Read Makhuwa-Shirima Levitiku 25 Bible Online

Levitiku 25 - Makhuwa-Shirima bible

Levitiku 25

¹Yave aamweerela Moisesi vamwaako oSinayi:

²“Mwaaleele ha aYixrayeli: ‘Mwaavolowaka mweelaponi Miyo kineeraaka koovaheeni, elapweene yeeyo emuttittimihereleke Yave eSaabadu.

³Wa iyaakha ithannamosa mwaaleke mmattamwanyu, mukwasereke iwuuvasanyu ni muhepheke mwaanlaanyu.

⁴Vaheera vayaakhani yanaathannapiili elapo ekhalaneke eSaabadu yoowiitthuuwa, emuttittimiherelaka Yave. Muhaale imattasanyu naari muhikwasere iwuuvasanyu.

⁵Muhihephe soomorela naari iwuuva* sa imatta sihikwaseriwe. Elapo ekhalaneke eyaakha yoowiitthuuwa.

⁶Nyuwosa muceeke yeeyo eniiruwere elapo eyaakheeneeyo — nyuwosa, epotthaanyu elopwana ni ethiyana, namuteko onliviwa ni namavira onkhala eriyaraanyu,

⁷nitho mihuwosanyu, axinama a ntuphini a elapwaanyu. Sootheene eneeraaya eruwere elapo siciweke.

⁸Mwaalikele iyaakha sa iSaabadu ithannapiili, eyo tiiyo ithannapiili sa iyaakha ithannapiili, opwexerera ti iyaakha miloko mixexe niithanniixexe.

⁹Vano mulamule weera yiipiwe mapalapatta vanihukuni nanaamuloko na mweeri wanaathannamiili; vanihukuni na orehererela wiiwanana ni Yave mwiipe mweelaponimwanyu moothemwene.

¹⁰Mutteelihe eyaakha yanaamiloko mithanu ni mwaalaleere mweelaponi moothemwene otapuxeyawaya amaki. Wa nyuwosa eniikhale ehuhu ya otthapa, khula mutthu a nyuwo ahokoleelaka owannyawe mweemusinimwawe ni munihimonimwawe.

¹¹Eyaakha yanaamiloko mithanu eniyookhaleleni ya otthapa; muhaale naari muhihephe soomorela hata iwuuva* sa imattasanyu soohikwaseriwa.

¹²Vano ti eyaakha ya otthapa ni yookhalelekeni yootteela; muceeke paahi enruweraaya elapo.

¹³Muyaakhani eyo ya otthapa khula mutthu ahokoleele owannyawe.

¹⁴Mwamuthumihera ettimaanyu mukhwiinyu hoye hoye mwathuma yawawe, mpakelaneke ekhaikhai.

¹⁵Munthumihere mukhwiinyu mwaalikelelaka okhuma Eyaakha ya Otthapa. Vano owo athumiheke aalikelelaka iyaakha sihanle sa ohepha.

¹⁶Saatta iyaakha, mwaandyeerereke mutteengo, vaheera sayeva mvukuleke mutteengo niwoko vekhaikhai yeeyo owo onoothumiheraaweni ti maattelo a ohepha.

¹⁷Mpakelaneke ekhaikhai mmoovaka Mulukwaanyu. Miyo ti Yave Mulukwaanyu.

¹⁸Mutthareke ikanosaka ni mwiiwelele nnenesene malamulowaaka ni munookhala oolipeene mweelaponi.

¹⁹Vano elapo enimwiimiha soowiimasaya ni munimooca mpaka ovona, mukhalaka oolipeene.

²⁰Apaale munookoha: “Nniceni vayaakhani yanaathannapiili, hiyo nihaanle naari nihihemphe?”

²¹Musuwele weera Miyo kinimoorumihelani mareeliho vayaakhani yanaathannamosa moota wooweera elapo enooruwera yookwana iyaakha tthaaru.

²²Mwaaphatteyaka vayaakhani yanaathannatthaaru, munimooca nlelo sookonela ni sinoopwaherera mpaka yoohepha ya eyaakha yanaathannaaxexe.

²³Elapo ehithumihiwekeru, niwoko eyo ti yawaka ni nyuwosa muri anamarwa ni anamathaamathaama paahi.

²⁴Mweelaponi yootheene munkuxaanyu munootthunihera woopola mweehuhuni yootthuneya.

²⁵Mukina a aYixrayeli ahaawa anathumiha mpatta wa ettimaawe, vano mmusaawe xaxaxa arweeke oopoleke yeeyo othuminghaawe.

²⁶Wa soothesene mutthu aahikhalano oomoopolela ettima, mene owo iisaasa anaphwanya moota woowoopolela,

²⁷owo aalikeleke iyaakha sivinre okhuma othuminghaawe ni ahokoloxeke yoohiyana wa yoole omuthumihenraawe; vahoolowaya akuxeketho.

²⁸Vaheera aahiphwanya moota woowoopolela ettima othumihalaawe, epwaherereke mmatatani mwa namathuma mpaka Eyaakha ya Otthapa. Vayaakhani ya Otthapa ehokoloxiweke ni vano owo aneeraawe akuxeketho.

²⁹Mulopwana athumiha empaawe musidadeni yootekeleliwa, oophwanela woopola mpaka okwanela eyaakha ethumihiweene. Ehuhuweene yeeyo oopoleke.

³⁰Owo aahoopola empeene yeeyo ehinaaye okwanela eyaakha, empa eyo enookhala ya namathuma ni ikhapirasawe wa mahuku ootheene. Eyo kheehokoloxiwa vaYaakhani ya Otthapa.

³¹Vaheera impa sa mmittettheni soohitekeleliwa sooneliweke okhala sa vanlakani. Iyo soopoliweke ni sihokoloxiweke vaYaakhani ya Otthapa.

³²Mwaha wa isidade sa aLeevi, awosa anoophwanela woopola impasaya musidadeni siri sawaya.

³³Tivawo impa sa aLeevi sinkhalaaya soowoopoleya — eyo tiiyo empa yoothumihiwa yakhalaru esidadaaya, ontthuneya ohokoloxeriwa vaYaakhani ya Otthapa, niwoko impa sa musidadeni sa aLeevi ti sawaya eriyari ya aYixrayeli.

³⁴Vaheera moocihamo ori mwa isidadesaya ohithumihiwemo; ti sawaya wa mahuku ootheene.

³⁵Mukina a aYixrayeli ahaawa, ahinawera wiiciha, munkhavihere ntoko ompakeliwaawe namarwa hoye hoye namavira weera apwaherere okhala eriyaraanyu.

³⁶Muhimukokoceru woopwaha, mene mmoove Mulukwaanyu weera muYixrayeli owo apwaherere okhala eriyaraanyu.

³⁷Nyuwo mwamukoongoriha musurukhu, owo oolivekeni hiiho ni mwamukoongoriha sooca, owo oohokoloxerekenitho hiiho.

³⁸Miyo ti Yave Mulukwaanyu kookhumihaleni wExipitu weera koovaheeni elapo ya oKanaani ni kikhale Mulukwaanyu.

³⁹muYixrayeli mukina variyariwanyu ahaawa, aniithumiha wa mukina a nyuwo, muhimvarihe muteko ntoko epottha.

⁴⁰Owo ooneliweke ntoko namuteko ooliviwa hoye hoye namavira; owo oovarelekeni muteko mpaka vaYaakhani ya Otthapa.

⁴¹Vahoolowaya owo ni anamwanaawe etapuxiweke ni owo ahokoleeleke opuumbaniwawe ni wa makholowaawe.

⁴²Yeenre aYixrayeli ekhalaka arumeiyaaka Miyo kaakhumihalaaka wExipitu, awosa ehithumihiwe ntoko ipottha.

⁴³Muhaalamule muhaamorelaka ikharari, mene mmoove Mulukwaanyu.

⁴⁴Ipotthasanyu ilopwana ni ithiyana sikhaleke sa miloko sinkhala mukhwipimwanyu; mwa seiyo muthumeke ipotthasanyu.

⁴⁵Mwaathumeketho eriyari ya anamavira ankhala eriyaraanyu ni a mahimwaaya ayareliwe mweelaponimwanyu ni awosa anoothatuwa awinyu.

⁴⁶Muntthuniheriwa waahiyera anamwaniinyu ntoko yoohiyeriwa ni muntthuniheriwa waatatuxa ipottha wa mahuku ootheene, mene mwaha wa aYixrayeli, muhaalamule muhaamorelaka ikharari.

⁴⁷Namarwa hoye hoye namavira onkhala variyariwanyu athadyireya, ni muYixrayeli mukina ahaawa, aniithumiha wa namarwa, hoye hoye wa mukina onkhala variyariwanyu ori a nihimo na namarwa owo,

⁴⁸muYixrayeli owo oophwanela woopoliwa naari iithumihaleene. Mmoha a emusaawe amoopoleke:

⁴⁹atatawe hoye hoye musuluwaawe hoye hoye akhalaru mmusi xaxaxa amoopoleke. Naari owo atadyireiyeene, iixoopoleke.

⁵⁰Owo ni namathumaawe yaalikeleke ehuhu okhuma eyaakha iithumihalaawe mpaka vaYaakhani ya Otthapa. Mutteengo woowoopolela ottharihiweke ntoko wa namuteko onliviwa ottharihiwaka waatta wa iyaakhasene seiyo aakhanlaawe epottha.

⁵¹Sahala iyaakha sincipale mpaka Eyaakha ya Otthapa, owo aliveke mutteengo attharihaka iyaakha sihanle.

⁵²Sahala iyaakha vakhaani mpaka Eyaakha ya Otthapa, owo aalikeleke ni aliveke attharihaka iyaakha sihanle.

⁵³Owo ooneliweke ntoko namuteko onliviwa vayaakhani; mwiipasoope weera pwiiyawe ahimulamule ahimmorelaka ikharari.

⁵⁴Owo aahoopoliwa ni wakhalaru moota wa seiya, mutthu owo ni anamwanaawe evoloweke ootapuxeyeene vaYaakhani ya Otthapa,

⁵⁵niwoko aYixrayeli ti arumeiyaaka. Mwa yaawo kaakhumihalaaka wExipitu. Miyo ti Yave Mulukwaanyu.