Read Makhuwa-Shirima Yeremiya 21 Bible Online

Yeremiya 21 - Makhuwa-Shirima bible

Yeremiya 21

¹Yeremiya aahaakhela masu a Yave mweehuhuni mwene Zedekiya aamurumihalaawe Paxuri, mwaana mulopwana a Malekiya ni musaserdoti* Zefaniya, mwaana mulopwana a Maaseya. Awosa yaamweerela:

²“Mwanikohererele Yave niwoko Nebukadenezari, mwene a oBabiloniya onooniwanano. Apaale Yave onoonipakelatho sootikhinihasawe ntoko aapankaawe khalayi moota wooweera Nebukadenezari onoohokoleela elapwaawe.”

³Vaheera Yeremia aawaakhula: “Mwamuleele Zedekiya:

⁴‘Yave Muluku a oYixrayeli oneera ha: Miyo kihanle vakhaani woorukunuwelani ikapwitthi siri mmatatanimwanyu mwa seiyo muningwanelaanyuno mwene a oBabiloniya ni aBabiloniya anooricani vaate wa exiri. Miyo kinimwaathukumanyiha mpuwa mwa eside ela.

⁵Miyo muneenaaka kinimoowananani ni ntata noolipaxa, ni moono wooweraxa musarani, moonyoonyiwani wootepaxa.

⁶Kinoowiiva amaki a esidade ela — atthu nitho axinama — ni awosa animookhwa ni nihooxo noowoopiha.

⁷Vahoolowaya,’ onghima Yave, ‘Miyo kinoomwinnyerera Zedekiya, mwene a oYuda, asitokweenaaya ni amaki a esidade ela eneera ehalahale munihooxoni, mukatanani ni mutalani mmatatani mwa Nebukadenezari, mwene a oBabiloniya ni mwa amwiittanaaya mwa yaale antthuna owiiva. Nebukadenezari onoowiiva, ahaamorelaka ikharari, hata ihaaya naari murima wooreera.’

⁸Ohiya toko yeeyo, mwaleele muloko: ‘Yave oneera ha: Nnene! Kingwooniherani olelo ephiro ya okumi ni ya okhwa.

⁹Yaale eneera ehiixinnyerere mwa aBabiloniya yoorinceni animookhwa ni ekatana, etala hoye hoye nihooxo. Vaheera yaale eneera ekhume yiixinnyereraka mwa aBabiloniya anookhalano okumi. Awo anootthawa yoopoweke.

¹⁰Koolakela opakela yoonanara esidade ela, ehikhanle yooreera, onghima Yave. Eyo enimwinnyereriwa mmatatani mwa mwene a oBabiloniya ni owo onoohisa.

¹¹Ohiya toko yeeyo, mwaleele emusi ya emwene ya oYuda: ‘Mwiiwe masu a Yave:

¹²Ii! Ekhapira ya Davide, Yave oneera ha: Mpake ekhaikhai khula oxeexelo ni mmoopole mmatatani mwa namahasula yoole ohuhuliwe. Waahikhala hiiho, isarasaka sinoopatta sihiseke ntoko mooro woohicipiheya niwoko na soonanara mumpakaanyu.

¹³Kiri Mwiittanaanyu, oYerusaleemu, nyuwo mmanke vasulu vanreyareyani nna vamwala, onghima Yave, aani nyuwo muneera: “Taani anaaniwanane? Taani anaawere ovolowa nipuronahu na otthawelawahu?”

¹⁴Miyo kinimoottaruxani kittharihaka mitekosanyu, onghima Yave. Miyo kinoopattiha mooro moothakonimwanyu oneera ohise sootheene siri mukhwipimwaya.’ ”