Read Makhuwa-Shirima Yeremiya 49 Bible Online

Yeremiya 49 - Makhuwa-Shirima bible

Yeremiya 49

¹Mwaha wa awAmoni: Yave oneera ha: “Weeraka Yixrayeli khanono anamwane? Khawoworu namahiyeriwa? Heeni Moleki iikuxenraawe oGadi? Mulokwaawe onkhalelani musidade sa oGadi?

²Vanonto, vekhaikhai anoophiyera mahuku,” onghima Yave, “kineeraaka kirumihihele okhuweliwa wa ekhotto oRaba ankhalaayawo awAmoni; eyo enookhala ittuxo sa mathala, ni mittetthe sa mukhwipimwaya sinoohisiwa. Vano aYixrayeli anoowoomola yaale yaawoomonle,” oneera Yave.

³“Ii! Hexiboni, wiikhupanyere, niwoko wAi woophwatiwawo! Ii! Amaki a oRaba! Mukhuwele! Ngware soolalamikano ni mwiinle! Mwaase otthimaka, niwoko Moloki onoorowa wootthukiwani vamoha ni asaserdotaawe ni asitokweenaawe.

⁴Muniixoonela heeni ni mareyareyaanyu? Muniixoonela heeni ni mareyareyaanyu a ethaadyira? Ii! Mwaana muthiyana oohiroromeleya! Nyuwo munroromela mihakhusanyu mweeraka: ‘Taani anaakiwanane?’

⁵Kinoopakiha weera moove sootheene soorukureenreni,” oneera Yave, Yave a ikuru sootheene. “Nyuwosa munoomwaraxiwa, khula mutthu mpattaawe, ni khaawo anaawere waathukumanyiha anamatthawa.

⁶Wa soothesene, vahoolowaya, kinooreherera oreereliwa wa awAmoni,” onghima Yave.

⁷Mwaha wa wEdomi: Yave a ikuru sootheene oneera ha: “Weeraka miruku soomala oTema? Weeraka olaka wa anamiruku woolakaseya? Mirukusaya soothowa?

⁸Murukunuwe ni mutthawe, mwiipithe munikhukuni moowiixa, nyuwosa munkhala oDedani, niwoko kinoomuhela nthala Esawu mweehuhuni kineeraaka kimuttaruxe.

⁹Anamahepha a iwuuva* yoorweenleni, khayoohiyerani iwuuva* vakhaani? Anamwiiya yaarwiiye moohiyuni, khayiiya paahi yeeyo antthunaaya?

¹⁰Mene Miyo koomurula Esawu, kinoonelela moowiipithamwawe, weera owo ahiipithetho. Anamwanaawe xaxaxa ni amwaattamanaawe aaphwatasiwa. Khawoworu ohanle.

¹¹‘Mwaahiye akwaasunaanyu; Miyo kinimwaakosoopa. Asinaamukhwelaanyutho ekiroromele Miyo.’ ”

¹²Yave oneera ha: “Yaale yahaaphwanela owura ekoomixi antthuneya owura, heeni nyuwosa muhintthuneyaanyu owura? Nyuwo khamukhala woohittaruxiwa, mene munoowura.

¹³Miyo kiniilipela muneenaaka,“ onghima Yave, “weera Bozera onookhala mathala oohimakiwa; owo onoothatuwa eneneero ya munyakunyaku, otthebwiwa ni nlapho, ni isidadesawe sootheene sinookhala mathala oohimala.”

¹⁴Kohiiwa mutthenga wa mpatta wa Yave; namutthenga oorumiheliwa oleela miloko: “Muthukumane weera mungwanane Edomi! Mwiirehererele owana!”

¹⁵“Vano Miyo kinoopakani nyuwo muloko mukhaanene eriyari ya sikina iyo, ahinoonelaaya atthu.

¹⁶Woova muntannyaanyu ni wiixoona wa mirimasanyu wohoolokotthani, nyuwo munkhala mmakhukuni, munaakamela osuluxa wa mattumuxa. Naari nyuwo mpakaka epuurwaanyu osuluxa ntoko xaaka, kinimoomoroxaniwo,” onghima Yave.

¹⁷“wEdomi onoothatuwa moopopihero; ootheene eniivirewo anoothikileya muthana, etheyeke, niwoko na makhwattaawe ootheene.

¹⁸Mooteene yoowo waaphwatiwaaya oSodoma ni oGomora vamoha ni isidade soowaattamana,” oneera Yave, “hiihotho khaawo anaamakewotho, naari mutthu mmoha.

¹⁹Ntoko mwatto omvolowa ntuphini na Yordanu arowoka moocaani moosareya malaxi, wootutuxereya Miyo kinoomulupattha Edomi kimoomolaka mulaponimwawe. Oothanliwa heeni kineeraaka kimurume yeeyo? Taani ori ntoko Miyo anaawere okipakela mpikisaano? Ni mukukhuli heeni anaawere okiwanano?”

²⁰Tivawo, mwiiwe yeeyo Yave omvaanelenlaawe Edomi ni yeeyo aarehererenlaawe amaki a oTemani: Axaana a muhuwo anoopuruliwa, ni moocihamo onoonanarihiwa mwaha wa yaawosa.

²¹Etthaya enootetereya woowiiwa oruma wa omorawaya; okhuwelawaya onimwiiwanyeya mpaka Ephareiya Yooxeera.

²²Moone! Xaaka awelaka onkhuruwa, akungenleene mapupha oBozera. Nihuku nno ominya murima wa anakhotto a wEdomi onuukhale ntoko muthiyana ayaraka.

²³Mwaha wa oDamasku: “wAmati ni wArepadi wohoopopiheya niwoko ahiiwa ihaali soonanara. Khaalipiheiye murima ni ootthukuruweene ntoko ephareiya yootekumihiwa.

²⁴oDamasku woothatuwa woophweeya, woorukunuwa weera otthawe, orukureereya muru woovara; othanana ni ovoreyawaya woovara, ovoreya ntoko muthiyana ayaraka.

²⁵Moota ethaamiwaaya esidade yoowiiwanyeya — aani esidade ya ohakalala!

²⁶Tivawo, amiravowaaya eneeraaya emorele mmiseweni ni anakhottwaaya ootheene emaale nihuku nno,” onghima Yave a ikuru sootheene.

²⁷“Kinoopattiha ixiri sa oDamasku, sineera silalihe mapuro oolipihiwa mwa Beni-Hadadi.”

²⁸Vano yeeyo Yave onghimaawe mwaha wa oKedari ni imwene sa oHazori, mwa seiye Nebukadenezari, mwene a oBabiloniya, aawinnaawe ti ela: Mwiireherere, ngwaneno oKedari ni mphwate muloko wa mpatta ninkhuma nsuwa.

²⁹Mukuxe iheemasaya ni mihuwosaya, iluttusaya vamoha ni ikarumasaya sootheene ni ikamelu*. Atthu animwaakhuwelela: ‘Wookhala woopiha mipatta sootheene!’

³⁰Mutthawe woowaakuveya! Mwiipithe mmakhukuni oowiixa, nyuwosa amaki a oHazori,” onghima Yave. “Nebukadenezari, mwene a oBabiloniya, ohoovaanelelani.

³¹Mwiireherere ni ngwanane elapo enkhala yoomaaleleya ni yoowiiroromela,” onghima Yave, “elapo ehinono masele naari anampattika, enkhala meekhaaya.

³²Ikamelusaya sinoothatuwa soohuhuliwa ni nakupa a axinamaaya oohiiwa. Kinimwaamwaraxela mpheyoni yaale amvukula mayihi ni kinimwaaruuhela erisa mipatta sootheene,” onghima Yave.

³³“oHazori onoothatuwa nipuro ankhalaayawo akwatte, nthala noohimala. Khaawo anaamakewotho, naari mutthu mmoha.”

³⁴Masu a Yave yaamurweenle mprofeeti Yeremiya mwaha wa wElami, ompacereroni wa olamula wa mwene Zedekiya, mwene a oYuda, ti ala:

³⁵Yave a ikuru sootheene oneera ha: “Moone, kinimwiintaka muura wa Elami, erimarima ya owerawaya.

³⁶Kinoopakiha weera ipheyo ixexe sinrweela mipatta mixexe sa wiirimu soopele wElami. Miyo kinimwaamwaraxela mpheyoni ixexe, anamatthukiwa a wElami anooronghiwa wootthukiwani mmilokoni sootheene sa mulaponi.

³⁷Kinoopakiha weera wElami othukumele ohoolo wa amwiittanaaya, ohoolo wa yaale anghaawela owiiva amakaaya. Kinimwaaruuhela erisa, isarasaka soopatta,” onghima Yave. “Kinoopakiha weera ekatana yaattharelele mpaka Miyo kineeraaka kaamalamalihe.

³⁸Kinookhaliha wElami ehicaaka ya emwene ni kinoomphwata mwene ni asitokweenaawe,” onghima Yave.

³⁹“Wa soothesene, kinooreherera oreereliwa wa Elami mmahukuni a muhoolo,” onghima Yave.