Read Makhuwa-Shirima Yeremiya 18 Bible Online

Yeremiya 18 - Makhuwa-Shirima bible

Yeremiya 18

¹Masu Yeremiya aakhenlaawe wa Yave ti ala:

²“Murowe vaate wa namoopa ni iwo kinimoovahani mutthengaaka.”

³Vano kaarowa vaate wa namoopa ni kaamoona avaraka muteko ni nreko.

⁴Vano mwaapu oopaawe waampotowela, tivawo namoopa aapankaawetho mwaapu mukina ntoko aatthunaawe.

⁵Vano Yave aahuulumatho ni miyo akeerelaka:

⁶“Ii! Ikhapira sa oYixrayeli! Weeraka Miyo nkinoopakani nyuwo ntoko opankaawe namoopa?” onkoha Yave. “Ntoko oloko mmatatani mwa namoopa, nyuwo muri hiihotho mmatatanimwaka, ikhapira sa oYixrayeli.

⁷Mweehuhuni ekina Miyo kalamulela weera muloko hoye hoye omwene ophwatiwe, onyaanyiwe ni oheliwe nthala,

⁸ni muloko owo kooperenraaka waarukunxa murima mwa soonanarasaya, vano kinookhurunuwa ni nkiruuhela erisa kaavaanenlaaka.

⁹Ni mweehuhuni ekinatho Miyo kaalamulela weera muloko hoye hoye omwene oraseliwe ni ophatteiwe,

¹⁰ni wapaka soonanara vamaithoniwaka ohikiiwelelaka, vano kinoohiya onnene keeraaka kipakele.

¹¹Vano mwaaleele atthu a oYuda ni yaale amanke oYerusaleemu: Yave oneera ha: ‘Moone, kinreherera erisa ni woovaanelelani. Tivawo, muhiye iphirosanyu soonanara ni muceendye mweettelowaanyu ni mitekosanyu.’”

¹²“Vaheera awosa animwaakhula: ‘Muhipacere. Nnoopwaherera ni soovaanelasahu; khula mutthu a hiyo onootthara ettiyamaaru ya murimaawe woonanara.’”

¹³Tivawo Yave oneeraawe ha: “Mwakohakohe eriyari ya miloko: Ookhala otonke wiiwa itthu ntoko iya? Etthu yoowoopihaxa opankaawe mwali oowiikosoopa, Yixrayeli.

¹⁴Etthabwe ya oLebanoni kheengwereya olakaseya mmanyaakonimwaya. Maahaaya ooriira khaanghiya opiluwa erweelaka mmapuroni a ottai.

¹⁵Wa soothesene mulokwaaka wookittiwala; awosa anghisera erubani* miluku soohimuteko, mwa seiyo sinaakwattuliha mphironimwaya ni mphironi sa khalayi. Iyo sohaatannyera weetta moothweelelani mmiseweni soothipakaseya.

¹⁶Elapwaaya enoheleya nthala, eneneero ya otthebwiwa woohimala; ootheene eniiviremo anootheya, epukunyeraka muru.

¹⁷Kinimwaamwaraxa ohoolo wa amwiittanaaya epheyo enrweela mpatta wa ninkhuma nsuwa. Kinimwaarera ettuli nkinaaweha vanihukuni na owiniwawaya.”

¹⁸Awosa yaaheera: “Nrowe, nimvaanelele Yeremiya; niwoko khanimala nihusiho na Nlamulo na musaserdoti*, hata olaka wa namiruku, naari masu a maprofeeti. Vano, nrowe namoothere weera nihiiwe onghimaawe.”

¹⁹Ii! Yave, mukiiwe; mwiiwe yeeyo anamootheraaka anghimaaya!

²⁰Weeraka eliviweke yooreera mwa yoonanara? Aakithipela miyo elakasa. Muupuwelele weera miyo kaaheemela vamaithoniwanyu kuulumaka mwaha wa yaawo weera muhaapattiyere isarasanyu.

²¹Vano ngwinnyerere anamwanaaya mutalani ni mukatanani. Axaaraya etatuxiweke asinaamukhweli woohikhalano anamwane; asiiyaya yiiviwe ni amiravowaaya yiiviwetho ni ekatana mukhottoni.

²²Wiiwanyeye okhuwela ongweela mmawannyaya mwaaruuhelaka wootutuxereya anakhotto a elapo ekina, niwoko aathipa elakasa weera ekivare ni aakireya miraakho weera epharihe inaawosaka.

²³Mene ii! Yave, Nyuwo moosuwela okivaanelelawaya okiiva. Muhilevelele sootakhalasaya hata muhittiwale sootthekasaya vamaithoniwanyu. Awosa ephwatiwe ohoolowanyu. Mwaattaruxe mweehuhuni mwa isarasanyu.