Read Makhuwa-Shirima Yeremiya 31 Bible Online

Yeremiya 31 - Makhuwa-Shirima bible

Yeremiya 31

¹“Mweehuhuni eyo,” onghima Yave, “kinookhala Muluku a ipuumba sootheene sa aYixrayeli, ni awosa anookhala mulokwaaka.”

²Yave oneera ha: “Muloko woopongwe mookhwaani onoophwanya ekhavihero munikareni. Kinimoowa weera kaavahe aYixrayeli wiitthuuwa.”

³Yave aahiixoonihera wa hiyo khalayi, eeraka: “Miyo kohoosivelani ni osivela woohimala; Miyo kohoopurulelasani nyuwo wa Miyo moosivelanimwaka woororomeleya.

⁴Miyo kinimootekatho, Ii! Mwaamwali oowiikosoopa oYixrayeli! Weyo onooraseliwa! Weyo onimwiiphwanelihatho ni miheya ni onookhuma wiinaka ni yaawo anghakalala.

⁵Onoophatteyatho imatta sa iwuuva* mmattumuxani a oSamariya; aani anamalima anoophatteya ni anoohakalalela soowiimasaya.

⁶Vano nnoophiyera nihuku anamalipelela eneeraaya ekhuwele mmattumuxani a wEfrayimi: ‘Nrowe, niwele oSiyoni, vamaithoni wa Yave Mulukwaahu.’”

⁷Yave oneera ha: “Mwiipe ni ohakalala mwaha wa Yakobe; mukhuwele muntthapelaka mutokweene a miloko! Mulaleiye ni munttottopele, mweeraka: ‘Ii! Yave mvuluxe mulokwaanyu ohalahanle oYixrayeli.’

⁸Moone Miyo kinimwaaruuha mweelaponi ya ottuttuwani ni kinimwaathukumanyiha ekotenle elapo. Eriyaraaya onookhala oohoona ni oorakala, asithiyana oorupala ni angyara; nakupa mutokotoko onoohokolowa.

⁹Anoohokolowa yiinlaka, mene Miyo kinooweettiha keerelaka waapepesa. Miyo kinooweettiha kaaronghaka mmanyoolokoni kaavirihaka mphironi moothatawala, niwoko kiri Tiithi a aYixrayeli ni Efrayimi ti mwanaka a ntthaara.

¹⁰Ii! Miloko, mwiiwe masu a Yave, ni mulaleiye mucirumbani soorakamela: ‘Yoole aamwaranxe aYixrayeli onimwaathukumanyiha ni, onoowehaweha muhuwaawe ntoko mukukhuli.’

¹¹Yave oomoopola Yakobe ni oomutapuxa mmatatani mwa oolipaxa ompwaha yoowo.

¹²Awosa animoona ni animwiipa ni ohakalala vasulu oSiyoni; anoohakalalela sooreela sincipale eneeraaya evahiwe ni Yave: etrigu, eviinyu enyowani, makhura ooreera ni axaana a ikhondoolo ni a imombe. Anookhala ntoko nttimbe noohelelaxiwa, ni kheethananatho.

¹³Vano aximwali animwiina ni ohakalala — mpakatho amiravo ni asitokweene. Olalamikawaya kinootatuxa otthapa; Miyo kinimwaavaha nipepeso ni ohakalala, ohikhanle othanana.

¹⁴Kinimwaavaha asaserdoti* itthu soowaatta; ni mulokwaaka onoovonihiwa mwa onnenaaka,” onghima Yave.

¹⁵Yave oneera ha: “Nniiwanyeya nsu oRama, wiikhupanyera ni wiixiinlelaxa: ti Rakheli ongwiinlela anamwanaawe ni onkhootta opepesiwa, niwoko anamwanaawe aamala.”

¹⁶Yave oneera ha: “Mmalihe wiinlawanyu ni maithoraanyu, niwoko ohaawawanyu munootthuveleliwa,” onghima Yave. “Awosa anoohokolowa mulaponi mwa amwiittana.

¹⁷Tivawo ekhanlaaya yooweherera wa muhoolomwanyu,” onghima Yave. “Anamwaniinyu anoohokoleela elapwaaya xaxaxa.

¹⁸Koomwiiwa nnenesene Efrayimi iikhupanyeraka: ‘Nyuwo mookilaka ntoko mwaaxaana a emombe oohihuweya, ni koolakiwa. Mukihokoloxe, ni kinoohokolowa, niwoko Nyuwo ti Yave, Mulukwaaka.

¹⁹Vekhaikhai, kihapungweene, koorukunxa murima; kiiwexenxeene koomana ekakasaaka. Kohuulihiheya muru ni kooyeviheya, niwoko kiniiruuhela wuuliheya muru wa emiravowaaka.’

²⁰Khahiyono Efrayimi oosiveleyaaka? Mwaana kinimutthunaxaaka? Imaara sootheene Miyo kinuulumaaka sa Efrayimi, kimmuupuwelelaxa yoowo. Tivawo, kinimuhelaxaaka vamurimani; kinimmorelaaka ikharari,” onghima Yave.

²¹“Muhele ikanyero ni mwiikaathi ineneero mmiseweni. Ngwehexexe ephiro mvinraanyu. Ii! Mwaamwali oowiikosoopa, muhokolowe. Ii! oYixrayeli! muhokoleele musidadenimwanyu.

²²Ii! Mwaana muthiyana oohiroromeleya, mpaka yaakhani nyuwo munxoraxoraanyu? Yave oopattuxa etthu enyowani mulaponimu: Muthiyana onimwaakiha nakhotto.”

²³Yave a ikuru sootheene, Muluku a oYixrayeli oneera ha: “Miyo kaahokoloxaka wootthukiwani, muloko wa oYuda ni mittetthesaya onimweeratho: ‘Ii! Wookhala woororomeleya, ii! Mwaako wootteela — Yave ooreeliheni.’

²⁴Muloko onookhala oYuda ni mmittetthenimwaya moothemwene — anamalima vamoha ni yaawo ankukhula mihuwo.

²⁵Kinoomulipihera ookhulumuwa ni kinoomvoniha oohilipalipa.”

²⁶Vanonto, kaavenya, kinaweha mukhwipi. Ikhovesaka saari soosiveleya.

²⁷“Anoophiyera mahuku,” onghima Yave, “kineeraaka kaale mmulokoni mwa oYixrayeli ni mwa oYuda ikhapira sa atthu ni sa axinama.

²⁸Mooteene yoowo kaawehawenghaaka weera kiphele ni kinyaaye, weera kuuhe, kiphwate ni kaaruuhele erisa, kinimwaawehawehatho weera kiteke ni kiphatteye,” onghima Yave.

²⁹“Mmahukuni awo khaweeriwatho: ‘Asitiithi aakhuura iwuuva* sikithi, ni maino a anamwane aasosomera.’

³⁰Ohiyanawaya, khula mutthu anaakhwele niwoko na yootthekaawe. Maino a ootheene yaale eniikhuure iwuuva* sikithi anoososomera.

³¹Vano anoophiyera mahuku,” onghima Yave, “kineeraaka kikhalihere wiiraana onyowani muloko wa oYixrayeli ni wa oYuda.

³²Khookhala ntoko wiiraana kaapankaaka ni makholowaanyu kaavarenlaaka ni ntata weera kaakhumihe wExipitu; niwoko aananariha wiiraanawaka, kaarookhalaru Iyaya,” onghima Yave.

³³Yave oneera: “Wiiraana kineeraaka kipakele muloko wa oYixrayeli eviraleene mahuku awo, ti wu: Kinoohela Nlamulonaka mpuwamwaya ni kinoolepa mmurimanimwaya. Kinookhala Mulukwaaya, ni awosa anookhala mulokwaaka.

³⁴Khakhalaru mukina anaamuxuttihe mwaattamanaawe hata munneiye, eeraka: ‘Munsuwele Yave,’ niwoko ootheenaawo anookisuwela, okhuma mukhaani mpaka mutokweene,” onghima Yave. “Niwoko Miyo kinimwaalevelela soonanara ni nkuupuwelelatho sootthekasaya.”

³⁵Vano Yave, mwa Yoowo okhalinghe nsuwa weera nimwaleele othana, olamulenle mweeri ni ithenyeeri weera simwaleele ohiyu, ontekumiha ephareiya weera sirume mitekutekusaya, aani Yoowo iitthaniwe Yave a ikuru sootheene oneera, ha:

³⁶“Paahi salakaseya ikano iyo ohoolowaka,” onghima Yave, “ekhapira ya aYixrayeli enoohiya okhala mulokwaaka wa mahuku ootheene.”

³⁷Yave oneera ha: “Paahi irimu sawereya ophima, ni mathipelo vathi yawereya woona, vano Miyo kinookhootta ekhapira ya aYixrayeli niwoko na sootheene awosa ampakaaya,” onghima Yave.

³⁸“Vano anoophiyera mahuku,” onghima Yave, “eneeraaya eraseliwe esidade ela wa Yave, okhuma etoore* ya Hananeli mpaka mulako wa oNloothoni.

³⁹Mukhoyi wooringelano onimookoliwa mpaka nttumuxa na oGarebi, wookela mpatta wa oGowa.

⁴⁰Nreyareya nootheene sinriheliwaayamo mittembo ni ettuura, ni itarato sootheene siri oreyareyani na oKideroni mpatta ninkhuma nsuwa, mpaka nlootho na mulako wa Ikavalu*, sinootteeliheriwa Yave. Esidade kheesusihiwatho hoye hoye kheephwatiwa.”