Read Makhuwa-Shirima Yeremiya 19 Bible Online

Yeremiya 19 - Makhuwa-Shirima bible

Yeremiya 19

¹Yave oneera ha: “Murowe ni mwathume mwaapu wa namoopa. Mwaakuxetho akina a asitokweene ni asaserdoti*

²ni murowe munreyareyani na oBen-Himoni, vakhiviru wa mulako wa Nivali. Vawo mwalaleiye masu kineeraka kooleeleni,

³mweeraka: ‘Ii! Mamwene a oYuda ni amaki a oYerusaleemu, mwiiwe masu a Yave. Vano Yave a ikuru sootheene, Muluku a oYixrayeli oneera ha: Mwiiwe, kinooruuhela erisa nipuro nna mpaka okhaawa maaru yaawo eneera yiiwe.

⁴Vano awosa aakihiya ni aatatuxa nipuro nna nipuro na miluku sa anamarwa; awosa aahisera erubani* miluku mwa seiyo awosa, naari makholowaaya, hata mamwene a oYuda yahaasuwenlaayaru ni aasariha nipuro nna ephome ya oohinthowa.

⁵Awosa aamutekela Bahali* mapuro a mmattumuxani wa Bahali* weera yaahiseremo anamwanaaya asilopwana ni asithiyana — etthu Miyo kihitonkwaaka olamulela hata kahuupuwenlaaka.

⁶Tivawo, mwiipasoope, anoophiyera mahuku,’ onghima Yave, ‘atthu eneeraaya ehiitthaneletho nipuro nna oTofeti, hoye hoye Nreyareya na oBen-Himoni, mene Nreyareya na Noomala.

⁷Vanipuroni nna kinoonanariha soovaanela sa oYuda ni oYerusaleemu. Kinoopakiha weera yiiviwe ni amwiittanaaya mukatanani; mmatatani mwa yaawo anaattharatthara ni kinoovaha mittembosaya ntoko yooca wa ipalame sa wiirimu ni axinama a ntuphini.

⁸Kinoophwata esidade ela kitatuxaka eneneero yootthebwiwa; ootheene eniiviremo onoowuuma owanoni etheyeke, niwoko na makhwattaaya ootheene.

⁹Kinoopakiha weera yaakhuure anamwanaaya asilopwana ni asithiyana ni awosa anookhuurana mweehuhuni yoohaawa ya oriciwa ni amwiittanaaya anaasaasa okumaaya.’

¹⁰Vano mpwexe mwaapu ohoolo wa asilopwana yoohoonleni,

¹¹ni mwaaleele: ‘Yave a ikuru sootheene oneera ha: Kinoopwexa muloko ola ni esidade ela mooteene yoowo omphweeyaaya mwaapu ola wa namoopa ohiwereyaka orehereratho. Awosa animwaavitha anamakhwa oTofeti mpaka omala mapuro.

¹²Ti yeeyo kineeraka kipakele nipuro nna ni amakaaya, onghima Yave, Kinoopakela esidade ela ntoko oTofeti.

¹³Impa sa oYerusaleemu ni sa mamwene a oYuda sinooveihiwa ntoko nipuro nna na oTofeti — impa sootheene mwa seiyo itaratosaya yaahisenraaya erubani* ithenyeeri sa wiirimu ni yaayeehenraaya soowura miluku sikina.’ ”

¹⁴Vano Yeremiya aahokolowa oTofeti mwa weiwo Yave aamurumihenlaawe weera athaliherewo otthuna wa Muluku, aneemela vanipuwani na Empa ya Yave ni aaweerela atthu ootheene:

¹⁵“Yave a ikuru sootheene, Muluku a oYixrayeli oneera ha: ‘Mwiiwe, kinooruuhela esidade ela ni mittetthe sa mukhwipimwaya irisa sootheene kaalaleenraaka niwoko khayiiwelenle, ehitthunaka wiiwa maswaaka.’”