Read Makhuwa-Shirima Yeremiya 36 Bible Online

Yeremiya 36 - Makhuwa-Shirima bible

Yeremiya 36

¹Muyaakhani yanaaxexe moolamulani mwa Yehoyakimi, mwaana mulopwana a Yosiya, mwene a oYuda, Yave aamurumihela masu ala Yeremiya:

²“Mukuxe nikwakhwala ni mulepemo masu ootheene kooleenlaakani mwaha wa Yixrayeli ni Yuda ni wa miloko sootheene, okhuma kipacenraaka wooleelani moolamulani wa Yosiya, mpaka olelo.

³Apaale, muloko wa oYuda woonelela khula erisa kaavaanelenlaaka, khula mutthu anaahiye mweettelowaawe woonanara ni Miyo nkaalevelele yootakhala ni yootthekaaya.”

⁴Vano Yeremiya aamwiitthana Baruki mwaana mulopwana a Neriha, weera alepe vanikwakhwalani, attharihaka soohima sa Yeremiya, masu ootheene Yave aamuleenlaawe.

⁵Vahoolowaya Yeremiya aamweerela Baruki: “Kookhoottihiwa orowa Mpaani mwa Yave.

⁶Tivawo murowe Mpaani mwa Yave munihukuni na otthuka ni mwasomele muloko masu a Yave miyo koovanghaakani, mwa yaawo mulempaanyu. Nyuwotho musomele muloko wootheene wa oYuda onrweela mmasidadenimwaya.

⁷Apaale wiidyoonttelelawaya onoophiya wa Yave, ni khula mutthu anaahiye mweettelowaawe woonanara, niwoko ti onyoonyiwa otokotoko olaleiwale ni Yave mwaha wa muloko ola.”

⁸Baruki, mwaana mulopwana a Neriha, aapaka nnenesene sootheene mprofeeti Yeremiya aamulamulenlaawe opaka ni aasoma masu a Yave Mpaani mwa Yave.

⁹Mmweerini wanaathannamixexe wa muyaakhani yanaathanu moolamulani mwa Yehoyakimi, mwaana mulopwana a Yosiya, mwene a oYuda, waalaleiwa otthuka ohoolo wa Yave wa muloko wootheene wa oYerusaleemu ni wa muloko wootheene waarweela mmasidadeni sa oYuda orowaka oYerusaleemu.

¹⁰Baruki aasomela muloko wootheene masu a Yeremiya yaalempwale vanikwakhwalani. Owo aasoma Mpaani mwa Yave, musaala ya Gemariya, mwaana mulopwana a namalepa Xafani. Esaala yaari vanipuwani ntokweene, vamulako munyowani wa Empa ya Yave.

¹¹Mikaiya, mwaana mulopwana a Gemariya, mwaana mulopwana a Xafani, iiwakaru masu ootheene a Yave yaalempwale vanikwakhwalani,

¹²aarowa musaala ya namalepa, vaate wa emwene, yaakilaathiyaayawo ahooleli ootheene: namalepa Elixama, Delaya, mwaana mulopwana a Xemaya, Elinatani, mwaana mulopwana a Akhebori, Gemariya, mwaana mulopwana a Xafani, Zedekiya, mwaana mulopwana a Hananeya, ni ahooleli ootheene akinaawo.

¹³Mikaiya aahaaleela sootheene iiwalaawe Baruki aasomenlaawe muloko yeeyo yaalempwale.

¹⁴Vano ahooleli ootheene yaamurumihela mutthenga Baruki mwa Yehudi, mwaana mulopwana a Netaniya, mwaana mulopwana a Xelemeya, mwaana mulopwana a Kuxi, eeraka ha: “Mukuxe nikwakhwala musomenlaanyu muloko ni murwe nno.” Baruki, mwaana mulopwana a Neriha, aakuxa nikwakhwala, anarowa yaaraayawo.

¹⁵Yaamweerelasa: “Mukilaathi, ni munisomele.” Vano Baruki aahaasomelasa.

¹⁶Yiiwakaru masu ootheene ale yaawehanasa ni woova, enamweerela Baruki: “Ti wootthuneyaxa omuleela mwene masu ootheene ala.”

¹⁷Yaamukoha Baruki: “Munileele moota heeni mulempaanyu sootheene iya? Ti Yeremiya ooleelani?”

¹⁸“Aani,” aahaakhula Baruki, “owo ookileela masu ootheene ela, ni miyo koolepa ni owiini vanikwakhwalani.”

¹⁹Ahooleli yaamweerela Baruki: “Mwiipithe nyuwo nitho Yeremiya; ni ahikhale anaasuwele muraanyuwo.”

²⁰Vano yaahiya nikwakhwala musaala mwa Elixama, namalepa, enarowa vanipuwani na empa ya emwene, enamuleela sootheene mwene.

²¹Mwene aamulamulela Yehudi okuxa nikwakhwala, ni owo aaruuha musaala mwa namalepa Elixama, anamusomela mwene ni ahooleli ootheene yaamurumeela yoowo.

²²Eyo yeereiye mmweerini wanaathannamixexe. Vano mwene aakilaathiye owannyawe mweehuhuni ya mulaala, ooraka mooro.

²³Yehudi aamalihaawe osoma mipatta miraru hoye hoye mixexe sa nikwakhwala, mwene aamuthikila mipatta seiye ni mwaalo wa namalepa, avonyeraka vayikho, mpaka nikwakhwala nenenenno oza.

²⁴Mwene ni anamalakaawe ootheene yiiwale masu ootheene ale khayoomve, hata khayaahunle soowarasaya naari khayiikhupanyenre.

²⁵Naari Elinatani, Delaya ni Gemariya yaamundyoonttelelaru mwene weera ahihise nikwakhwala, owo khaatthunne owiiwa.

²⁶Ohiyanawaya, mwene aamulamulela Yerameeli, mwaana mulopwana mmoha a mwene, Seraiya, mwaana mulopwana a Azeriyeli, ni Xelemeya, mwaana mulopwana a Abediyeli, weera emutthuke Baruki ni mprofeeti Yeremiya. Vaheera Yave aawiipithiha.

²⁷Mwene ahisaleene nikwakhwala naarino masu yaahimmwale ni Yeremiya ni yaalempwale ni Baruki, Yave aamurumihela Yeremiya masu ala:

²⁸“Mukuxe nikwakhwala nikina ni mulepe masu ootheene yaari munikwakhwalani noopacera, Yehoyakimi mwene a oYuda ohinsaawe.

²⁹Munleeletho Yehoyakimi mwene a oYuda: ‘Yave oneera ha: Moohisa nikwakhwala nne munakoha: “Mulepenlenimo weera mwene a oBabiloniya onimoorwa aphwateke elapo ela ni mmo aaphwatekemo atthu ni axinama?”

³⁰Vano Yave oneera ha mwaha wa Yehoyakimi, mwene a oYuda: Owo khakhalanaru ekhapira eniikilaathele ehice ya emwene ya Davide; muttembwaawe onoovonyeriwa okerekhere wiikaathiweke vansuwani ni ohiyuweene.

³¹Miyo kinoomuttaruxa yoowo, anamwanaawe ni anamalakaawe niwoko na sootthekasawe. Kinimwaaruuhelasa awo, amaki a oYerusaleemu ni atthu a oYuda erisa yootheene kaalakelenlaaka, yeenre ehikipwattha.’”

³²Vano Yeremiya aakuxa nikwakhwala nikina, anamvaha namalepa Baruki, mwaana mulopwana a Neriha, weera alepemo, ntoko aahimmaawe Yeremiya, masu ootheene a mulivuruni Yehoyakimi, mwene a oYuda, aahinsaawe. Vano, masu mancipale makina oolikana yaandyeereriwe.