti Yave.

³¹Mwiiwelele malamulowaaka ni mutthare yaawo. Miyo ti Yave.

³²Muhiveihe Nsinanaka Nootteela. Miyo kinoosuweliwa ntoko Ootteela ni aYixrayeli. Miyo ti Yave kinootteelihani

³³ni kookhumihaleni wExipitu weera kikhale Mulukwaanyu. Miyo ti Yave.”