Read Makhuwa-Shirima Levitiku 4 Bible Online

Levitiku 4 - Makhuwa-Shirima bible

Levitiku 4

¹Yave aamweerela Moisesi:

²“Mwaaleele aYixrayeli: ‘Mukina attheka mweerisani apakaka yeeyo ekhoottihiwe mwa nakhalaru Nlamulo na Yave, apakeke ha:

³Musaserdoti* oottikittheliwa attheka, aruuhelaka hiiho nthowa muloko, owo amuruuheleke Yave emombe exaana yoohirakala ntoko yooveleelela yoottheka opankaawe.

⁴Owo amuroihele Yave emombe vamulako wa Eheema ya Muthukumano*. Owo iikaathiki ntata vamuru wa emombe eneera yiiviwe vamaithoni wa Yave.

⁵Vano musaserdoti* oottikittheliwa akuxeke ephome vakhaani ya emombe aroihaka Muheemani ya Muthukumano*.

⁶Owo aruweyeke ekatha mphomeni ni amisereke imaara ithannapiili vamaithoni wa Yave, ohoolo wa eluttu ya Nipuro Nootteela*.

⁷Vahoolowaya musaserdoti* ahingeke mpatta wa ephome mmanyakani a valtaarini* a erubani* yoowunkhelaxa eri vamaithoni wa Yave, Muheemani ya Muthukumano*. Ephome eneera ehale ya emombe eyo ayeeherele vathi wa altaari* a sooveleela soohisa vamulako wa Eheema ya Muthukumano*.

⁸Owo avenxeke makhura ootheene a emombe a yooveleelela yoottheka — makhura ootheene anghuruwela marupo ni alumbaanneno,

⁹miso miili vamoha ni makhura anghuruwela, ni mpatta wa hapa onkuttelela ni simvenxiwa vamoha ni miso,

¹⁰mooteene yoowo amvenxiwaaya makhura a emombe eveleeleliwaka ntoko yooveleelela murettele. Vanonto musaserdoti* ahiseke seiyo valtaarini* a sooveleela soohisa.

¹¹Vaheera exapala ya emombe ni ethayaaya yootheene, muru ni nyetto, marupo ni mpuule,

¹²eyo tiiyo sootheene sineera sihale sa emombe, owo akhumihereke vaate okhwipi wa okonelingwe aroihaka vanipuroni nootteelihaxiwa, attharihaka soonyesereriwasaya sa mapuro ootteela. Ti nipuro nenenenno ettuura enriheliwaayawo. Vano itthu seiyo sihisiweke vasulu ikhuuni sivarelaka yuukeliwaayawo ettuura.

¹³Muloko wootheene wattheka mweerisani opakaka yeeyo ekhoottihiwe mwa nakhalaru Nlamulo na Yave, naari ohisuwelaka weera ori ni nthowa, nlelo ori ni nthowa.

¹⁴Owo waasuwelaka weera woottheka, vano muthukumano oruuheke emombe exaana ntoko yooveleelela yoottheka, arongheke mpaka ohoolo wa Eheema ya Muthukumano*.

¹⁵Asitokweene a mulokweene yoowo yiikaathiki matata vamuru wa emombe vamaithoni wa Yave, ni emombe yiiviweke ohoolo wa Yave.

¹⁶Vano musaserdoti* oottikittheliwa akuxeke ephome vakhaani ya emombe, arongheke Muheemani ya Muthukumano*.

¹⁷Owo aruweyeke ekatha mphomeni ni amisereke imaara ithannapiili vamaithoni wa Yave ohoolo wa eluttu ya Nipuro Nootteela*.

¹⁸Vahoolowaya musaserdoti* ahingeke mpatta wa ephome mmanyakani a valtaarini* ari ohoolo wa Yave, Muheemani ya Muthukumano*. Ephome eneera ehale ya emombe eyo ayeeherele vathi wa altaari* a sooveleela soohisa vamulako wa Eheema ya Muthukumano*.

¹⁹Vano owo avenxeke makhura ootheene a emombe ni ahisereke valtaarini*,

²⁰apakelaka emombe mooteene yoowo aapakenlaaweno emombe ya yooveleelela yoottheka. Moota hiiho musaserdoti* onoorehererela wiiwanana ni Yave, ni owo onooleveleliwa.

²¹Vanonto owo akhumihereke emombe vaate wa okonelingwe ni ahiseke ntoko aahinsaawe emombe yoopacera. Ela ti yooveleelela yoottheka ya muloko.

²²Mutokweene mmoha attheka mweerisani, apakaka yeeyo ekhoottihiwe mwa nakhalaru Nlamulo na Yave Mulukwaawe, onookhalano nthowa.

²³Owo oonelela yootthekaawe, amuruuheke napunci oohirakala ntoko yooveleelelaawe.

²⁴Owo iikaathiki ntata vamuru wa napunci aneera iiveliwe vanipuroni siniiveliwaayawo sooveleela soohisa vamaithoni wa Yave. Ela ti yooveleelela yoottheka.

²⁵Vano musaserdoti* ataveke ni ekatha ephome vakhaani ya yooveleelela yoottheka ni ahingeke mmanyakani a altaari* a sooveleela soohisa. Ephome ekina eyo ayeehereke vathi valtaarini*.

²⁶Owo ahiseke makhura ootheene valtaarini* ntoko aahinsaawe makhura a yooveleelela murettele. Moota hiiho musaserdoti* onoorehererela wiiwanana ni Yave wa yoottheka ya mulopwana owo, ni owo onooleveleliwa.

²⁷Mmoha a muloko attheka mweerisani, apakaka yeeyo ekhoottihiwe mwa nakhalaru Nlamulo na Yave, owo onookhalano nthowa.

²⁸Owo oonelela yootthekaawe, aruuheke ntoko yooveleelelaawe yoottheka epuri ethiyana yoohirakala.

²⁹Owo iikaathiki ntata vamuru wa mwaamunama a yooveleelela yoottheka aneera iiveliwe vanipuroni siniiveliwaayawo sooveleela soohisa.

³⁰Vano musaserdoti* ataveke ni ekatha ephome vakhaani ya yooveleelela yoottheka, ni ahingeke mmanyakani a altaari* a sooveleela soohisa. Ephome ekina eyo ayeehereke vathi valtaarini*.

³¹Owo avenxeke makhura ootheene mooteene yoowo amvenxeriwaaya makhura a yooveleelela murettele. Vanonto musaserdoti* ahiseke seiyo valtaarini* ntoko yooveleela yoowunkhelaxa enimusiveliha Yave. Moota hiiho musaserdoti* onoomurehererela wiiwanana ni Yave, ni mulopwana owo onooleveleliwa.

³²Owo aruuha eputtiputthi ntoko yooveleelela yoottheka, ekhaleke ethiyana yoohirakala.

³³Owo iikaathiki ntata vamuru wa mwaamunama aneera iiviweke ntoko yooveleelela yoottheka vanipuroni siniiveliwaayawo sooveleela soohisa.

³⁴Vano musaserdoti* ataveke ni ekatha ephome vakhaani ya yooveleelela yoottheka ni ahingeke mmanyakani a altaari* a sooveleela soohisa. Ephome ekina eyo ayeehereke vathi valtaarini*.

³⁵Owo avenxeke makhura ootheene a eputtiputthi ya yooveleelela murettele. Vanonto musaserdoti* ahiseke seiyo valtaarini* vasulu wa soomveleelela Yave soorehereriwa vayikho. Moota hiiho musaserdoti* onoomurehererela wiiwanana ni Yave, ni mulopwana owo onooleveleliwa.