Read Makhuwa-Shirima Levitiku 5 Bible Online

Levitiku 5 - Makhuwa-Shirima bible

Levitiku 5

¹Mukina iitthaniwa weera akhalele onamoona mwaha wa etthu oonnaawe hoye hoye osuwenlaawe ni akhootta, ti yoottheka ni omphwanela nthorihelo.

²Mukina atava yakhalaru etthu yoohitteela, hata akhalaka mwaamunama ookhwa a mutuphini hoye hoye mihuwo soohitteela, hoye hoye soopattuxiwa soohitteela siniipurula — naari ahisuwelaka, owo onoothatuwa oohitteela ni ookhalano nthowa.

³Hoye hoye owo atava etthu yoohitteela ya omutthu, yakhalaru etthu eneera emutatuxe oohitteela — naari ahisuwelaka, owo oonelela, onookhalano nthowa.

⁴Mukina moohuupuwelanimwawe alipela opaka etthu yooreera hoye hoye yoonanara, yakhalaru etthu aneeraawe alipelele ahiipasoopaka, naari ahisuwelaka yeeyo, vano oonelela, onookhalano nthowa.

⁵Mukina akhalano nthowa niwoko na emoha ya itthusene seiya, owo alapeke yootthekaawe.

⁶Owo amuruuheleke Yave ekhondoolo hoye hoye epuri ethiyana ya muhuwaawe ntoko nlivo niwoko na yoottheka opankaawe, eyo tiiyo yooveleelela yoottheka. Vano musaserdoti* onoomurehererela wiiwanana ni Yave wa yootthekaawe.

⁷Owo aahikhalano meerelo a yooveleela ya eputtiputthi, amuruuheleke Yave aximasiya meeli hoye hoye makhinda meeli ntoko yooveleelela yoottheka — nimoha wa yooveleelela yoottheka ni nikina nno wa yooveleela yoohisa.

⁸Owo amuruuhele musaserdoti* aneera apacere woonihera toko yooveleelela yoottheka. Owo ahiteke ahikwasulaka muru.

⁹Woottharelana amisereke okhwipi wa altaari* ephome yooveleelela yoottheka. Ephome eniihale eyo ahiyeke ekhwalalelaka vathi wa altaari*. Eyo ti yooveleelela yoottheka.

¹⁰Vahoolowaya musaserdoti* amveleeleke mwaapalame mukinoowo ntoko yooveleela yoohisa ni attharihaka soonyesereriha sa sooveleela, amurehererelaka wiiwanana ni Yave niwoko na yoottheka opankaawe, ni owo onooleveleliwa.

¹¹Wa soothesene aahikhalano meerelo ooveleelela aximasiya meeli hoye hoye makhinda meeli, aruuheke ntoko yooveleelela yoottheka ikiilu* piili sa ephepa ya etrigu yooreerela weera aveleelele yootthekaawe. Owo ahimiinelewo makhura naari ahiikaathi erubani*, niwoko ti yooveleelela yoottheka.

¹²Owo amuruuhele yeeyo musaserdoti*, ni musaserdoti* anyottoleke vakhaani ntoko mpatta wa eyuupuxero, ni eyo ahisereke valtaarini* vasulu wa sooveleeleliwa Yave soorehereriwa vayikho. Eyo ti yooveleelela yoottheka.

¹³Moota hiiho musaserdoti* onoomurehererela wiiwanana ni Yave wa yakhalaru ya soottheka seiya opankaawe, ni owo onooleveleliwa. Yooveleela eniihale eyo ti ya musaserdoti*, ntoko simpakiwaaya sooveleela sa irooro.’”

¹⁴Yave aamweerela Moisesi:

¹⁵“Mukina aatapanya atthekaka mweerisani wa yakhalaru etthu yootteeliheriwa Yave, owo amuruuheleke Yave napunci a muhuwaawe oohirakala oophimiwa mparathani*, ettharaka olemela wa exekeli* ya Nipuro Nootteela*. Eyo ti yooveleelela nthowa.

¹⁶Owo areherereketho yeeyo ooceelenlaawe opaka mwaha wa itthu sootteeliheriwa; aandyeerere mpatta wanaathanu wa mutteengo ni amulive musaserdoti* mutteengo vamoha ni mpatta wanaathanutho. Vano musaserdoti* onoomurehererela wiiwanana ni Yave amvarelaka muteko napunci ntoko yooveleelela nthowa ni owo onooleveleliwa.

¹⁷Mutthu attheka apakaka ninghiihaaya nakhalaru Nlamulo na Yave, naari ahisuwelaka, onookhalano nthowa ni onoohaawa nthorihelo.

¹⁸Owo amuruuheleke musaserdoti* napunci a muhuwaawe oohirakala ni oowaakhuleliwa ntoko yooveleelela nthowa. Moota hiiho musaserdoti* onoomurehererela wiiwanana ni Yave mwa yootapanya opankaawe mweerisani ni owo onooleveleliwa.

¹⁹Ti yooveleelela nthowa; vekhaikhai owo aakhalano nthowa niwoko aamutthekela Yave.