Read Makhuwa-Shirima Yeremiya 43 Bible Online

Yeremiya 43 - Makhuwa-Shirima bible

Yeremiya 43

¹Yeremiya amalihaleene oleela muloko sootheene Yave, Mulukwaawe, aamulamulenlaawe waaleela,

²Azariya, mwaana mulopwana a Hoxaya, ni Yohanani, mwaana mulopwana a Kareya, ni asilopwana oowiixoona ootheene yaamweerela Yeremiya: “Nyuwo mummweera wootha! Yave khoorumingheni weera nihirowe omaka wExipitu.

³Vaheera ti Baruki, mwaana mulopwana a Neriha, onoonyesererihani weera ninnyereriwe mmatatani mwa aBabiloniya, weera eniive hoye hoye enironghe wootthukiwani oBabiloniya.”

⁴Hiiho Yohanani, mwaana mulopwana a Kareya, asitokweene ootheene a anakhotto ni muloko wootheene waarambura Nlamulo na Yave weera epwaherere okhala mulaponi mwa oYuda.

⁵Ohiyanawaya, Yohanani, mwaana mulopwana a Kareya, ni asitokweene ootheene a anakhotto yaahaakuxa oohalahala ootheene a oYuda yaahokolongwe mmilokoni sootheene yaamwareenlaaya weera ekhale mulaponi ya oYuda.

⁶Yaahaakuxatho asilopwana, asithiyana ni asinamwane ootheene, anamwane asithiyana a mwene, mwa yaawo Nebuzaradani, aamuhiyenraawe Gedaliya, mutokweene a anamalipelela a emwene, mwaana mulopwana a Ahikami, mwaana mulopwana a Xafani. Vano mprofeeti Yeremiya ni Baruki, mwaana mulopwana a Neriha yaatakanseriwatho.

⁷Awosa yaarowa wExipitu, ehimwiiwelelaka Yave, ephiyaka mpaka oTapanyesi.

⁸oTapanyesi, Yave aamweerela Yeremiya:

⁹“Mukuxe maluku makina makina matokotoko, asilopwana a oYuda ewoonakani, muthipele moopapatthiwa vamulako wa empa ya mwene Farawu*, oTapanyesi.

¹⁰Vano mwaweerelase: Yave a ikuru sootheene, Muluku a oYixrayeli oneera ha: ‘Kinoomwiitthaniha murumeiyaaka Nebukadenezari, mwene a oBabiloniya, ni owo onimwiikaathi ehicaawe ya emwene vamalukuni ala kithipenlaaka, ni onookungelawo eheemaawe ya emwene.

¹¹Owo onimoorwa ni onoowanano wExipitu, onoowiiva alakeleliwe wiiviwa, wootthukiwani alakeleliwe otthukiwa, ni ekatana alakeleliwe wiiviwa ni ekatana.

¹²Owo onoohisa impa sa miluku sa wExipitu; onoopattiha impa sa milukusaya ni onoorowano sootthukiweene milukusaya. Mooteene yoowo mukukhuli omvenxaawe itutulumbwa sa muhuwo mukuwonimwawe, hiihotho mwene a oBabiloniya onoovenxa sootheene sa wExipituwawe ni onoorowa mmuretteleni.

¹³Owo onimwaanyaanya amarimbu a empa ya Nsuwa eri wExipitu. Onoopattiha impa sa miluku sa wExipitu.’ ”