Read Makhuwa-Shirima Yeremiya 11 Bible Online

Yeremiya 11 - Makhuwa-Shirima bible

Yeremiya 11

¹Masu Yeremiya aakhenlaawe wa Yave ti ala:

²“Mwiiwe soonyesereriwa sa wiiraana wu ni mwaleele muloko wa oYuda ni wa yaale ankhala oYerusaleemu.

³Mwaaleele weera Yave, Muluku a oYixrayeli oneera ha: ‘Oolaphiwa yoole aneera ahiiwelele soonyesereriwa sa wiiraana wu —

⁴mwa weiwo kaalamulenlaaka makholowaanyu, kaakhumihaaka wExipitu, muttukutthani enghaniwa eyuuma.’ Keenre: ‘Mukiiwelele ni mpake sootheene kinoolamulelaakani ni munookhala mulokwaaka ni Miyo Mulukwaanyu.

⁵Vano kinookwanihera yoororomeliha kaapakenlaaka makholowaanyu ni nlipelo weera kinimwaavaha elapo yoosareya mukaka ni oravo’ — eyo tiiyo elapo eri yawinyu olelo.” Miyo kaamwaakhula: “Ame* Yave.”

⁶Yave aakeerela: “Mwalaleere masu ootheene ala mmittettheni sa oYuda ni mmiseweni sa oYerusaleemu: ‘Mwiiwe soonyesereriha sa wiiraana wu ni mutthareke.

⁷Okhuma ehuhuweene yeele kaakhumihalaaka makholowaanyu wExipitu mpaka olelo kannawooperera keeraka: “Mukiiwelele.”

⁸Vaheera awosa khayaakiiwale hata khayaakipwantthe; ohiyanawaya yaatthara ettiyamaaru ya mirimasaya soonanara. Tivawo kaaruuhenlaaka malapho ootheene ala a wiiraana kaalamulenlaaka otthara, awosa ehiiwelelaka.’ ”

⁹Vano Yave aakeerela: “Wookhala ovaanelela variyari wa muloko wa oYuda ni yaawo ankhala oYerusaleemu.

¹⁰Awosa aahokoleela soottheka sa makholowaaya mwa yaawo yaakhoontte wiiwelela maswaaka, ettharaka miluku sikina weera erumeele. Ipuumba sootheene sa oYixrayeli ni sa oYuda khasiiwelenle wiiraanawaka kaapakenlaaka makholowaaya.

¹¹Yave oneera ha: ‘Kinimwaaruuhela erisa mwa yeeyo eneeraaya ehiwere woopowa. Naari ekikhuwelelaka, Miyo nkiwiiwa.

¹²Vano mittetthe sa oYuda ni amaki a oYerusaleemu anookhuwelela miluku mwa seiyo anghiseraaya erubani*, mene iyo khasirwa saavuluxa yaaphwanyaka erisa.

¹³Ii! oYuda, nyuwo mookhalano miluku sincipale ntoko waatta wa mittetthesanyu ni waatta wa altaaraanyu* mwiitekenlaanyu weera munghisere erubani* mulukweene yoowo wa mwiikho Bahali*, ori ntoko waatta wa misewe sa oYerusaleemu.’

¹⁴Ni nyuwo, Yeremiya, muhivekelele muloko ola naari muhidyoonttelele mwaha wa yoowo; muhikidyoonttelele, niwoko nkirwa kiwiiwaani.

¹⁵Eheeni ompakaawe oosiveleyaaka Mpaanimwaka eerelaka olokottha? Weeraka soolipela ni enama yootteelihiwa sinoosembiha nttaruxo? Vano wakhala hiiho, weeraka munoowera otthapa?

¹⁶Yave oowiitthanani mwiri wa sooliveira* woopombaxa orino soowiima sooreeraxa. Vaheera Owo onoohisa mwiri ola ni oruma wa ettheku etokotoko, ni iphandisaya sinoovonyoliwa.”

¹⁷Yave a ikuru sootheene, ophatteiye, ohoorumihelani erisa, niwoko ipuumba sa oYuda ni oYixrayeli soopaka soonanara sitannyaka isarasaka woomuhisera erubani* Bahali*.

¹⁸Miyo kaaleeliwa niwoko Yave aakoonihera; Nyuwo mookoonihera yeeyo amvaanelelaaya.

¹⁹Kaari ntoko eputtiputthi yoomaala eronghiwaka owiiviwani; nkaasuwela weera aakivaanelela. Awosa yeenre: “Niphwate mwiri ni soowiimasaya; nuuhe mweelaponi mwa akumi weera nsinanawe nihuupuweleliwetho.”

²⁰Ii! Yave a ikuru sootheene, Mphuki a ekhaikhai munoota murima ni soowuupuwela sa omutthu, kingweherera woona owiinlelawanyu ikukuttula niwoko mulattwaaka kingwinnyererani Nyuwo.

²¹Asilopwana a wAnatoti animwaasa okumaanyu, yeeraka: “Muhithalihere otthuna wa Yave mwa Nsinanawe weera muhiiviwe.” Vano, Yave oneera ha mwaha wa yaawo,

²²aani, oneera ha mwaha wa yaawosa: “Kinimwaattaruxa. Amiravowaaya animwiiviwa ni ikatana ni anamwanaaya asilopwana ni asithiyana ni etala.

²³Khawoworu anaahale mwa yaawo, niwoko kinimwaaruuhela erisa asilopwana a wAnatoti vayaakhani ya ottaruxiwawaya.”