Read Makhuwa-Shirima Yeremiya 46 Bible Online

Yeremiya 46 - Makhuwa-Shirima bible

Yeremiya 46

¹Mutthenga wa Yave waamurweenle mprofeeti Yeremiya mwaha wa miloko ti ola:

²Mwaha wa wExipitu: Ola mutthenga wa anakhotto a mwene a wExipitu, Farawu* Neko, aawiniwe oKarikemixi, omoolokoni Efratesi ni Nebukadenezari, mwene a oBabiloniya, muyaakhani yanaaxexe moolamulani wa Yehoyakimi, mwaana mulopwana a Yosiya, mwene a oYuda:

³“Mureherere ixikudusanyu*, itokweene ni ikhaanene ni murowe okhottoni.

⁴Mureherere ikavalusanyu* ni ngwele! Mukhale oolikaneene ni ngware ekapaseti! Mukutthe othokani wa mavaka ni ngwarele sa ekhotto.

⁵Vaheera kingwoona etteengungweene, eneera yiihululaka; anakhottwaaya aawiniwa. Antthawa yaakuveyaka, ehiwehaka ottuli; wookhala woopiha mipatta sootheene,” onghima Yave.

⁶“Namaweraxa khangwera otthawa, hata oolipa khangwera woopowa. Mpatta wa ottuttuwani omoolokoni Efratesi, awosa ankwattuliwa, enuuwa.

⁷Taani ole onsara ntoko mooloko Nilu, aani ntoko maahi ootekumihiwa?

⁸Exipitu onsara ntoko mooloko Nilu, aani ntoko nyooloko sootekumihiwa. Owo oneera: ‘Miyo kinoovenya kikhuneeleke elapo; kinoophwata isidade ni amakaaya.’

⁹Haya nyuwo ikavalu*! Mweettihe ikaaro sa ekhotto nyuwosa anamweettiha! Murowe ohoolo, anakhotto! asilopwana a oKuxe ni a oLibiya, ankuxa ixikudu*, asilopwana oLidiya ankunga nyuura!

¹⁰Vaheera nihuku nno ti na Muneene Yave a ikuru sootheene. Nnikhale nihuku na ikukuttula — noowiinlela ikukuttula awananaawe. Ekatana enoonyaanya mpaka okwaneya, aani mpaka okwaneya ohaawelawaya ephome. Niwoko Yoole onlamula sootheene, Yave a ikuru sootheene, onoopaka yooveleela mulaponi ya ottuttuwani, omoolokoni Efratesi.

¹¹Murowe oGiliyade mwaase ebalsamu*; Ii! Mwaamwali oowiikosoopa, mwaana a wExipitu! Nyuwo munaasa wuukelawene mirette; khamunlama.

¹²Miloko saahiiwa sa oyevihiwawanyu; okhuwelawanyu wohiiwanyeya mulaponi yootheene ya vathi. Nakhotto mmoha onoomukwattula mukina, ni ooweeli anoomora.”

¹³Mutthenga Yave aamuulumenlaawe mprofeeti Yeremiya mwaha wa orwa wa Nebukadenezari, mwene a oBabiloniya weera awaneno wExipitu ti ola:

¹⁴“Mulaleiye ela wExipitu ni muthalihe oMigdoli; muthalihetho oMemfesi ni oTapanyesi: ‘Mukhale oolikaneene! Mwiireherere! Niwoko ekatana enaanyaanya yaale ari mukhwipimwanyu.

¹⁵Amorelenleni anakhottwaanyu vathi? Awosa khaangwera weemela niwoko Yave ohaamoroxa.’

¹⁶Anookwakwathuwa, enuuwa, animuuwelana. Awosa aneerelana: ‘Mvenye. Nrowe nihokoleele omulokoniwahu ni elapo niyareliwaahu, ottai wa ekatana ya namahooxa.’

¹⁷Iwo eniyeere: ‘Farawu*, mwene a wExipitu, ti munyakunyaku paahi! Owo ooyeleela ehuhuwaawe.’

¹⁸Kinlipela mwa okumaaka,” onghima Mwene, mwa Yoowo Nsinanawe Yave a ikuru sootheene, “Mmoha onimoorwa ntoko Tabori eriyari ya nyaako, aani ntoko Karemeli ophareiya.

¹⁹Mutthukatthuke mirindi weera murowe wootthukiwani, nyuwo munkhala wExipitu, niwoko oMemfesi onoophwatiwa; onoohala ttewu ni woohimakiwa.

²⁰Exipitu ti mwaamombe ooreera, vaheera mpatta wa ottuttuwani onlummwa ni mukaanga.

²¹Anakhotto anliviwa, mmiseranimwaya ankhala ntoko aximombe ooneneva. Awosatho anoorukunuwa, etthaweke vamoha; khayaakhiwa ankhalaayamo, niwoko nihuku na owiniwawaya nneera nikhuveelaka, ehuhu ya ottaruxiwawaya.

²²Exipitu onimoopa murika ntoko enowa etthawaka, mpaka amwiittana anaarowela ni ikuruxa. Awosa animwaarweela awExipitu ni ipaso ntoko mulopwana onuuha nyiri.

²³Awosa animuuha othakwaawe,” onghima Yave, “naari wiilihanneene. Ahaattaxa opwaha misoope; khaanaalikeleya!

²⁴Esidade ya wExipitu enimuulihihiwa muru, enimwinnyereriwa mmatatani mwa muloko wa ottuttuwani.”

²⁵Yave a ikuru sootheene, Muluku a oYixrayeli oneera: “Kinoomuttaruxa Amoni, muluku a oTebesi, Farawu*, wExipitu, milukusaya ni mamwenaaya, mpakatho yaawo animuroromela Farawu*.

²⁶Miyo kinoowinnyererasa mmatatani mwa yaale antthuna owiiva; mmatatani mwa Nebukadenezari, mwene a oBabiloniya, ni asitokweenaawe. Wa soothesene, othanathanaru wExipitu onoomakiwa ntoko ehuhu ya khalayi,” onghima Yave.

²⁷“Wa nyuwo murumeiyaaka Yakobe — muhoove! Ii! Yixrayeli, muhituthuwe! Miyo kinimoovuluxani mulaponi yoorakamela, ni ekhapiraanyu mulaponi mutthukiwaanyu. Yakobe onoohokolowa ni onookhala mmuretteleni; oolipeene ni khaawo eniimuungurumihe.

²⁸Ii! Murumeiyaaka Yakobe, muhoove! Miyo kiri ni nyuwo,” onghima Yave. “Kinoophwata woomalela miloko sootheene eriyari ya seiyo koomwaraxenlaakani; vaheera wa nyuwo nkoophwatani woomalela. Miyo kinimoolakani ntoko mumphwanelaanyu; nkookhalelaxani oxilili.”