Read Makhuwa-Shirima Yeremiya 16 Bible Online

Yeremiya 16 - Makhuwa-Shirima bible

Yeremiya 16

¹Vano Yave aahuulumatho ni miyo, eeraka:

²“Muhithele naari muhaayare anamwane asilopwana hoye hoye asithiyana vanipuroni nna.”

³Vano yeeyo Yave onghimaawe mwaha wa anamwane asilopwana ni asithiyana ayareliwe mweelaponi ela ni mwaha wa asithiyana ari asimayaya ni asilopwana ari asitithaya ti ela:

⁴“Awosa sinoowiiva iretta soowoopiha. Khaawo anaakhupanyere awosa hata kheevithiwa, mene anookhala ntoko ikokhola vatthayani. Animwiiviwa ni ekatana ni etala ni mittembosaya sinookhala sooca wa ipalame sa wiirimu ni axinama a ntuphini.”

⁵Vano Yave oneera ha: “Muhivoloweru mpaani oraawemo nookhwa, muhirowe olalamika hata woonihera ikharari, niwoko Miyo koovenxa nreelihonaka, osivelawaka, murimaaka wooreera mwa muloko ola,” onghima Yave.

⁶“Okhuma maneethi mpaka asikhaani animookhwa mweelaponi ela. Awosa kheevithasiwa naari kheelalamikeliwa ni khaawo aneera iipophe naari ametthe mwaha wa yaawosa.

⁷Khaawo anaavahe yooca yoowaalipihera yaale angwiinlela anamakhwa ni khaawo anaavahe yoowura ya opepesa — hata wa tiithi naari wa maayi.

⁸Muhivolowetho mpaani empakiwamo efesta, mukilaathikino weera mwace ni mwawure ni yaawo.

⁹Vano Yave a ikuru sootheene, Muluku a oYixrayeli, oneera ha: Vamaithoniwanyu ni mweehuhuni ya okumaanyu kinoomalamaliha oruma wa ohakalala ni otteeliwa murima ni wa masu a ootthomeriwa ni namatthomera vanipuroni nna.

¹⁰Nyuwo mwaathaliheraka muloko ola sootheene iya ni awosa yookohani: ‘Yave olakelenle heeni erisa yoowoopiha ela wa hiyo? Nipankeni yootakhala heeni hoye hoye yoottheka heeni nimpakenlaahu Yave Mulukwaahu?’

¹¹Vano mwaaleele yaawo: ‘Ti niwoko na okihiya wa makholowaanyu,’ onghima Yave, ‘ni na otthara miluku sikina erumeelaka ni elapaka seiyo. Awosa yaakihiya ni khayiiwelenle Nlamulonaka.

¹²Vaheera nyuwosa mootepihaxa waapwaha makholowaanyu. Moone moota khula mutthu a nyuwo onttharaawe ettiyamaaru ya murimaawe woonanara, ohiya okiiwelela Miyo.

¹³Tivawo kineeraaka koovonyereni ottai wa elapo ela, mweelaponi hata nyuwo naari makholowaanyu yahaasuwenlaaya ni weiwo munkela orumeelawo miluku sikina othana ni ohiyu, niwoko nkoomorelasanitho ikharari.’”

¹⁴“Wa soothesene, anoophiyera mahuku,” onghima Yave, “asilopwana eneeraaya eheeretho: ‘Ninlipela mwa Nsina na Yave, mwa Yoowo aakhumihale aYixrayeli wExipitu,’

¹⁵mene awosa animweera: ‘Ninlipela mwa Nsina na Yave, mwa Yoowo aakhumihale aYixrayeli mweelaponi mwa ottuttuwani ni mweelaponi sootheene mwa weiwo aawoomolenlaawewo.’ Vano kinimwaahokoloxera mweelaponimwaya, mwa yeeyo kaavanghaaka makholowaaya.

¹⁶Vanonto, kinoowiitthana anamamesera ancipale,” onghima Yave, “ni awosa animwaamesera. Vahoolowaya kinoowiitthana anamalupattha ancipale ni awosa animwaalupattha mmanyaakoni sootheene, mmattumuxani ni mmakhukuni.

¹⁷Maithwaaka annoona iphirosaya sootheene; awosa khayiipithiheiye vamaithoniwaka ni hiihotho sootthekasaya.

¹⁸Kinimwaattaruxa moota woopwahaxa wa sootakhalasaya ni sootthekasaya, niwoko awosa yaaveiha elapwaaka ni icaambulosaya sa mwiikho ni aasariha yoohiyeraaka ni milukusaya sa mwiikho.”

¹⁹Ii! Yave! Ikurusaka ni Nipuronaka noolipaxa, Wootthawelawaka mweehuhuni yoowoopiha, vano miloko sinimoowa wa Nyuwo okhuma ekotenle elapo seeraka: “Makholowaahu yaakhalano miluku soowootha paahi, soohimuteko sihaapakenleru yooreera.

²⁰Mutthu onkhwa onoowera opaka milukusawe? Aani, mene iyo khasinkhala miluku!”

²¹“Tivawo kineeraaka kaaxuttihe; emaara ela kinimwaaxuttiha sa ikurusaka ni owerawaka. Vano anoosuwela weera Nsinanaka ti Yave.”