Read Makhuwa-Shirima Yeremiya 28 Bible Online

Yeremiya 28 - Makhuwa-Shirima bible

Yeremiya 28

¹Mmweerini wanaathanu wa eyaakheene yeele, eyaakha yanaaxexe, apacerakaru olamula Zedekiya, mwene a oYuda, Hananiya, mwaana mulopwana a Azuri, mprofeeti aayareliwe oGibiyoni, aakeerela Mpaani mwa Yave, vamaithoni wa asaserdoti* ni muloko wootheene:

²“Yave a ikuru sootheene, Muluku a aYixrayeli oneera ha: ‘Kinoomaliha nihasu na mwene a oBabiloniya.

³Muyaakhani piili kinoohokoloxera nipuro nenenenna ikaruma sootheene sa Mpaani mwa Yave Nebukadenezari, mwene a oBabiloniya, okuxalaawe nno arowakano.

⁴Kinoomuhokoloxeratho nipuro nenenenna Yehoyakini, mwaana mulopwana a Yehoyakimi, mwene a oYuda, ni anamatthukiwa ootheene a oYuda aronghiwe oBabiloniya,’ oneera Yave, ‘niwoko kinoomaliha nihasu na mwene a oBabiloniya.’”

⁵Vaheera mprofeeti Yeremiya aamwaakhula mprofeeti Hananiya ohoolo wa asaserdoti* ni wa muloko wootheene waari Mpaani mwa Yave:

⁶“Ame! Yave apake hiiho! Yave akwanihere masu nyuwo muthalihenraanyu, wooruuha ikaruma sa Mpaani mwa Yave ni anamatthukiwa ootheene a oBabiloniya wa nipuro nna.

⁷Wa soothesene, mwiiwe yeeyo kinooruuhelaakani nyuwo ni muloko wootheene:

⁸Maprofeeti yaakhanle nyuwo ni miyo nihiyariwe, okhuma ihuhu sa khalayi, yaathaliha sa ikhotto, erisa ni nihooxo wa miloko sincipale ni imwene sitokotoko.

⁹Vaheera mprofeeti onthaliha weetteleya nnene onoosuweliwa ntoko oorumihiwa a ekhaikhai a Yave yakhumelela yeeyo onthaliheraawe.”

¹⁰Vano mprofeeti Hananiya aapasa nivatta noolemela muxiko mwa Yeremiya,

¹¹aneera ohoolo wa muloko wootheene: “Yave oneera ha: ‘Ti hiiha kineeraaka kivenxeke nihasu na mwene a oBabiloniya, kivenxaka muxiko wa miloko sootheene mweehuhuni mwa iyaakha piili.’ ” Vahoolowaya, mprofeeti Yeremiya aavenyawo.

¹²Mprofeeti Hananiya amalihaleene opasa nihasu muxiko wa mprofeeti Yeremiya, Yave amweerela Yeremiya:

¹³“Mwamuleele Hananiya: ‘Yave oneera ha: Nyuwo moopasa nivatta noolemela na etthaabwa, mene vanipuroniwaya munookhaliha nivatta noolemela na eyuuma.

¹⁴Yave a ikuru sootheene, Muluku a oYixrayeli oneera ha: Kinoopakiha nivatta noolemela na eyuuma vaxiko wa miloko sootheene weera simurumeele Nebukadenezari, mwene a oBabiloniya, ni iyo nsilamuliwe ni yoowo. Mpaka axinama a ntuphini anoolamuliwa ni yoowo.’ ”

¹⁵Vano mprofeeti Yeremiya aamweerela Hananiya: “Mwiiwe Hananiya! Yave khoorumingheni, mene moohapuxa muloko ola, onaroromela wootha.

¹⁶Tivawo Yave oneeraawe ha: ‘Kinimoovenxani mulaponi. Nyuwo munimookhwa mutano, niwoko moomvaanya Yave.’ ”

¹⁷Vano mprofeeti Hananiya aahookhwa mmweerini wanaathannamiili wa eyaakheene yeele.