Read Makhuwa-Shirima Levitiku 26 Bible Online

Levitiku 26 - Makhuwa-Shirima bible

Levitiku 26

¹Muhipake miluku soowootha naari muhiipakele icaambulo hoye hoye amarimbu ootteeliheriwaanyu, hata muhiikaathi nluku nookheriwa mulaponimwanyu weera mukokhorele ohoolowaya. Miyo ti Yave Mulukwaanyu.

²Muthokorore iSaabadusaka ni muttittimihe Nipuronaka Nootteela*. Miyo ti Yave.

³Nyuwosa mwatthara ikanosaka ni mwiiwelela malamulowaaka,

⁴kinimoorupihelani epula mweehuhunimwaya ni imatta sinooruwera soohephasaya ni nyiri sa ntuphini soowiimasaya.

⁵Khaweemeleleya oveera mpaka ohepha wa iwuuva* ni ohepha wa iwuuva* onoopwaherera mpaka ehuhu ya waala, ni munimooca mpaka ovona mukhalaka oolipeene mweelaponimwanyu.

⁶Kinoovaha mureettele mweelaponi ni munimwiixaatalela ni khaawo aneera awoopopiheni. Kinimwaalakaseiha axinama ooluwa mweelaponi ni ekatana kheevira mulaponimwanyu.

⁷Munimwaattharelela amwiittanaanyu ni awosa animwiiviwa ni ekatana ohoolowanyu.

⁸Athanu a nyuwosa animwaattharelela ncira, ni ncira a nyuwosa macira macireene muloko ni amwiittanaanyu animwiiviwa ni ekatana ohoolowanyu.

⁹Miyo kinookhala ni nyuwosa ni kinimoorelanyihani; kinoowaattihani kipwahererihaka wiiraanawaka ni nyuwosa.

¹⁰Nyuwosa nlelo mucaaka sookonela, munookakha weera muhele soohepha sa mutano.

¹¹Kinookhaliha woomakawaka variyariwanyu ni nkirwa kooramusani.

¹²Kinimweetta variyariwanyu ni kinookhala Mulukwaanyu ni nyuwosa munookhala mulokwaaka.

¹³Miyo ti Yave Mulukwaanyu ookhumihaleni wExipitu weera muhikhaletho ipottha sa awExipitu; Miyo koopwexa mavatta a opotthaanyu kiweettihakani moota wootapuxeya.

¹⁴Vaheera nyuwosa mwaahikiiwa Miyo, muhikwaniheraka malamulo ootheene ala,

¹⁵ni mwaahoonela ikanosaka muramusaka malamulowaaka ni mooceela okwanihera soolamulasaka, mveihaka hiiho wiiraanawaka,

¹⁶vano Miyo kinimoopakani ha: Kinimooruuhelani woova wootutuxereya, ikwerere soohonona, xipwexa soowiipayipa sineera sooruuheleni evaasi, siyavayavihaka okumi. Munimwaala, mene khamphurela etthu niwoko amwiitthanaanyu animooca izosanyu.

¹⁷Kinoothatuwa Mwiittanaanyu moota wooweera munoowiniwa ni amwiittanaanyu; yaawo anoothanyani animoolamulani ni munootthawa naari muhoomoliwaka.

¹⁸Vahoolo wa itthu sootheene iyo nyuwosa nlelo mwaahikiiwa, kinimoottaruxani imaara ithannapiili wa sootthekasanyu.

¹⁹Kinoophwata wiixoonawanyu woolipaxa kitatuxaka erimu ya osuluwanyu ntoko eyuuma ni etthaya ya vathiwanyu ntoko ebronze*.

²⁰Ikurusanyu khasivareleya muteko niwoko khamuruwera etthu mulaponi, hata nyiri khasiwiimelani.

²¹Nyuwo mwapwaherera okhala amwiittanaaka mukhoottaka okiiwa, kinimwaandyeerera soohoxasanyu imaara ithannapiili, ntoko sootthekasanyu simphwanelaaya.

²²Kinimoorumihelani axinama a ntuphini eneera ewiive anamwaniinyu, kimalamalihaka mihuwosanyu, koovukulakani mpaka iphirosanyu sinoowalana.

²³Ni mwaahipwattha itthusene seiya, mukhoottaka soolakasaka ni mwapwaherera okivaanya,

²⁴Miyo muneenaaka kinookhala Mwiittananyu koohooxakani imaara ithannapiili niwoko na sootthekasanyu.

²⁵Kinimoorumihelani ekatana weera mwiinlele ikukuttula wiiraana. Nyuwosa mwaatthawelasaka musidadenimwanyu, kinimoorumihelani nihooxo ni munimwinnyereriwa mmatatani mwa amwiittana.

²⁶Miyo kaavukulaka woovahani sooca, asithiyana muloko eniyooxereke ipaawu niikho nimoha ekawanaka vamuringoni. Munimooca, mene khamvona.

²⁷Vanonto mwaahikiiwa ni mwapwaherera okhala amwiittanaaka,

²⁸Miyo kinookhala Mwiittananyu koonyoonyeriwakani, koottaruxakani imaara ithannapiili niwoko na sootthekasanyu.

²⁹Munimwaakhuura anamwaniinyu asilopwana ni asithiyana.

³⁰Kinoophwata mapurowaanyu ootteela vasulu mattumuxa, kaapwexaka altaaraanyu* a erubani* ni kinoothukumanyiha mittembosanyu vasulu wa milukusanyu soolokottha soohikhalano okumi ni kinimoothanyani.

³¹Kinoohiya isidadesanyu ittuxoru, kiphwataka mapurowaanyu ootteela, ni khookisiveliha wunkhela wa sooveleelasanyu.

³²Kinoophwata elapo moota wooweera amwiittanaanyu eneera ekhalewo animuumiwa owanoni.

³³Kinimoomwaraxelani variyari wa miloko ni kinimootheteelani ekatanaaka. Elapwaanyu enoothaamiwa ni isidadesanyu sinookhala ittuxoru.

³⁴Hiiho elapo enoohakalala iyaakhasaya sa eSaabadu ehuhu yootheene ya othaamiwawaya, nyuwosa mureene mweelaponi mwa amwiittanaanyu. Vano elapo enimwiitthuuwa ekhalanaka iSaabadusaya.

³⁵Ehuhu yootheene eneera ehale yoothaamiweene, elapo enookhalano wiitthuuwa wa iSaabadu ehitonkwaaya wiitthuuwa nyuwosa mukhalakamo.

³⁶Mwaha wa yaale a nyuwosa eneera ehale, kinootatuxa mirimasaya soosareya woova mweelaponi mwa amwiittanaaya moota wooweera, yiiwaka onyakula wa oruma nikukhu nimvavihiwa mpheyoni, anootthawa. Anootthimaka ntoko mutthu ontthuna otthawa ekatana ni anoomora naari ehoomoliwaka.

³⁷Anookwakwathulana ntoko atthu antthawa ekatana, naari ehoomoliwaka. Vano khamurwa mwaawera amwiittanaanyu.

³⁸Munookhwela variyari wa miloko, elapo ya amwiittanaanyu enimoophwatani.

³⁹Yaale a nyuwosa eneera ehale animunttela mweelaponi mwa amwiittanaaya niwoko na sootthekasaya, nitho sa makholowaaya.

⁴⁰Vaheera ontthuneya weera awosa elape sootthekasaya, soottheka sa makholowaaya, ohiroromeleyawaya ni okirukunuwelawaya,

⁴¹mwa seiyo sikitannyenre owiitta moota wooweera mpaka owoomolela mweelaponi mwa amwiittanaaya. Vano mirimasaya soottiyamaaru siiyeviha ni awosa yaakhulela ottaruxeliwa sootthekasaya,

⁴²Miyo kinimuupuwelela wiiraanawaka ni Yakobe ni wiiraanawaka ni Isaaki ni wiiraanawaka ni Abrahaamu ni kinimuupuwelela elapo.

⁴³Vano elapo enoothaamiwa ni yaawosa ni enookhalano iSaabadusaya ereene meekhaaya. Awosa animwaakhela nttaruxo na sootthekasaya niwoko yaahiya malamulowaaka ni yaaveiha ikanosaka.

⁴⁴Hata hiiho, awosa ereene mweelaponi mwa amwiittanaaya, nkaakhootta naari nkaaramusa. Nkaaphwata woomalela kimalihaka hiiho wiiraanawaka ni yaawo. Miyo ti Yave Mulukwaaya.

⁴⁵Mwaha wa waasivelawaka kinimuupuwelela wiiraana ni makholowaaya kaakhumihalaaka wExipitu vamaithoni wa miloko weera kikhale Mulukwaaya. Miyo ti Yave.’”

⁴⁶Iya ti ikano, malamulo ni soolamula Yave aakhalinghaawe vamwaako oSinayi variyari wa Yoowo ni aYixrayeli mwa Moisesi.