Read Makhuwa-Shirima Yeremiya 38 Bible Online

Yeremiya 38 - Makhuwa-Shirima bible

Yeremiya 38

¹Waaheereya weera Xefateya, mwaana mulopwana a Matani, Gedaliya, mwaana mulopwana a Paxehuri, Yehukali, mwaana mulopwana a Malekiya, yaahiiwa yeeyo Yeremiya aaleenlaawe muloko wootheene eeraka:

²“Yave oneera ha: ‘Yoowo anaapwaherere musidademu onimookhwa mwa ekatana, etala hoye hoye nihooxo; vaheera yoowo aniixinnyerere wa aBabiloniya onookhala ni okumi. Onimoopowa akhaleke.’

³Yave oneera ha: ‘Vekhaikhai esidade ela enimwinnyereriwa mmatatani mwa mwene a oBabiloniya, anaakuxe.’”

⁴Vano ahooleli yaamweerela mwene: “Mulopwana ola akhweeke. Owo onaapororiha anakhotto ahalahanle musidadeni ela vamoha ni muloko wootheene ni itthu owo onghimaawe. Mulopwana owo khanaasaasa mpuha wa muloko ola, mene oheleyawaya nthala.”

⁵Mwene Zedekiya aahaakhula: “Owo ori mmatatanimwanyu; mwene khanoovaanyani.”

⁶Hiiho, yaamvara Yeremiya, enamvonyera muhimeni mwa Malekiya, mwaana mulopwana a mwene, mwa yeeyo yaari vanipuwani na namalipelela. Yaamukuruxelamo Yeremiya ni mukhoyi muhimeni mmwe. Khayaarimo maahi, naarimo nttokoru paahi; ni Yeremiya aadora.

⁷Vaheera Ebedi-Meleki, muKuxi, mutokweene a empa ya emwene, aahiiwa weera Yeremiya oovonyeriwa muhimeni. Vano mwene akilaathiyeene vamulako wa Benyamini,

⁸Ebedi-Meleki aavenya empa ya emwene, anarowa omweerela:

⁹“Ii amwene pwiiyaaka, asilopwana ala aapaka yoonanara mwa yeeyo ampakenlaaya mprofeeti Yeremiya. Awosa aamvonyera muhimeni weera akhwe etala, niwoko musidade kheewowo yooca.”

¹⁰Vano mwene aamulamulela Ebedi-Meleki, muKuxi: “Mwaarowane atthu araru ni mwamukhumihe muhimeni mprofeeti Yeremiya ahinaaye okhwa.”

¹¹Vano Ebedi-Meleki aahaarowano asilopwana aalamulaawe, anavolowa musaala eri vathi wa omuhakhuni wa mwene. Aakuxa mattapwatta ni soowara sa khalayi, anakuruxela mikhoyi muhimeni aaraawe Yeremiya.

¹²Ebedi-Meleki, muKuxi, aamweerela Yeremiya: “Mwiikaathi mattapwatta ni ikuwo sa khalayi iya waanyoono weera mphiteere sihoovoreyeni mikhoyi.” Yeremiya aapaka hiiho.

¹³Vano, yaamukhumiha ni mikhoyi, enamvenxa muhimeni. Yeremiya aapwaherera okhala vanipuwani na namalipelela.

¹⁴Vano mwene Zedekiya aalamulela oruuhiwa Yeremiya, anamphwanya vamulako wanaararu wa Empa ya Yave. Mwene aamweerela: “Kinoovekelani nsu nimoha. Muhikikhuweru.”

¹⁵Yeremiya aamweerela Zedekiya: “Kawaakhulani, khamunkiiva? Naari miyo woolopolani, khamunkiiwa.”

¹⁶Wa soothesene, mwene Zedekiya aamuroromeliha ni nlipelo muxiirini Yeremiya: “Kinlipela mwa Nsina na Yave, onnivaha okumi, weera miyo nkiwiivani, hata nkiwinnyererani mmatatani mwa yaale antthuna owiivani.”

¹⁷Vano Yeremiya amweerela Zedekiya: “Yave a ikuru sootheene, Muluku a oYixrayeli oneera ha: ‘Nyuwo mwiixinnyerera woowaakuveya mmatatani mwa mwene a oBabiloniya, okumaanyu onimuureliwa ni esidade ela kheehisiwa; nyuwo ni emusaanyu munookhala ni okumi.

¹⁸Vaheera nyuwo mwaahiixinnyerera woowaakuveya wa asitokweene a mwene a oBabiloniya, esidade ela enimwinnyereriwa mmatatani mwa aBabiloniya, ni awosa anoohisa; hata nyuwo khamoopowa mmatatanimwaya.’”

¹⁹Mwene Zedekiya aamweerela Yeremiya: “Kingwoova aYuda anaakhavihera aBabiloniya, niwoko apaale aBabiloniya anookinnyerera mmatatanimwaya, ni awosa anookihasula.”

²⁰Yeremiya aahaakhula: “Awosa kheewinnyererani. Mmwiiwelele Yave mpakaka yeeyo kinooleelaakani, weera sootheene siweetteleni nnene ni okumaanyu wuureleye.

²¹Vaheera nyuwo mwaahitthuna wiixinnyerera, yeeyo Yave okoonihenraawe ti ela:

²²Asithiyana ootheene ahiiwale empa ya emwene ya oYuda anooronghiwa wa asitokweene a mwene a oBabiloniya. Awosa anooweerelani: ‘Asinthamwenaanyu mwaaroromelaanyu ahoolokotthani ni ahoopwahererelani. Inaawosanyu soodora; asinthamwenaanyu ahoohiyani.’

²³Axaarinyu ni anamwaniinyu ootheene anooronghiwa wa aBabiloniya. Nyuwo khamoopowa mmatatanimwaya, mene munoovariwa ni mwene a oBabiloniya; ni esidade ela enoohisiwa.”

²⁴Vano Zedekiya aamweerela Yeremiya: “Mwaha ola wasuweliwa, nyuwo munimookhwa.

²⁵Ahooleli yiiwa weera miyo kootthekula ni nyuwo ni yaweerelani: ‘Munithalihere mwaaleenlaanyu amwene ni awo yooleenlaayani; muhinikhuwe weera nihiwiiveni,’

²⁶vano mweere: ‘Kaakenle waadyoonttelela amwene weera ehikihokoloxeretho mpaani mwa Yonatani, weera kihikhwelemo.’ ”

²⁷Ahooleli yaarwiiyaaya omukohakoha Yeremiya, owo aahaaleela sootheene mwene aamulamulenlaawe ohima. Awosa khayaamukonghetho etthu, niwoko khaawo yiiwale otthekula wa mwene.

²⁸Yeremiya aapwaherera okhala vanipuwani na anamalipelela mpaka ophiyera nihuku aawiniwaawe Yerusaleemu.