Read Makhuwa-Shirima Yeremiya 12 Bible Online

Yeremiya 12 - Makhuwa-Shirima bible

Yeremiya 12

¹Ii! Yave, khula emaara kinooruuhelaakani mulattu, Nyuwo munlakela ni ekhaikhai. Wa soothesene, kintthuna wuuluma ni Nyuwo mwaha wa ekhaikhayaanyu. Atakhali singweettelela heeni nnene? Anamavariha ootheene ahinkhalanela heeni milattu?

²Nyuwo mohaaphatteya ni awosa aaphuwa mikwankhwaari; annunnuwa, eniima. Mahuku ootheene Nyuwo muri vayanoniwaya, mene ottaiwene wa mirimasaya.

³Wa soothesene mookisuwela miyo, Yave; munkoona, mootaka murima soowuupuwelasaka mwaha wa Nyuwo. Mwaavenxe atakhali ntoko ikhondoolo sinroihiwa owiiviwani. Ngwuurelele nihuku na wiiviwa!

⁴Mpaka yaakhani elapo yiinanelaka ni malaxi a ntuphini enyaalaka? Axinama ni ipalame aaphwatiwa niwoko amaki a elapo aasareya otakhala. Ohiya toko yeeyo — atthu aneera: “Owo khoona ommaleloniwahu.”

⁵“Nyuwo mwaatthimankeene ni atthu munakhulumuliwa, vano moota heeni muneeraanyu mutthimake ni ikavalu*? Mwakwattuliwa mweelaponi yoothatawala, mmwiwere hai moothakoni mwa oYordanu?

⁶Mpaka axunninyuweene ni amusaanyu xaxaxa ahoovarihani; awosa anoottharelelani ekhuwelaka. Muhaaroromele, naari yooleelakani itthu sooreera.

⁷Koohiya empaaka ni yoohiyeraaka. Kinoomwinnyerera yoowo kinimusivelaaka mmatatani mwa amwiittanaawe.

⁸Yoohiyeraaka yookithatuwela mwatto ntoko a moothakoni. Eyo enkoopela murika, tivawo kinthanyaaka.

⁹Yoohiyeraaka yookithatuwela ntoko enyatta ya kusupa sinaraaraayamo ipalame sa wiirimu. Mwaathukumanyihe axinama a ntuphini ootheene; mwaaruuhe ofestani.

¹⁰Akukhuli ancipale aananariha emattaaka ya iwuuva* enyikhalelaka yeeyo; awosa aatatuxa emattaaka yooreeraxa nikare noophwatiwa.

¹¹Eyo aapaka elapo yoophwatiwa, yoowuumelela ni yoothaamiwa vamaithoniwaka; elapo yootheene yoophwatiwa, mene khawowo ompwatthela.

¹²Anamaphwata animoowa eviraviraka mmattumuxani oowuumelela onikareni, niwoko ekatana ya Yave enoophwata elapo yootheene eyo. Khawowo anaakhale oolipeene.

¹³Awosa yaahaala etrigu, mene ahemphe nyiiwa; wohaakhulumula ovara muteko woohiruwera etthu. Vano, awosa anuulihiheya muru ni ohepha niwoko na isara sitokotoko sa Yave.”

¹⁴Yave oneera ha mwaha wa amwaattamanaaka ootheene, miloko sootakhala sinaakamela yoohiyeriwa kaavanghaaka aYixrayeli mulokwaaka: “Kinoowaakha mweelaponimwaya ni kinoovenxa oYuda eriyaraaya.

¹⁵Vaheera kivenxaleene, kinoomorelatho ikharari ni kinoomuhokoloxera khula mutthu yoohiyeriwaawe ni elapwaawe.

¹⁶Vano awosa aaxuttera nnenesene ekhovelelo ya mulokwaaka ni yaalipela mwa Nsinanaka yeeraka: ‘Kinlipela mwa Nsina na Yave’ — ntoko khalayi yaaxuttinghaaya mulokwaaka omulipela Bahali* — vano anookhalihiwa variyari wa mulokwaaka.

¹⁷Vaheera awosa yaahikiiwelela, kinimwaavenxa, kaaphwataka woomalela,” onghima Yave.