Read Makhuwa-Shirima Yeremiya 25 Bible Online

Yeremiya 25 - Makhuwa-Shirima bible

Yeremiya 25

¹Masu yaamurweela Yeremiya mwaha wa muloko wootheene wa oYuda vayaakhani yanaaxexe ya Yehoyakimi, mwaana mulopwana a Yosiya, mwene a oYuda. Vano yaari eyaakha yoopacera ya Nebukadenezari, mwene a oBabiloniya.

²Mprofeeti Yeremiya aaheerela muloko wootheene wa oYuda ni amaki ootheene a oYerusaleemu:

³Mweehuhuni ya iyaakha miloko miili ni tthaaru masu a Yave yannakirweela — okhuma eyaakha yanaamuloko ni tthaaru ya olamula wa Yosiya, mwaana mulopwana a Amoni, mwene a oYuda, mpaka nihuku na olelo. Ni miyo kohuuluma ni nyuwo imaara soohaalikeleya, vaheera nyuwosa khamukiiwale.

⁴Yave aarimoorumihelaniru arumeiyaawe, maprofeeti, emaara ti emaara, khangwiiwale, hata khamwaapwantthe.

⁵Awosa yannaweerelani: “Murukunxe murima khula mutthu mweettelowaawe woonanara ni wa mapakelowaawe oonanara, ni nyuwosa munoopwaherera okhala mulaponi Yave oovanghaaweni nyuwo ni makholowaanyu wa mahuku ootheene.

⁶Muhitthare miluku sikina weera mukokhorele ni mulape; muhitannye isarasaka ni miluku soopakiwa ni nyuwo. Hiiho Miyo nkinooruuhelani erisa.”

⁷“Vaheera nyuwosa khamukiiwale ni mootannya isarasaka ni miluku nyuwosa mpankaanyu, mwiiruuhelaka erisa,” onghima Yave.

⁸Vano Yave a ikuru sootheene oneera ha: “Mweenre muhiiwasa maswaaka,

⁹kinimwiitthana miloko sootheene sa ottuttuwani ni murumeiyaaka Nebukadenezari, mwene a oBabiloniya,” onghima Yave. “Kinooruuha weera siwaneno elapo ela, amakaaya ni miloko sootheene soorukureenreni. Miyo kinimoophwatani woomalela ni kinimookhalihani moopopihero, otthebwiwa, ni oheleya nthala woohimala.

¹⁰Kinoomalamaliha okhuwela wa otthapa ni wa ohakalala, masu a namatthomera ni a namatthomeriwa, oruma wa nxilo ni omwaleela wa onyaari.

¹¹Elapo yootheene ela enoothatuwa nthala noohiiwa ttewu, ni muloko ola onoolamuliwa ni mwene a oBabiloniya wa iyaakha miloko mithannamiili.

¹²Vaheera sikwanenleene iyaakha miloko mithannamiili, kinoomuttaruxa mwene a oBabiloniya ni mulokwaawe, elapo ya oBabiloniya, niwoko na nthowanaya,” onghima Yave, “ni kinoohiya yoophwateyeene wa mahuku ootheene.

¹³Kinookwanihera mulaponi mmo sootheene kuulumenlaaka yeeyo — sootheene silempwale mulivurunimu, Yeremiya uulumenlaawe miloko sootheene.

¹⁴Vano aBabiloniyeene yaawo anoopakiwa ipottha ni miloko sincipale ni mamwene matokweene; Miyo kinimwaatthuvela kittharihaka ipakelosaya ni mitekosaya.”

¹⁵Yave, Muluku a oYixrayeli aakeerela ha: “Mwaakhele mmatatanimwaka ekoomixi ela esareiye eviinyu ya isarasaka ni mwawurihe miloko sootheene kinoorumihelaakani.

¹⁶Siwunreene, sinooveveleya, soohorahoreene niwoko na ekatana kineeraaka kaarumihele.”

¹⁷Vano kaakuxa ekoomixi mmatatani mwa Yave, ni mwa yeeyo kaapakiha weera siwure miloko sootheene mwa seiyo Yave aakirumihenlaawe:

¹⁸Yerusaleemu ni mittetthe sa oYuda, mamwenaaya ni ahoolelaaya, weera seiyo ehiye ttewu ni moopopihero, otthebwiwa ni nlapho ntoko eneereyaaya olelo;

¹⁹Farawu*, mwene a wExipitu, anamalakaawe, ahoolelaawe ni mulokwaawe, wootheene,

²⁰ni anamarwa ootheene ankhalawo; mamwene ootheene a wUzi; mamwene ootheene a oFilisti: a wAskeloni, oGaza, wEkroni ni muloko ohanle wAxidoti;

²¹wEdomi, oMowabe ni wAmoni;

²²Mamwene a oTiro ni oZidoni; mamwene a mucirumbani ni a ilapo sa okhopela ephareiya;

²³oDedani, oTema, oBuzi ni ootheene ammetthamettha;

²⁴mamwene ootheene a wArabiya ni mamwene ootheene a anamarwa ankhala munikareni;

²⁵mamwene ootheene a oZimri, a wElami ni a oMediya;

²⁶mamwene ootheene a ottuttuwani, ookhuveelana hoye hoye oorakamelana mukina ni mukhwaawe; ni imwene sootheene sa mulaponi. Vahoolo wa ootheenaawo mwene a oXexakitho onoowura ekoomixi eyo.

²⁷“Woottharelana mwaweerelase: ‘Yave a ikuru sootheene, Muluku a oYixrayeli oneera ha: Ngwure, muhapaliwe, murapheye, mmore ni muhivenyetho, niwoko na ekatana kinoorumihelaakani.’

²⁸Vaheera yakhootta owura, mwaweerele: ‘Yave a ikuru sootheene oneera ha: Nyuwosa munoowura!

²⁹Moone, kimpacera oruuhela erisa esidade enkuxa Nsinanaka; ni nyuwosa munuupuwela weera munoovenya oohittaruxiwa? Hata vakhaani khamukhala oohittaruxiwa! Kinaaruuhela ekatana amaki ootheene a mulaponi, onghima Yave a ikuru sootheene.’

³⁰Vano, mwaathalihere yaawosa masu ootheene ala, mweeraka: ‘Yave ontturuma ari osulu; onkukutteela wookhalawawe wootteela; ontturumela mukuruni yawaweene. Owo onkhuwela ntoko anamavotta a iwuuva*; onaakhuwelela amaki ootheene a mulaponi.

³¹Munyakunyaku oniiwanyeya mpaka ekotenle elapo, niwoko Yave onthoonyera soopaka sa miloko, ni onthoriha omutthu wootheene: Owo onoowinnyerera atakhali woophwatiwani ni ekatana,’ ” onghima Yave.

³²Yave a ikuru sootheene oneera ha: “Moone! Erisa ennamwareela khula muloko; nihooxo noowoopiha ninnakhuruwela elapo yootheene.”

³³Nihuku nno, eniyiiviwe ni Yave anoosareya mapuro ootheene — mipatta sootheene sa mulaponi. Khaawo anaawiinlele, ni kheettottanyiwa weera evithiwe, mene eniikhale ethaadyira ya etthaya.

³⁴Akukhuli, mvenye ni mukhuwele! Mphirikeye vantthupini, asitokweene a muhuwo! Niwoko nohoophiyerani nihuku na wiiviwawanyu ni na omwaraxiwawanyu; nyuwosa munoomora ni munoottikitthasiwa ntoko mapoottoro makhaanene.

³⁵Naari alamuli hata akukhuli a muloko khayoona matthawelo.

³⁶Oniiwanyeya okhuwela ni olalamika wa akukhuli ni alamuli a muhuwo, niwoko Yave omphwata moocihamwaya.

³⁷Soociha soomaaleleya soohuhuliwa niwoko na mooro wa isara sa Yave.

³⁸Owo omvenya munikhukunimwawe ntoko mwatto; elapwaaya yoohuhuleya niwoko na ekatana ya namahooxa ni mooro wa isara sa Yave.