Read Makhuwa-Shirima Levitiku 3 Bible Online

Levitiku 3 - Makhuwa-Shirima bible

Levitiku 3

¹Yooveleela ya mukina yakhala yooveleelela murettele, epakiweke ha: owo amveleela mwaamunama a muhuwo — akhalaka mulopwana naari muthiyana; owo amuruuheleke Yave mwaamunama oohirakala.

²Owo iikaathiki ntata vamuru wa mwaamunama a yooveleela yoohisa aneera iiveliwe vamulako wa Eheema ya Muthukumano*. Asaserdoti*, anamwane a Aharoni, emisereke ephome mipatta sootheene sa altaari*.

³Wa yooveleelela murettele eyo, owo amuruuhele Yave yooveleela erehereriwe vayikho: makhura ootheene anghuruwela marupo ni alumbaanneno,

⁴miso miili vamoha ni makhura anghuruwela, ni mpatta wa hapa onkuttelela ni simvenxiwa vamoha ni miso.

⁵Vano anamwane asilopwana a Aharoni ehiseke sootheene iyo vasulu wa sooveleela soohisa siri vakhuunini sivarelaka valtaarini* ntoko yooveleela erehereriwe vayikho, yooveleela yoowunkhelaxa enimusiveliha Yave.

⁶Mukina amuruuhela Yave mwaamunama a muhuwo a ekhondoolo ntoko yooveleelela murettele, amuruuheleke ya elopwana hoye hoye ethiyana yoohirakala.

⁷Owo aruuha eputtiputthi, amuroiheleke Yave.

⁸Owo iikaathiki ntata vamuru wa mwaamunama aneera iiveliwe ohoolo wa mulako wa Eheema ya Muthukumano*. Vano anamwane asilopwana a Aharoni emisereke ephome mipatta sootheene sa altaari*.

⁹Wa yooveleelela murettele eyo, owo amuruuhele Yave yooveleela erehereriwe vayikho: makhuraaya, mwiila wooneneva woothikiliwa nnenesene ni makhura ootheene anghuruwela marupo elumbaanneene,

¹⁰miso miili vamoha ni makhura anghuruwela, ni mpatta wa hapa onkuttelela ni simvenxiwa vamoha ni miso.

¹¹Musaserdoti* ahiseke valtaarini* ntoko yooca yoovahiwa Yave, yooveleela erehereriwe vayikho.

¹²Yooveleela yakhala ya epuri, owo amuroiheleke Yave.

¹³Owo iikaathiki ntata vamuru wa mwaamunama aneera iiveliwe ohoolo wa Eheema ya Muthukumano*. Vano anamwane asilopwana a Aharoni emisereke ephome mipatta sootheene sa altaari*.

¹⁴Wa yooveleeleene yeeyo, owo amuruuhele Yave yooveleela yoorehereriwa vayikho: makhura ootheene anghuruwela marupo ni alumbaanneno,

¹⁵miso miili vamoha ni makhura anghuruwela, ni mpatta wa hapa onkuttelela ni simvenxiwa vamoha ni miso.

¹⁶Asaserdoti* ehiseke valtaarini* ntoko yooca, yooveleela yoorehereriwa vayikho, yoowunkhelaxa. Makhura ootheene ekhaleke a Yave.

¹⁷Ela ti ekano yoohimala wa ikhapira sineera sirwe, mmapuroni ootheene muneeraanyu mwakhalemo: muhikhuureru makhura naari ephome.