Read Makhuwa-Shirima Yeremiya 40 Bible Online

Yeremiya 40 - Makhuwa-Shirima bible

Yeremiya 40

¹Yave aamurumihela masu Yeremiya vahoolo wa mutokweene a anakhotto a namalipelela a emwene, Nebuzaradani, aamutapuxa oRama. Owo aamphwannye Yeremiya atthukiweene eriyari ya anamatthukiwa ootheene a oYerusaleemu ni aYuda yaaronghiwa wootthukiwani oBabiloniya.

²Mutokweene a anakhotto a namalipelela amphwanyakaru Yeremiya, aamweerela: “Ti Yave, Mulukwaanyu, olakelenle erisa nipuro nna.

³Vano Yave ookwaniherela, anapaka yeeyo aaroromelihalaawe. Sootheene iyo seereenle niwoko na omutthekela nyuwosa Yave ni ohimwiiwelela.

⁴Vaheera olelo miyo kinootapuxani moonyooroni otthunke matataanyu. Nyuwo mwatthuna, nrowe ni miyo oBabiloniya ni miyo kinimookosoopani; wasoothesene, mwaahitthuna muhaleke. Moone! Elapo yootheene eri ohoolowanyu; murowe onooreerelani.”

⁵Wa soothesene, Yeremiya ahinaaye orukunuwa weera apwahe, Nebuzaradani aamweerela: “Muhokoleele wa Gedaliya, mwaana mulopwana a Ahikami, mwaana mulopwana a Xafani, mwa yoowo mwene a oBabiloniya aamuthanlalaawe okhala guvernadori a isidade sa oYuda, ni mwakhale ni yoowo eriyari ya muloko, hoye hoye murowe nipuro nikina muneeraanyu mutthune.” Vano mutokweene a anakhotto aamvaha pooso ni yoovaha, anamuhiya arowaka.

⁶Yeremiya aarowa wa Gedaliya, mwaana mulopwana a Ahikami, oMizepa, anapwaherera okhala ni yoowo eriyari ya muloko waahiiwale mulaponi ya oYuda.

⁷Yaakhala asitokweene a anakhotto ni anakhottwaaya yaari mmatta. Awosa yaahiiwa weera mwene a oBabiloniya aamuthanla Gedaliya, mwaana mulopwana a Ahikami, okhala guvernadori a oYuda ni waahoolela asilopwana, asithiyana, anamwane ni oohaawaxa a mulaponi yahaaronghiwe wootthukiwani oBabiloniya.

⁸Vano yaarowa mpaka wa Gedaliya, oMizepa — Yixmayeli, mwaana mulopwana a Netaniya, Yohanani ni Yonatani, anamwane asilopwana a Kareya, Seraya, mwaana mulopwana a Tanumeti, anamwane asilopwana a Efai, muNetofati ni Yaazaniya, mwaana mulopwana a mMaakahi, vamoha ni anakhottwaawe.

⁹Gedaliya, mwaana mulopwana a Ahikami, mwaana mulopwana a Xafani, aahaaroromeliha ni nlipelo awo ni anakhottwaaya: “Muhoove olamuliwa ni aBabiloniya. Mwiitekihase mulaponi, mmurumeele mwene a oBabiloniya, ni sootheene sinooweettelani nnene.

¹⁰Yoomeene kinoopwaherera okhala oMizepa weera kookhaleleni ohoolo wa aBabiloniya eniirwe wa hiyo. Vaheera nyuwosa muhepheke iwuuva* wa eviinyu ni soowiima ni sooliveira* wa makhura. Seiyo muheleke mmanyaapuni, ni mukhaleke mmasidadeni mwaakamenlaanyu.”

¹¹aYuda ootheene yaari oMowabe, wAmoni, wEdomi ni mulaponi sootheene sikina yaahiiwa weera mwene a oBabiloniya ohaahiya ahalahanle oYuda, ni weera aamuthanla Gedaliya, mwaana mulopwana a Ahikami, mwaana mulopwana a Xafani, okhala guvernadoraaya.

¹²Vano yaahokolowa mmapuroni moothemwene yaamwareenlaayamo; yaahoorwa mulaponi mwa oYuda, enarowa wa Gedaliya oMizepa. Yaahepha soowiima soowaatta sa elimwe ni iwuuva* wa eviinyu.

¹³Yohanani, mwaana mulopwana a Kareya, ni asitokweene ootheene a anakhotto yaari mmatta, yaarowa wa Gedaliya oMizepa,

¹⁴enamweerela: “Nyuwo khamusuwenle weera Bahalisi, mwene a awAmoni, oomurumiha Yixmayeli, mwaana mulopwana a Netaniya, weera awiiveeni?” Mene Gedaliya, mwaana mulopwana a Ahikami khaamwaakhulenle.

¹⁵Vano Yohanani, mwaana mulopwana a Kareya, aamuleela wiiphiini Gedaliya oMizepa: “Kinoorowa vaanaano va ni kinoomwiiva Yixmayeli, mwaana mulopwana a Netaniya, ni khaawo anaasuwele yeeyo. Niwoko na heeni owo eeraawe apakihe weera aYuda yiiraanne ni nyuwo emwaraxiwe ni ahalahanle a oYuda ephwatiwe?”

¹⁶Vaheera Gedaliya mwaana mulopwana a Ahikami, aamweerela Yohanani, mwaana mulopwana a Kareya: “Muhipake etthu siiyeeyo. Yeeyo nyuwo munghimaanyu sa Yixmayeli kheehiyono ettiitthu.”