Read Makhuwa-Shirima Yeremiya 1 Bible Online

Yeremiya 1 - Makhuwa-Shirima bible

Yeremiya 1

¹Masu a Yeremiya, mwaana mulopwana a Hilikiya, musaserdoti* mmoha a wAnatoti, elapo ya oBenyamini.

²Yave aahuuluma ni Yeremiya vayaakhani yanaamuloko niitthaaru ya olamula wa Yosiya, mwaana mulopwana a Amoni, mwene a oYuda.

³Aapwaherera wuuluma ni yoowo mpaka ehuhu ya olamula wa Yehoyakimi, mwaana mulopwana a Yosiya, mpakatho mweeri wanaathanu wa eyaakha yanaamuloko niimoha ya olamula wa Zedekiya, mwaana mulopwana a Yosiya, mwene a oYuda, ehuhuweene yeele amaki a oYerusaleemu yaaronghiwaaya wootthukiwani elapo ekina.

⁴Yave aahuuluma ni miyo akeerelaka:

⁵“Miyo kihinaaye woopakani mmirimani mwa amayinyu, kaahoosuwelani. Nyuwo muhinaaye oyariwa, Miyo kaahoothanlani ni kaahookhalihani ntoko mprofeeti wa miloko.”

⁶Kaamwaakhula: “Ii! Yave onlamula sootheene, nkingwera wuuluma nnenesene; kiri mmiravo paahi.”

⁷Mene Yave aakeerela: “Muheere: ‘Kiri mmiravo paahi,’ mene murowe wa ootheene miyo kineeraaka koorumiheleni ni mwahime sootheene kineeraaka koolamuleleni.

⁸Muhiwoove yaawo, niwoko Miyo kiri ni nyuwo ni kinimookosoopani,” onghima Yave.

⁹Vano Yave aahookola moono, anatava eyaanowaaka, anakeerela; “Vano koohela maswaaka mmwanomwanyu.

¹⁰Moone, olelo kohoovahani ikuru wa miloko ni omwene weera mwaakhe, mphwate, muhele nthala ni mukankhanyule, nitho weera muteke ni mphatteye.”

¹¹Yave aahuuluma ni miyo akeerelaka: “Munoonani, Yeremiya?” Kaamwaakhula: “Kinoona ephandi ya mwiri wa emandoweira*.”

¹²Yave aakeerela: “Mohoona nnene, niwoko kingwehaweha weera maswaaka ekwanihereye.”

¹³Yave aahuulumatho ni miyo akeerelaka: “Munoonani?” Kaamwaakhula: “Kinoona mwaapu okaphulaka, owo woothetemana oreraka ettuli ottuttuwani.”

¹⁴Yave aakeerela: “Ottuttuwani anooyeeheriwa erisa amaki ootheene a elapo ela.

¹⁵Miyo kinlattula miloko sootheene sa imwene sa ottuttuwani,” onghima Yave. “Mamwene animoowa, yiikaathiki ihicesaya sa emwene vamilako sa oYerusaleemu. Anoowanano ixirisaya sootheene sirince ni mittetthe sootheene sa oYuda.

¹⁶Kinoothoriha mulokwaaka niwoko na sootakhalasaya sootheene wookihiya Miyo, ohiseraka erubani* miluku sikina ni olapaka seiyo apankaaya matataaya.

¹⁷Nyuwo mwiireherere! Murowe mwaaleele sootheene kineeraaka koolamuleleni. Muhiwoove weera kihiwoopopiheni ohoolowaya.

¹⁸Olelo miyo kinoopakani nyuwo esidade yoolipihiwa, nrimbu na eyuuma ni exiri ya ebronze* wa elapo yootheene: wa mamwene a oYuda, asitokweenaaya, asaserdotaaya ni muloko wa mulaponi.

¹⁹Awosa animoowananani, mene khayoowinani, niwoko Miyo kiri ni nyuwo ni kinoowoopolani,” onghima Yave.