Read Makhuwa-Shirima Yeremiya 37 Bible Online

Yeremiya 37 - Makhuwa-Shirima bible

Yeremiya 37

¹Zedekiya mwaana mulopwana a Yosiya, mwene a oYuda, aavariwa omwene ni Nebukadenezari, mwene a oBabiloniya. Owo aalamula vanipuroni na Yehoyakini, mwaana mulopwana a Yehoyakimi.

²Owo naari anamalakaawe, hata muloko wa mulaponi khayaapwantthe masu Yave uulummaawe mwa mprofeeti Yeremiya.

³Wa soothesene, mwene Zedekiya, aamuruma Yehukali, mwaana mulopwana a Xelemeya, ni musaserdoti* Zefaniya, mwaana mulopwana a Maaseya, wa mprofeeti Yeremiya ni mutthenga ola: “Mwanivekelele wa Yave Mulukwaahu.”

⁴Mweehuhuni ele Yeremiya aari ootaphuweene oviravira eriyari ya muloko, niwoko nlelo khaatthukiwe.

⁵Eyo eri hiiho, anakhotto a Farawu* yaavenya wExipitu. aBabiloniya yaamurince Yerusaleemu yiiwakaru yeeyo, yaahiya orica.

⁶Vanonto Yave aamweerela mprofeeti Yeremiya:

⁷“Yave Muluku a oYixrayeli oneera ha: Mwamuleele mwene a oYuda, oorumihaleni weera mukikoherere: ‘Anakhotto a Farawu*, avennye wExipitu weera yookhavihereni, anoohokoleela mulaponimwaya wExipitu.

⁸Vahoolowaya aBabiloniya anoohokolowa ewananeke esidade ela; awosa anoowina, ephwateke ni mooro.’

⁹Yave oneera ha: Muhiilokotthe, mweeraka: ‘Woohihovela aBabiloniya anoopwaha.’ Niwoko awosa khaampwaha.

¹⁰Naari mwaawinneene anakhotto ootheene a oBabiloniya anoowananani, ni ehalaka asilopwana oovulalaru mmaheemanimwaya, awosa nlelo yaamvenyera ehiseke esidade ela.”

¹¹Anakhotto a oBabiloniya evennyeene oYerusaleemu niwoko na anakhotto a Farawu*,

¹²Yeremiya aakhuma musidade weera arowe elapo ya Benyamini weera akuxe yawaweene aaraaweno eriyari ya muloko wa nipuro nne.

¹³Vaheera aphiyakaru vamulako wa Benyamini, mutokweene a namalipelela, mwa yoowo iitthaniwa Iriya, mwaana mulopwana a Xelemeya, mwaana mulopwana a Hananeya, aamutthuka, amweerelaka: “Nyuwo moothummwa ni aBabiloniya.”

¹⁴Yeremiya aaheera: “Hoye! Nkithummwale ni aBabiloniya.” Vaheera Iriya khaatthunne omwiiwa; ni amutthukaka Yeremiya, aamurongha wa ahooleli.

¹⁵Awosa yaamunyoonyeriwa Yeremiya, yaammana, enamutthukela mpaani mwa Yonatani, yaatatunxaaya ekaliposo;

¹⁶Yeremiya aaheliwa mukaliposo ya vathi aalekenlaawemoxa.

¹⁷Vano mwene aalamula oroweliwa, ni Yeremiya aaruuhiwa empa ya emwene. Muxiirini mwene aamukoha: “Aakhala masu a mpatta wa Yave?” Yeremiya aaheera: “Aakhala, nyuwo munimwinnyereriwa mmatatani mwa mwene a oBabiloniya.”

¹⁸Vano Yeremiya aamukoha mwene Zedekiya: “Yootakhala heeni koopakenlaakani nyuwo hoye hoye wa anamalakaanyu naari wa muloko ola yoophwanela okitthukela?

¹⁹Ari woowi maprofeetaanyu yoothalihenreni otthuna wa Muluku, yeeraka: ‘Mwene a oBabiloniya khoowananani nyuwo naari elapo ela’?

²⁰Vaheera, ii! Amwene, pwiiyaaka, dyoontte mukiiwe. Mukitthunihere owooniherani wiidyoonttelelawaka: Muhikihokoloxere mpaani mwa namalepa Yonatani, weera miyo kihikhwelemo.”

²¹Vano mwene Zedekiya aalamulela weera Yeremiya iikaathiwe vanipuwani na namalipelela ni weera khula nihuku aakhele epaawu amviraayaamo anapaawu, mpaka seeraaya simale ipaawu sootheene sa musidade. Hiiho Yeremiya aapwaherera okhala vanipuwani na namalipelela.