Read Makhuwa-Shirima Yeremiya 3 Bible Online

Yeremiya 3 - Makhuwa-Shirima bible

Yeremiya 3

¹“Mulopwana aahiya amwaariye, ni emwalanneene enatheliwa ni mulopwana mukina, mulopwana oopacera onoomuhokoleela? Elapo kheevaliheya woomalela? Vaheera nyuwo mooraruwano ancipale ni vano, muntthuna ohokoleela wa Miyo?” onkoha ti Yave.

²“Ngwehe mattumuxa ni moone: nookhala nipuro muhimveruliwaanyuwo? Nyuwo mookilaathi muxerexere ephiro mwaawehereraka munraruwanaanyu, mookilaathi ntoko namathaamathaama munikareni. Nyuwo moovaliha elapo ni opuutaanyu ni otakhalawanyu.

³Tivawo ewaleiyaaya epula ni ehintthulaayaru. Vaheera nyuwo mwiixooniheraka vanlakani ntoko puuta, munkhootta wuulihiheya muru.

⁴Nyuwo khamukiitthanne vanaano va: ‘Tiithaaka, Nthamwene a emiravowaaka,

⁵munoonyoonyiwa mahuku ootheene? Ohimorelawanyu ikharari onoopwaherera mpaka ommaleloni?’ Ti hiiho nyuwo munuulumaanyu, mene mumpaka soonanara sootheene mungwerelaanyu.”

⁶Moolamulani wa mwene Yosiya, Yave aakeerela: “Nyuwo mohoona yoohiroromeleya apankaaya aYixrayeli? Aawela mwaako wootheene woorakamela, enarowa vathi wa nyiri sootheene soopombaxa weera eraruwe.

⁷Epankeene sootheene iyo, kuupuwela weera anoohokoleela wa Miyo, mene khaahokoleenle. Ni axunnaya oovariha aYuda, ahoona itthusene seiyo.

⁸aYuda ahoonatho weera kohaavaha nlaxi na omwalana wa aYixrayeli oohiroromeleya niwoko na oraruwawaya wootheene. Hata hiiho kohoona weera axunnaya, aYuda, anamavariha, aararuwatho ehoovaka.

⁹Yeenre wahiwoopihaka oraruwa, aYuda yaavaliha elapo, eraruwakano miluku sa maluku ni sa itthaabwa.

¹⁰Orookhalaru hiiho, axunnaya aYuda anamavariha, khaahokoleenle wa Miyo ni murima wootheene, mene ni woothereriha,” onghima Yave.

¹¹Yave aakeerela: “aYixrayeli oohiroromeleya, fataari ovirikana ni aYuda, anamavariha.

¹²Murowe ni mwalaleiye masu ala mpatta wa ottuttuwani: ‘Ii! aYixrayeli oohiroromeleya, muhokolowe,’ onghima Yave, ‘kinimoomorelani ikharari ni nkinoonyoonyeriwani, aani nkinoonyoonyeriwani mahuku ootheene,’ onghima Yave.

¹³Mulape nthowananyu paahi. Moomvaanya Yave Mulukwaanyu, mohiixinnyerera wa miluku sikina vathi wa nyiri sootheene soopombaxa ni khamukiiwelenle Miyo,” onghima Yave.

¹⁴“Muhokolowe, muloko woohiroromeleya,” onghima Yave, “niwoko Miyo ti Aiyinyu. Kinimookuxani — mmoha a khula muttetthe ni eeli a khula nihimo — ni kinimoohokoloxerani oSiyoni.

¹⁵Vano kinimoovahani ahooleli ansivela otthunawaka, mwa yaawo eneera yoohooleleni mmirukuni ni ngwiiwexexani.

¹⁶Mmahukuni awo, waattawanyu waandyeerereyaka vancipale mweelaponi,” onghima Yave. “Asilopwana kheerwatho yeera: ‘Arka* a wiiraana a Yave.’” Kheekhala mmuupuwelonimwaya hata kheewuupuwelelatho; atthu kheewaasaasa Arka* awo hata kheerwa epakiwa akina.

¹⁷Ehuhuweene yeeyo animwiitthana oYerusaleemu ‘Ehice ya Emwene ya Yave’ ni miloko sootheene sinoothukumana oYerusaleemu weera sittittimihe Nsina na Yave. Seiyo khasirwatho sitthara ettiyamaarwaaya.

¹⁸Mmahukuni awo ikhapira sa Yakobe sinoothukumanano seiyo sa aYixrayeli ni vamoha sinoohokolowa elapo ya ottuttuwani, sirowaka wa elapo kaavanghaaka makholowaanyu ntoko yoohiyeriwa.

¹⁹Miyo muneenaaka keenre: “Kaatthunaxa waapaka nnene ntoko ampakeliwaaya anamwane kaavahaka elapo yootthuneyaxa, yoohiyeriwa yooreerelaxa variyari wa miloko sootheene. Kuupuwela weera mwaankiitthana ‘Tiithi’ ni khamwaahiya okitthara.

²⁰Vaheera ntoko muthiyana onimvariha iyawe, ipuumba sa oYuda,” onghima Yave, “hiiho nyuwo khamuroromeleiye wa Miyo.”

²¹Okhuwela oniiwanyeya vanttumuxani, wiinla ni odyoonttelela wa muloko wa oYixrayeli, niwoko waathanla iphiro sookhoromana omuttiwalaka Yave Mulukwaaya.

²²“Muhokolowe, muloko woohiroromeleya; kinoolamiha murimaanyu woovaanya.” Muloko waahaakhula: “Aani, nnimoowa wa Nyuwo, niwoko Nyuwo ti Yave Mulukwaahu.”

²³Vekhaikhai, naalapaahu miluku sikina vanttumaxani ti wiilokottha; vekhaikhai ovuluxiwa wa oYixrayeli ori mwa Yave Mulukwaahu.

²⁴Okhuma emiravowaahu miluku soowuuliha muru soomaliha soowiima sa miteko sa makholowaahu — mihuwosaya sa ikhondoolo ni imombe nitho anamwanaaya asilopwana ni asithiyana.

²⁵Niixaatalele oowuulihiheyeene muru ni omora ekhove onikhuneele. Noomutthekela Yave Mulukwaahu — hiyo nitho makholowaahu; okhuma enamwanaahu mpaka olelo khanimwiiwelenle Yave Mulukwaahu.”