Read Makhuwa-Shirima Yeremiya 33 Bible Online

Yeremiya 33 - Makhuwa-Shirima bible

Yeremiya 33

¹Yeremiya areene nlelo etthukeliwo vanipuwani na anamalipelela, Yave aahuuluma ni yoowo emaara yanaaveeli amweerelaka:

²“Yave opanke erimu, Yave okhalinghe, analipiha, mwa Yoowo Nsinanawe ti Yave, vano Owo oneera ha:

³‘Mukikhuwelele Miyo ni kinoowaakhulani kiwooniherakani itthu sitokotoko ni soohaalikeleya nyuwo muhisuwenlaanyu.’

⁴Niwoko Yave, Muluku a aYixrayeli, oneera ha mwaha wa itthu sa esidade ela ni sa impa sa emwene sa oYuda, siphwatingwe weera yiixaakihereno ikaaro sookurumulela ixiri ni wa ekatana,

⁵ngwaawananani aBabiloniya: ‘Iyo sinoosareya mittembo sa atthu kineeraaka kiwiive moonyoonyiwanimwaka. Kinoohuluwa esidade ela niwoko na soonanarasaya sootheene.

⁶Wa soothesene, kinooruuhela oreherera ni olamiha; kinoophuweliha mulokwaaka kivahaka murettele ni ekhaikhai yoowaatta.

⁷Kinooceendya oreereliwa wa oYuda ni oYixrayeli ni kinooreherera ntoko waaraaya khalayi.

⁸Miyo kinimwaatteeliha mwa soottheka sootheene akipakenlaaya ni kinoolevelela soottheka sootheene sa okivaanyawaya.

⁹Vano esidade ela enookivaha epili, ohakalala, ottottopela ni ovuwa, ohoolo wa miloko sootheene sa mulaponi sineera siiwe sa mipuha sootheene kimpakelaaka. Ni seiyo sinoosareya woova sithukumelaka niwoko na onnene otokotoko ni murettele kimvahaaka oYerusaleemu.’

¹⁰Yave oneera ha: ‘Nyuwosa muneera weera nipuro nna nooheleya nthala, ni khanikhaliwa atthu naari axinama. Wasoothesene, mmasidadeni sa oYuda ni mmiseweni sa oYerusaleemu, siheleiye nthala soohimakiwa atthu naari axinama, animwiiwiwatho

¹¹masu a otthapa ni a ohakalala, masu a namatthomera ni namatthomeriwa, ni masu a yaale anruuha soovaha sootthapela wa Empa ya Yave yeeraka: Muntthapele Yave a ikuru sootheene, niwoko Owo ti ooreera, osivelawawe woororomeleya khoommala. Vano Miyo kinooceendya oreereliwa wa elapo ela ntoko khalayi,’ onghima Yave.

¹²Yave a ikuru sootheene oneera ha: ‘Nipuro nna nri ttewu ni noohikhaliwa atthu naari axinama — aani, mmasidadenimwaya moothemwene onookhalamotho moocihamo, eneeraayamo akukhuli yiitthuuwiheke mihuwosaya.

¹³Okhuma mmasidadeni sa mmanyaakoni, sa vathi wa mmanyaakoni, oNegeba ni mulaponi mwa Benyamini, mpaka mmittettheni simurukureenre Yerusaleemu ni mmasidadeni sa oYuda, sinooviramotho ikhondoolo mmatatani mwa yoole onaalikela,’ oneera Yave.”

¹⁴“‘Anoophiyera mahuku,’ onghima Yave, ‘kineeraaka kikwanihere yoororomeliha kipakenlaaka muloko wa oYixrayeli ni wa oYuda.

¹⁵Mmahukuni awo ni mweehuhuni eyo kinoophuwihatho Ephandi Yoororomeleya ya ekhapira ya Davide; Owo onoopaka yeeyo eri yoororomeleya ni yooreera mulaponi.

¹⁶Mmahukuni awo oYuda onoovuluxiwa ni oYerusaleemu onookhala woolipeene, Nsina aneeraawe iitthaneliwe ti nna: Yave ti ekhaikhayaahu.’

¹⁷Niwoko Yave oneera ha: ‘Davide kharwaru ahiya okhalano ekhapira eniikilaathi vahiceni ya emwene ya oYixrayeli,

¹⁸hata asaserdoti* ari aLeevi, kheehiya okhalano ekhapira eniikhale ohoolowaka weera eveleele moota woohihiyerereya sooveleela soohisa, ohisa sooveleela sa irooro ni weera yoonihere sooveleela.’ ”

¹⁹Vano Yave aamweerela Yeremiya:

²⁰“Yave oneera ha: ‘Nyuwosa mwawera omaliha wiiraanawaka ni othana ni ohiyu, moota wooweera othana naari ohiyu oheereye mweehuhuni okhaliheriwaaya,

²¹vano onoomalihiwa wiiraanyihawaka ni murumeiyaaka Davide, ni weereya hiiho, owo khakhalanotho ekhapira eniilamule vahiceniwawe ya emwene; onoomalihiwatho wiiraanawaka ni aLeevi ari asaserdoti* ankirumeela.

²²Ekhapira ya murumeiyaaka Davide ni aLeevi anrumeela ohoolowaka kinimwaattiha ntoko ithenyeeri sa wiirimu ni oohaalikeleya ntoko ihaava sa muxerexere ephareiya.’”

²³Yave aamweerela Yeremiya:

²⁴“Nyuwo mohoona weera atthu ala aneera weera Yave ookhootta imwene piili aathanlalaawe! Tivawo ahinoonelaaya mulokwaaka ni ahimpwatthelaaya ntoko muloko.

²⁵Yave oneera ha: Hiiho ntoko kihinceendyaakaru okhalihawaka othana ni ohiyu, hoye hoye wiirimu ni vathi, hiihotho nkirwa kikhootta mulokwaaka.

²⁶Miyo nkirwa kihiya ekhapira ya Yakobe ni ya murumeiyaaka Davide hata nkiceendya soowuupuwelasaka weera mmoha a ekhapira ya Davide alamule ikhapira sa Abrahaamu, Isaki ni Yakobe. Miyo kinooreherera oreereliwawaya ni kinoowoonihera ikhararisaka.”