Read Makhuwa-Shirima Yeremiya 29 Bible Online

Yeremiya 29 - Makhuwa-Shirima bible

Yeremiya 29

¹Ti hiiha Yeremiya aalempaawe mukarattani arumihaka oYerusaleemu wa ahooleli, yaahalahanle wa anamatthukiwa, asaserdoti*, maprofeeti ni muloko wootheene Nebukadenezari aatthunkaawe oYerusaleemu aronghaka oBabiloniya.

²Eyo yeereiye vahoolo wa mwene Yehoyakini ni pwiyamwene mutokweene, asitokweene a empa ya emwene, ahooleli a oYuda ni oYerusaleemu, anamapakapaka ni anaruso yaatthukiwaaya oYerusaleemu eronghiwaka oBabiloniya.

³Owo aarumiha ekaratta amwinnyereraka Elasa mwaana mulopwana a Xafani, ni Gemariya, mwaana mulopwana a Hilikiya, mwa yaawo Zedekiya, mwene a oYuda, aarumihenlaawe wa Nebukadenezari, mwene a oBabiloniya. Vano ekaratta yeera ha:

⁴Yave a ikuru sootheene, Muluku a oYixrayeli, oneera ha wa anamatthukiwa ootheene kaavenxalaaka oYerusaleemu kaaruuhaka oBabiloniya:

⁵“Muteke impa ni mukhalemo; mphatteye mmatimbeni ni muce soowiimasaya.

⁶Muthelane ni mukhalane anamwane asilopwana ni asithiyana; mwaathanle asithiyana oowaatheliha anamwaniinyu ni mwaathelihe anamwaniinyu asithiyana weera ekhalanetho anamwane asilopwana ni asithiyana. Murelaneke, muhivukuweke.

⁷Mwaasaase weetteleya nnene wa esidade mwa weiwo Miyo kootthukenlaakani ni mumvekele Yave mweerelaka yeeyo, niwoko weetteleyawanyu nnene oneereleya mwa yeeyo.”

⁸Aani, Yave a ikuru sootheene, Muluku a oYixrayeli, oneera ha: “Muhaahiye maprofeeti ni anahako ari eriyaraanyu yoolokotthakani. Muhiwiiwelele mwa sooloha munaalipiheraanyuno.

⁹Awosa anthalihera soowootha mwa Nsinanaka. Miyo nkaaruminghe,” onghima Yave.

¹⁰Yave oneera ha: “Sikwanenleene iyaakha miloko mithannamiili mureene oBabiloniya, Miyo kinookwanihera yoororomelihaaka mwaha wa nyuwo, woohokoloxerani nipuro nna.

¹¹Vano Miyo koosuwela soowuupuwelasaka kiweerelakani nyuwo,” onghima Yave, “soowuupuwela keerelaka murettelaanyu ohikhanle woophwatani, soowuupuwela woovahani oweherera ni sa muhoolo.

¹²Vano nyuwo mmwikikhuwelele Miyo, ni mmwikivekele, ni Miyo kinoowiiwani.

¹³Nyuwo mmwikaase ni munookiphwanya mwakaasa ni murima wootheene.

¹⁴Miyo kinimwiihiya weera kiphwanyiwe ni nyuwo,” onghima Yave, “ni kinimoohokoloxani wootthukiwani. Miyo kinimoothukumanyihani mmilokoni moothemwene ni mmapuroni moothemwene koomwaraxenlaakani, ni kinimoohokoloxerani mmapuroni kootthukenlaakani,” onghima Yave.

¹⁵Nyuwo naari mweeraka: “Yave oonikhalihera maprofeeti oBabiloniya,”

¹⁶vaheera Yave ommweerela ha mwene onkilaathela ehice ya emwene ya Davide ni wa muloko wootheene ompwaherera okhala esidade ela, asikhwiinyu ahirongwe ni nyuwo wootthukiwani.

¹⁷Aani, Yave a ikuru sootheene oneera ha: “Kinimwaarumihela ekhotto, etala ni nihooxo; kinimwaapakela ntoko ifiigu soonanaraxa soohiwereya oceya.

¹⁸Miyo kinimwaattharelela ni ekhotto, etala ni nihooxo; kinimwaapaka moopopihero wa imwene sootheene sa mulaponi, nlapho, ethoonyero, otthebwa ni munyakunyaku eriyari ya miloko sootheene mwa weiwo Miyo kaamwaraxenlaaka.

¹⁹Kinoopaka yeeyo, niwoko awosa khayaapwatthenle maswaaka,” onghima Yave, “masu kaarumihenlaaka mwa arumeiyaaka, maprofeeti. Ni nyuwosatho khampwatthenle!” onghima Yave.

²⁰Vano mwiiwe masu a Yave, anamatthukiwa ootheene nyuwo, koovarenlaakani oYerusaleemu kooronghakani oBabiloniya.

²¹Yave a ikuru sootheene, Muluku a oYixrayeli oneera ha mwaha wa Ahabi, mwaana mulopwana a Kolaya ni wa Zedekiya, mwaana mulopwana a Maaseya, anoothaliherani nyuwo soowootha mwa Nsinanaka: “Miyo kinoowinnyererasa mmatatani mwa Nebukadenezari, mwene a oBabiloniya, ni owo onoowiiva, nyuwo moonaka.

²²Mwaha wa yeeyo, anamatthukiwa ootheene a oYuda ari oBabiloniya anoovarela muteko nlapho nna: ‘Yave oopakeleni ntoko aampakenlaawe Zedekiya ni Ahabi, mwa yaawo mwene a oBabiloniya aahinsaawe ereene nlelo ni okumi.’

²³Niwoko aapaka yoololo oYixrayeli: Aararuwa ni axaara a asinthamwenaaya ni mwa Nsinanaka ahuuluma soowootha, Miyo kihaalamulenlaaka wuuluma. Vaheera Miyo kineera kisuwelaka; kiri Namoona a yeeyo,” onghima Yave.

²⁴Munleele Xemayeya muNehelami:

²⁵“Yave a ikuru sootheene, Muluku a oYixrayeli oneera: Nyuwo moorumiha ikaratta mwa nsinananyu wa muloko wootheene wa oYerusaleemu, Zefaniya, mwaana mulopwana a musaserdoti* Maaseya, ni wa asaserdoti* ootheene. Nyuwo mmweerenle ha Zefaniya:

²⁶‘Yave ohoothanlani okhala musaserdoti* vanipuroni na Yehoyada ntoko namawehaweha Empa ya Yave; waatthuneya nyuwo omutthukelela vamukhukuluni ni onyooro, akhalaru naanepa oniixoonihera ntoko mprofeeti.

²⁷Vano heeni nyuwo muhimuhiihalaanyu Yeremiya a wAnatote, oniixoonihera ntoko mprofeeti variyariwanyu?

²⁸Owo oonirumihela mutthenga ola hiyo nri oBabiloniya, eeraka weera otthukiwa onoovirelela, tivawo ontthuneyaaya oteka impa, omakawo, ophatteya mmattimbeni ni oca soowiimasaya.’”

²⁹Wa soothesene musaserdoti* Zefaniya aamusomela ekaratta mprofeeti Yeremiya.

³⁰Vano Yave aamweerela Yeremiya:

³¹“Mwaarumihele mutthenga ola anamatthukiwa ootheene: Yave onghima ha sa Xemayeya muNehelami: ‘Kiroohimurumiharu, Xemayeya ohoothaliherani nyuwosa apakihaka weera nyuwosa mpwaherere ngwoothani.

³²Tivawo Yave oneeraawe ha: Kinoomuttaruxa Xemayeya, muNehelami, ni ekhapiraaweene. Khamuhaleelaru naari mmoha eriyari ya muloko ola, ni owo khoona itthu kineeraaka kipake keerelaka mulokwaaka, onghima Yave, niwoko owo oolaleiya omvaanya Yave.’”