Read Makhuwa-Shirima Yeremiya 4 Bible Online

Yeremiya 4 - Makhuwa-Shirima bible

Yeremiya 4

¹“Mwahokolowa, vano muhokoleele wa Miyo,” onghima Yave. “Mwasuseeriha ottaiwaka milukusanyu sa mwiikho, muhihapuwakatho,

²ni nyuwosa mwalipela mwa Nsina na Yave moota woororomeleya, wa ekhaikhai ni wookwanela, vano miloko sinooreelihiwa ni Yoowo ni sinoomvuwiha.”

³Yave ongweerela ha asilopwana a oYuda ni oYerusaleemu: “Mulime imattasanyu soohittipuriwa ni muhaale variyari wa nyiiwa.

⁴Mwiixiinele wa Yave, mwiinele mirimasanyu, nyuwosa asilopwana a oYuda ni amaki a oYerusaleemu. Mwaahipaka yeeyo, isarasaka sinoopatta sihiseke ntoko mooro, niwoko na yoonanara mpankaanyu, aani, sinoohisa ni khaawo anaawere ocipiha.”

⁵“Vano mulaleiye ha oYuda ni oYerusaleemu: ‘Mwiipele nipalapatta mweelaponi yootheene!’ Mwiinle ni nsu ntokotoko, mweeraka: ‘Muthukumane, nitthawele isidade soolipihiwa!’

⁶Mweemexe eneneero enthoonyera oSiyoni. Mutthawe woowaakuveya mwaasaasaka wootthawelamo! Miyo kinooruuha erisa okhuma mpatta wa ottuttuwani, ophwata woowoopihaxa.”

⁷Mwatto ookhuma munyattanimwawe; namaphwata a miloko oovenya. Owo ookhuma munyattanimwawe weera aphwate elapwaanyu. Mittetthesanyu sinoohala ittuxoru soothaamiwa.

⁸Vano, ngware isaakho soolalamikano, mwiinle ni mulalamike, niwoko isara soowoopiha sa Yave khasinihulungwe.

⁹“Vanihukuni nenenenno,” onghima Yave, “mwene ni asitokweenaawe anooporora, asaserdoti* anoosareya woova ni maprofeeti anootuthuwa.”

¹⁰Vano keenre: “Ii! Yave onlamula sootheene, moolokottha muloko owo ni oYerusaleemu moota woomalela, mweeraka: ‘Munookhalano murettele, ekatana ereene vaxikowahu.’”

¹¹Ehuhuweene yeeyo muloko ola ni oYerusaleemu onooleeliwa: “Epheyo yoovihaxa enrweela mmattumuxani a munikareni enoopela mpatta wa mulokwaaka, mene kheeneerela oveera hoye hoye otteeliha.

¹²Epheyo yoowuupaxa yeeyo yoorumihiwa ni Miyo. Vano kinlaleiya kaalakelenlaaka yaawo.”

¹³Moone, Owo ongwa ntoko mahutte; ikaarosawe sa ekhotto sinrwa ntoko eyuupuru, ikavalusawe* soowaaluwaxa ompwaha xaaka. Ii! Wa hiyo! Hiyo nooriheya!

¹⁴Ii oYerusaleemu! Mukatthe soonanara siri mmurimanimwanyu ni mvulixiwe! Mpaka yaakhani muneeraanyu mukhaleno soowuupuwela soonanara?

¹⁵Nniiwanyeya nsu nilaleiyaka okhuma oDani, ni okhuma mattumuxa a wEfrayimi ninlaleiya nihooxo.

¹⁶“Muleele yeeyo miloko; mulaleiye yeeyo oYerusaleemu: ‘Anakhotto anamarica anrweela mulaponi ya ottai, ekhuwelelaka ekhotto wa isidade sa oYuda.

¹⁷Awosa anrica oYerusaleemu ntoko asilopwana anlipelelaaya ematta, niwoko esidade eyo yookivaanya Miyo,’ ” onghima Yave.

¹⁸“Mweettelowaanyu ni mitekosanyu muneenaanyu sohooruuhelani ekhotto eyo. Moota noowaawenlaayani nttaruxonanyu ni nno noophiya vamurimaniwanyu.”

¹⁹Ii! Othananawaka, othananawaka! Kinnathukumela ni ovoreya! Ii! Exiri ya murimaaka! Murimaaka onnakitthimaka ni nkingwera omaala. Niwoko kohiiwa oruma wa nipalapatta; kohiiwa okhuweliwa wa ekhotto.

²⁰Erisa enttharelana erisa; elapo yootheene yooheleya nthala. Wootutuxereya iheemasaka soophwatiwa vamohamoharu moowiipithamwaka.

²¹Mpaka yaakhani kintthuneyaaka woona eneneero ya ekhotto ni wiipiwa wa nipalapatta?

²²“Mulokwaaka ti mulolo; awosa khaakisuwenle Miyo, ehiiwexexaka etthu. Ankhovelela opaka soonanara, mene khaangwera opaka yooreera.”

²³Kaaweha elapo ya vathi ni eyo khayaarino ekhalelo; kaaweha wiirimu ni soomwaleelasaya soolakaseya.

²⁴Kaaweha nyaako ni seiyo saatetereya ni mattumuxa ootheene yaamuttikinyeya.

²⁵Kaaweha ni khayaariworu atthu. Ipalame sootheene sa wiirimu saavavela ottaiwene.

²⁶Kaaweha ni elapo yooruwereyaxa yaathatuwa nikare; mittetthesaya sootheene sooheleya nthala vamaithoni wa Yave; ohoolo wa isarasawe soowoopiha.

²⁷Yave oneera ha: “Elapo yootheene ela enoonanarihiwa, kiroohiphwataru woomalela.

²⁸Tivawo elapo eneeraaya elalamike ni erimu enooriipihana niwoko kohuuluma ni nkirwa kiceendya; koolakela ni nkirwa kihokolowa.”

²⁹Woowiiwa oruma wa anamweettiha ikavalu* ni anamuupa, amaki a mittetthe sootheene antthawa. Amaki akina a yaawo amvolowa mmaphuwani, akinaawo antthawela mmakhukuni. Mittetthe sootheene singhala soothaamiweene; khawowo onkhalamo.

³⁰Ii! Namaphwatiwa, mumpakani? Mungwarelani sooxeera mwiiphwanelihaka ni axiveeve a eyuuma yoorikaxa? Muniihingela heeni mmakwikhwinimwanyu? Muniiphwaneliha siiyo. Vano Oosiveleyaanyu anoothanyani, yaasaasaka okumaanyu.

³¹Kiniiwa okhuweliwa ntoko wa muthiyana ahaleelaka oyara, ntoko muthiyana ahaleelaka oyara muxutto — okhuwela wa mwaana muthiyana a oSiyoni iilipiheraka omumula ni atheteyaka matata, eeraka: “Ii! Wa miyo, kihanle vakhaani okomoka; okumaaka ori mmatatani mwa anamwiiva!”