Read Makhuwa-Shirima Levitiku 9 Bible Online

Levitiku 9 - Makhuwa-Shirima bible

Levitiku 9

¹Vanihukuni nanaathannamararu Moisesi aamwiitthana Aharoni ni anamwane asilopwana nitho asitokweene a aYixrayeli.

²Aamweerela Aharoni: “Munkuxe mwaamombe mulopwana wa yooveleelela yoottheka ni napunci wa yooveleela yoohisa, ooweeli oohirakala, muruuheke vamaithoni wa Yave.

³Vahoolowaya mwaaleele aYixrayeli: ‘Munruuhe napunci wa yooveleelela yoottheka, mwaamombe ni eputtiputthi, soopiili iyo sa eyaakha emoha ni soohirakala wa sooveleela soohisa,

⁴ni emombe ni napunci wa yooveleelela murettele weera mveleele vamaithoni wa Yave vamoha ni yooveleela ya irooro sooweetheiwa ni makhura. Niwoko olelo Yave onimwiixoonihera wa nyuwo.’”

⁵Awosa yaaruuha itthu Moisesi aalamulenlaawe ohoolo wa Eheema ya Muthukumano* ni muloko wootheene waakhuveela, oneemela ohoolo wa Yave.

⁶Vano Moisesi aaheerela: “Ti seiya Yave oolamulenlaaweni opaka weera ovuwa wa Yave wiixoonihere wa nyuwo.”

⁷Moisesi aamweerela Aharoni: “Murweeke valtaarini*, mwapakele yooveleelelaanyu yoottheka ni yooveleelaanyu yoohisa, mwiirehererele wiiwanana ni Yave, mwareherereletho muloko; mwapakele yooveleela muloko ni mwarehererele wiiwanana ni Yave, ntoko Owo aamulamulenlaawe Moisesi.”

⁸Vano Aharoni aarowa valtaarini*, anamwiiva mwaamombe ntoko yooveleelela yootthekaawe.

⁹Anamwanaawe yaamuruuhela ephome ni owo aaxuweyamo ekathaawe, anahinga manyaka a valtaarini*; ephome yaahanle eyo aayeehera vathi valtaarini*.

¹⁰Owo aahisa valtaarini* makhura, miso, makhura aninghuruwela hapa a yooveleelela yoottheka, ntoko Yave aamulamulenlaawe Moisesi.

¹¹Wa soothesene etthai ni exapala aahisera okhwipi wa okonelingwe.

¹²Vanonto aahiiva yooveleela yoohisa. Anamwanaawe yaamwinnyerera ephome ni owo aayeehera mukhwipi wa altaari*.

¹³Woottharelana yaamwinnyerera yooveleela yoohisa intthuri intthuri vamoha ni muru, anahisera seiyo valtaarini*.

¹⁴Aarapiha marupo ni nyetto, anahisera vasulu wa yooveleela yoohisa valtaarini*.

¹⁵Vahoolowaya Aharoni aarongha yooveleela wa muloko. Aamukuxa napunci a yooveleelela yoottheka ya muloko, anamwiiva, anamveleelela soottheka ntoko aapankaawe ni yoopacera.

¹⁶Aakuxa yooveleela yoohisa, anaveleela yeeyo attharaka soonyesererihiwa sa sooveleela.

¹⁷Aaruuhatho yooveleela ya irooro, ananyottola, anahisera valtaarini*, ohiya sa sooveleela soohisa sa oxeexelo.

¹⁸Aahiiva emombe ni napunci ntoko yooveleelela murettele wa muloko. Anamwanaawe yaamuruuhela ephome ni owo aayeehera mukhwipi wa altaari*.

¹⁹Vaheera mipatta sa makhura a emombe ni napunci — mwiila wooneneva, makhura anghuruwela marupo, miso ni hapa —

²⁰seiye yaahiikaathi vahoceni, ni vano Aharoni aahisa iyo valtaarini*.

²¹Aharoni ahiinainihera ihoce ni vatakhwini yoolopwana vamaithoni wa Yave ntoko yooveleela yoowiinainiheriwa, ntoko Moisesi aalamulenlaawe.

²²Vahoolowaya Aharoni aaheemexera matata muloko, anareeliha. Amalihaleene opaka yooveleelela yoottheka, yooveleela yoohisa ni yooveleelela murettele, aakhuruwa.

²³Moisesi ni Aharoni yaavolowa Muheemani ya Muthukumano*. Ekhumakaru, yaareeliha muloko ni ovuwa wa Yave waahiixoonihera wa muloko wootheene.

²⁴Yave aarumiha mooro onahisa yooveleela yoohisa ni mipatta sa makhura valtaarini*. Muloko wootheene woonakaru yeeyo, waakhuwela ni ohakalala, onuuramihela vathi ekhovaaya.