Read Makhuwa-Shirima Yeremiya 42 Bible Online

Yeremiya 42 - Makhuwa-Shirima bible

Yeremiya 42

¹Vano ahooleli ootheene a anakhotto, vamoha ni Yohanani, mwaana mulopwana a Kareya, ni Yezaniya, mwaana mulopwana a Hoxaya, ni muloko wootheene, okhuma mukhaani mpaka mutokweene yaamwaattamela

²mprofeeti Yeremiya, enamweerela: “Dyoontte, mwiiwe yoovekaahu ni mumvekele Yave, Mulukwaanyu, mwa hiyo ni wa ahalahanle ootheene ala. Ntoko munoonaanyu, naarookhalaru ancipale, vano nihanle vakhaani.

³Mvekele mundyoonttelelaka Yave, Mulukwaanyu, weera anileele wookela ni entthuneya opaka.”

⁴Mprofeeti Yeremiya aawaakhula: “Miyo kinoowaakhulani. Kinoomvekela Yave, Mulukwaanyu, ntoko nyuwosa mvekenlaanyu. Sootheene aneeraawe aakhule Yave kinimooleelani; kheewo kineeraaka kookhuweeni.”

⁵Vano yaamweerela Yeremiya: “Yave akhale Namoona a ekhaikhai ni Oororomeleya wa hiyo, naahipaka sootheene Yave, Mulukwaanyu, aneeraawe anilamulele mwa nyuwo.

⁶Enireerele hata ehinireerele, nnoomwiiwelela Yave, Mulukwaahu, mwa Yoowo hiyo nnoorumihelaahuni, weera sootheene sineettele nnenesene, niwoko nnoomwiiwelela Yave, Mulukwaahu.”

⁷Eviraleene mahuku muloko, Yave aamurumihela masu Yeremiya.

⁸Vano Yeremiya aamwiitthana Yohanani, mwaana mulopwana a Kareya, ni asitokweene ootheene a anakhotto yaari ni yoowo ni muloko wootheene, okhuma mukhaani mpaka mutokweene.

⁹Vano aaweerela: “Yave, Muluku a oYixrayeli mwa Yoowo nyuwosa mukirumihenlaanyu omoonihera yoovekaanyu oneera ha:

¹⁰‘Nyuwosa mwapwaherera okhala mulaponimu, Miyo kinimootekihani ni nkoophwatani; Miyo kinimoophatteyani ni nkoophelani, niwoko koothananaxa mwaha wa erisa kooruuhenlaakani.

¹¹Muhimoove mwene a oBabiloniya, mwa yoowo mummoovaanyu vano. Muhimoove, onghima Yave, niwoko kiri ni nyuwosa ni kinimoovuluxani ni kinimootapuxani mmatatanimwawe.

¹²Miyo kinimoomorelasani ikharari, ni hiihotho owo. Vano owo onimootthuniherani ohokoleela mulaponimwanyu.’

¹³Wa soothesene, nyuwosa mweera: ‘khanipwaherera okhala elapweene yeela,’ hiiho mwaahimwiiwelela Yave, Mulukwaanyu,

¹⁴ni mweera: ‘Hoye, hiyo ninkela wExipitu, weiwo nneeraahu nihoone ekhotto naari nihiiwe oruma wa nipalapatta, hata etala,’

¹⁵vano mwiiwe masu a Yave, oohalahala a oYuda! Yave a ikuru sootheene, Muluku a oYixrayeli oneera ha: ‘Nyuwosa mwaalakenleene orowa wExipitu munamakawo,

¹⁶vano ekhotto munoovaanyu enimoophwanyani ni etala munghovelaanyu enimoottharani mpaka wExipitu, ni iwo munkela okhwelawo.

¹⁷Vekhaikhai, ootheene alakenle oottimula ni orowa omaka wExipitu animookhwa ekhotto, etala ni nihooxo; khahalaru naari mmoha a yaawo hoye hoye khoopowa wa erisa kineeraaka kaaruuhele.’

¹⁸Yave a ikuru sootheene, Muluku a oYixrayeli oneera ha: ‘Mooteene yoowo onyoonyiwawaka oyeeheriwaaya oYerusaleemu, isarasakatho munooyeeheriwa nyuwosa, mwaarowaka wExipitu. Nyuwosa munookhala eneneero ya nlapho ni moopopihero, woonyooserano ni otthebwiwa. Nyuwosa khamoonatho nipuro nna.’

¹⁹Ii! Oohalahala a oYuda, Yave ooweerelani: ‘Muhirowe wExipitu.’ Musuwele ela: Miyo kingwoopererani olelo

²⁰weera nyuwosa moopaka yootakhala eniiva mwaakiruminghaanyu wa Yave, Mulukwaanyu, mvekelaka: ‘Mumvekele Yave, Mulukwaahu, muneerelaka hiyo. Munileele sootheene Owo aneeraawe ooleeleni, ni hiyo nnoopaka.’

²¹Miyo kohooleelani olelo vaava, yeeyo Yave, Mulukwaanyu, okilamulenlaawe wooleelani, vaheera nyuwosa khamummwiiwelela moota wookwanela.

²²Wa soothesene, vano mukupali weera munimookhwa ni ekhotto, etala ni nihooxo, vanipuroni munghaawelaanyu okhala.”