Read Makhuwa-Shirima Levitiku 23 Bible Online

Levitiku 23 - Makhuwa-Shirima bible

Levitiku 23

¹Yave aamweerela Moisesi:

²“Mwaaleele aYixrayeli: ‘Ifestasaka, ifesta sithanliwe ni Yave muneeraanyu mulaleiyeke ntoko mithukumano sootteela, ti iya:

³Aakhala mahuku mathannamosa oovaraanyu muteko, mene nihuku nanaathannameeli ti eSaabadu ya wiitthuuwa, nihuku na muthukumano wootteela. Muhivareru muteko wakhalaru muneeraanyu mukhalewo; ti eSaabadu wa Yave.

⁴Ifesta sithanliwe sa Yave, mithukumano sootteela muneeraanyu mulaleiye mweehuhunimwaya ti iya:

⁵mPaska* a Yave ompacera mweehuhuni ya wiila vanihukuni nanaamuloko nimaxexe na mweeri woopacera.

⁶Vanihukuni nanaamuloko nimathanu na mweereene yoowo empacera efesta ya Yave, efesta ya ipaawu soohikhalano eferementu; wa mahuku mathannameeli muceeke ipaawu soohikhalano eferementu.

⁷Vanihukuni noopacera mpakeke muthukumano wootteela ni muhivareru muteko.

⁸Mumpakele Yave sooveleela soorehereriwa vayikho wa mahuku mathannameeli ni vanihukuni nanaathannameeli, mpakeke muthukumano wootteela ni muhivareru muteko.

⁹Yave aamweerela Moisesi:

¹⁰“Mwaaleele aYixrayeli: ‘Nyuwosa mwaavolowaka mweelaponi kineeraaka koovaheeni ni mwaahephaka, munruuhele musaserdoti* ehupu ya etrigu yoopacera muneeraanyu muhephe.

¹¹Owo iinainihere ehupu eyo ohoolo wa Yave weera mwaakhuleleliwe; musaserdoti* iinainihere ehupu eyo waaxiiye eSaabadu.

¹²Nihuku musaserdoti* aneeraawe iinainihe ehupu, mumpakele Yave yooveleela yoohisa ya eputtiputthi erino eyaakha emoha ni yoohirakala.

¹³Mumveleeleletho Yave yooveleela ya irooro ya ikiilu* ixexe ya ephepa yooreerela yooweetheeliwa makhura yoorehereriwa vayikho, yoowunkhela yooreeraxa nitho yooveleela yoowura ya eliitru* emoha ya eviinyu.

¹⁴Muhiceru yooca naari erooro yoowaarikiwa hata ekithi mpaka nihuku nenenenno muneeraanyu munruuhele yooveleela eyo Mulukwaanyu. Nna nikhaleke nlamulo noohimala wa ikhapirasanyu sootheene nakhalaru nipuro muneeraanyu mmake.

¹⁵Okhuma waaxiiye eSaabadu, nihuku nenenenno muneeraanyu muruuhe ehupu ya yooveleela yoowiinainihera, mwaalikeleleke isimana ithannapiili sookwanelasene.

¹⁶Mwaalikelele mahuku miloko mithanu mpaka waaxiiye eSaabadu yanaathannapiili ni vano mumveleelele Yave yooveleela ya erooro enyowani.

¹⁷Muneeraanyu mmakeru, murwaaneke owaani ipaawu piili soopakiwa ni eferementu ya ikiilu* ixexe sa ephepa yooreerela soowooxiwa ntoko yooveleela yoowiinainihera ya soowiima soopacera wa Yave.

¹⁸Mveleele vamoha ni ipaawusene seiyo iputtiputthi ithannapiili ilopwana, khula eputtaputthi ya eyaakha emoha ni yoohirakala, mwaamombe mulopwana mmoha ni anapunci eeli. Iyo nsikhale soomveleelela Yave soohisa vamoha ni sooveleelasaya sa irooro ni soowura — sooveleela soorehereriwa vayikho, soowunkhelaxa sinimusiveliha Yave.

¹⁹Vahoolowaya mmwiive napunci mmoha ntoko yooveleelela yoottheka ni iputtiputthi piili, khula eputtiputthi ya eyaakha emoha, ntoko yooveleelela murettele.

²⁰Musaserdoti* iinainihere vamaithoni wa Yave iputtiputthi piili iyo ntoko yooveleela yoowiinainihera vamoha ni ipaawu sa soowiima soopacera. Eyo ti yooveleela yootteela wa Yave ni ti sa musaserdoti*.

²¹Nihuku nenenenno mpakeke muthukumano wootteela ni muhivareru muteko. Nna nikhaleke nlamulo noohimala wa ikhapirasanyu sootheene nakhalaru nipuro muneeraanyu mmake.

²²Nyuwosa mwaahephaka mmattamwanyu, muhiphiye mmakoteloni hata muhittottattotte simmoramora mwaahephaka. Mwaahiyere oohaawa ni anamarwa. Miyo ti Yave Mulukwaanyu.

²³Yave aamweerela Moisesi:

²⁴“Mwaaleele aYixrayeli: ‘Vanihukuni noopacera na mweeri wanaathannamiili nikhaleke nihuku noowiitthuuwa, muthukumano wootteela opakiweke ni oruma wa mapalapatta.

²⁵Muhivareru muteko, mene mumveleelele Yave yooveleela yoorehereriwa vayikho.

²⁶Yave aamweerela Moisesi:

²⁷Nihuku nanaamuloko na mweeri wanaathannamiili ti nihuku na orehererela wiiwanana ni Yave. Mpakeke muthukumano wootteela, mwiiyevihe ni mumveleelele Yave yooveleela yoorehereriwa vayikho.

²⁸Muhivare muteko vanihukuni nenenenno, niwoko ti nihuku na orehererela wiiwananawanyu ohoolo wa Yave Mulukwaanyu.

²⁹Yoowo aneera ahiiyevihe vanihukuni nenenenno onoomalamalihiwa mmulokonimwawe.

³⁰Kinoomphwata eriyari ya mulokwaawe yoowo aneera avare muteko vanihukuni nenenenno.

³¹Muhivareru muteko. Nna nikhale nlamulo noohimala wa ikhapirasanyu sootheene mmapuroni ootheene muneeraanyu mukhale.

³²Ti eSaabadu ya wiitthuuwa wa nyuwo ni muntthuneya wiiyeviha. Okhuma oxekuwa wa nihuku nanaathannamaxexe na mweeri owo mpaka oxekuwa wa waaxiiye muntthuneya ottittimiha eSaabadu eyo.

³³Yave aamweerela Moisesi:

³⁴“Mwaaleele aYixrayeli: “Vanihukuni nanaamuloko ni mathanu na mweeri wanaathannamiili efesta ya mmikotthani wa Yave epacereke ni eyo epwaherereke wa mahuku mathannameeli.

³⁵Nihuku noopacera okhaleke muthukumano wootteela; muhivareru muteko.

³⁶Mumveleelele Yave sooveleela soorehereriwa vayikho ni vanihukuni nanaathannamararu mpake muthukumano wootteela ni mumveleelele Yave yooveleela yoorehereriwa vayikho. Ti muthukumano woottittimiheya; muhivareru muteko.

³⁷Iya ti ifesta sikhalihiwe ni Yave sintthuneya olaleiya ntoko mithukumano sootteela weera aruuheliwe Yave sooveleela soorehereriwa vayikho — sooveleela soohisa ni sa etrigu; sooveleela sikina ni soovaha sooyeehiwa soonyesererihiwa wa khula nihuku.

³⁸Ohiya toko sooveleela seiyo, sookhalatho seiyo sa iSaabadu sa Yave, soovahasanyu, ni sakhalaru seiyo muroromelinghaanyu nitho sa otthunawanyu munimvahaanyu Yave.

³⁹Hiiho naapaceraka vanihukuni nanaamuloko ni mathanu na mweeri wanaathannamiili muhempheene sootheene muruwenraanyu, mumpakele efesta Yave wa mahuku mathannameeli; nihuku noopacera ni nanaathannamararu ekhaleketho a wiitthuuwa.

⁴⁰Vanihukuni noopacera murukuleke soowiima sooreerela sa nyiri, makukhu a mavare, iphandi soopombaxa sa isalgeru* ni muhakalale vamaithoni wa Yave Mulukwaanyu wa mahuku mathannameeli.

⁴¹Mpake yeeyo ntoko efesta wa Yave wa mahuku mathannameeli a iyaakha sootheene. Nna nikhale nlamulo noohimala wa ikhapirasanyu sootheene mmapuroni ootheene muneeraanyu mukhale. Mpake efesta ela mmweerini wanaathannamiili.

⁴²Mukhaleke mmikotthani wa mahuku mathannameeli. aYixrayeli ootheene ekhaleke mmikotthani

⁴³weera ikhapirasanyu sisuwele weera Miyo kaahaapakiha aYixrayeli okhala mmikotthani kaakhumihaleene wExipitu. Miyo ti Yave Mulukwaanyu.’”

⁴⁴Vano Moisesi ahaalaleera aYixrayeli ifesta aakhalihalaawe Yave.