Read Makhuwa-Shirima Yeremiya 24 Bible Online

Yeremiya 24 - Makhuwa-Shirima bible

Yeremiya 24

¹Ni Yave aakoonihera mipapara miili sa ifiigu siikaathiweene ohoolo wa Empa ya Yave. Eyo yeereiye Nebukadenezari aaroihaleene oYerusaleemu wootthukiwani oBabiloniya, Yehoyakini, mwaana mulopwana a Yehoyakimi, mwene a oYuda vamoha ni ahooleli a oYuda, ni aneettottho ni anamaratta.

²Mpapara mmoha waakhalano ifiigu sooreeraxa, ntoko seiye siniitthwa mweehuhuni ya ohepha; ifiigu sa mpapara mukinoowo saari soonanara ni soohiceya.

³Vano Yave aakikoha: “Yeremiya, munoonani?” Miyo kaamwaakhula: “Ifiigu. Sooreera iyo ti sooreeraxa, vaheera soonanara iyo ti soohiceya.”

⁴Vano Yave aakeerela:

⁵“Yave, Muluku a aYixrayeli oneera ha: ‘Mooteene yoowo kinoonelaakamo okhala sooreera ifiigu, kingwoonelatho okhala ooreera anamatthukiwa a oYuda, mwa yaawo kiwoomonlaaka nipuro nna wa elapo ya oBabiloniya.

⁶Kinimwaapwattha, ni nkinaahokoloxera elapweene yeela. Miyo kinimwaatekiha, kihaaphwataka; Miyo kinimwaatikithera, kihaavenxaka.

⁷Miyo kinimwaavahasa murima woowera okisuwela, aani osuwela weera Miyo ti Yave. Anookhalasa mulokwaaka, ni Miyo kinookhala Mulukwaaya, niwoko awosa anoohokoleela wa Miyo ni murima wootheene.

⁸Vaheera ntoko simpakeliwaaya ifiigu soonanara ni soohiceya,’ onghina Yave, ‘hiihotho kinoompakela Zedekiya, mwene a oYuda, ni ahoolelaawe nitho yaawo ahalahanle oYerusaleemu — okhuma awosa ankhala elapweene yeela mpaka wExipitu.

⁹Miyo kinimwaatatuxa etthu yoowoopopihera ni ya mwiikho wa omwene wootheene wa mulaponi. Khula nipuro kineeraaka kiwoomolele, anoothanliwa, anootthebwiwa, animuulihiwa muru ni anoolaphiwa.

¹⁰Kinimwaarumihelasa ekhotto, etala ni nihooxo mpaka eneeraaya emalamalihiwe mulaponi kaavanghaaka awo ni makholowaaya.’ ”